នៅព្រឹកថ្ងៃទី១៤ខែឧសភាឆ្នាំ២០២១ ព្រះគ្រូវិបុលបញ្ញា ថាមវរោ រី សាត ព្រះរាជាគណៈថ្នាក់កិត្តិយសនៃព្រះរាជាណាចក្រកម្ពុជានិងជាព្រះចៅអធិការវត្តកេសរារាម ស្ថិតក្នុងក្រុងសៀមរាប បានចែកគ្រឿងឧបភោគបរិភោគ ជូនដល់ប្រជាពលរដ្ឋជួបការលំបាកផ្នែកជីវភាព និងប្រជាការពារ ចំនួន៥៦គ្រួសារ ក្នុងភូមិសាលាកន្សែង សង្កាត់ស្វាយដង្គំ ក្រុងសៀមរាប ដោយក្នុងមួយគ្រួសារទទួលបាន អង្ករ៣០គីឡូក្រាម , ទឹកត្រី១ដប , ទឹកស៊ីអ៊ីវ១ដប និង ស្ករស១កញ្ចប់ ព្រមទាំងជួយផ្តល់នូវមធ្យោបាយដឹកជញ្ជូនពួកគាត់វិលទៅតាមលំនៅឋានរៀងខ្លួនផងដែរ ។
ព្រះគ្រូវិបុលបញ្ញា ថាមវរោ រី សាត មានសង្ឃដីកាថា ការលំបាកផ្នែកជីវភាពក្តី ផ្នែកសង្គមគ្រួសារណានីមួយក្តី ក៏ជាទុក្ខលំបាករបស់ព្រះសង្ឃគ្រប់អង្គដែរ ព្រោះថាព្រះសង្ឃអាស្រ័យភោជន៍ពីប្រជាពុទ្ឋបរិស័ទ បើប្រជាពុទ្ឋបរិស័ទមានជីវភាពធូរធារ ទីអារាមនិងចង្ហាន់នានាសម្រាប់ព្រះសង្ឃ ក៏រីកចម្រើននិងបរិបូរណ៍ទៅតាមនោះដែរ ហើយការផ្តល់ស្បៀងអាហាររបស់ព្រះសង្ឃនៅពេលនេះ គឺជាការចូលរួមជាមួយរាជរដ្ឋាភិបាលកម្ពុជា ក្នុងការជួយទៅដល់ប្រជាពលរដ្ឋដែលកំពុងជួបការលំបាក ខ្វះខាត ដែលបញ្ហាប្រឈមកើតឡើងក្នុងអំឡុងពេលកើតមានជាសកលនូវវិបត្តិជំងឹកូវីដ-១៩ ដូច្នេះនៅពេលដែលពុទ្ធបរិស័ទមានជួបទុក្ខលំបាក ព្រះសង្ឃត្រូវតែខ្វល់ខ្វាយជួយជ្រោមជ្រែងញោមញាតិនិងចូលរួមការរំលែកទុក្ខរបស់ពុទ្ធបរិស័ទ ដោយព្រហ្មវិហារធម៌បួន មេត្តា ករុណា មុទិតា និងឧបេក្ខា ទៅតាមលទ្ឋភាព និងសមត្ថភាពដែលព្រះសង្ឃអាចធ្វើនិងជួយបាន ។
ព្រះគ្រូវិបុលបញ្ញា ថាមវរោ រី សាត មានសង្ឃដីកាទៀតថា សម្ភារអំណោយសម្រាប់ជាសង្គហទាននាពេលនេះ បានមកការចូលរួមបរិច្ចាករបស់លោក Andreas G. Flober និងភរិយា ដែលជាជនជាតិ អាល្លឺម៉ង់ ដែលមករស់នៅក្នុងស្រុកខ្មែរជាង១៥ឆ្នាំហើយ ហើយគាត់ជាអ្នកបដិបត្តិសមាធិ និង បង្រៀនសមាធិតាមបែបព្រះពុទ្ឋសាសនាផងដែរ និងមួយផ្នែករបស់ព្រះចៅអធិការវត្តនេះ បានមកពីការសន្សំសំចៃរបស់ព្រះអង្គ ទទួលបានពីការប្រគេនរបស់ទាយក ទាយិកា នាពេលកន្លងមក ខណៈរយៈកាលកន្លងមក ព្រះអង្គតែងតែបានសហការជាមួយចៅអធិការវត្តជាច្រើនទៀតក្នុងខេត្តសៀមរាប ដើម្បីស្វែងរកកៀងគរការឧបត្ថម្ភពីសប្បុរសជនជិតឆ្ងាយសម្រាប់ផ្តល់ជូនគ្រួសារដែលងាយរងគ្រោះដូចជាចាស់ជរាគ្មានទីពឹង ជនមានពិការភាព ស្ត្រីម៉េម៉ាយមានជំងឹនិងកូនច្រើនដែលពួកគាត់ជួបបញ្ហាលើជីវភាពប្រចាំថ្ងៃ ។
ក្នុងឱកាសនោះដែរ ព្រះតេជគុណបានអំពាវនាវដល់បងប្អូនប្រជាពលរដ្ឋទាំងអស់ ត្រូវយកចិត្តទុកដាក់ថែទាំសុខភាព ដូចជាការបរិភោគ ត្រូវរក្សាអនាម័យ ដើម្បីចៀសវាងជំងឺរាគរុសផ្សេងៗ ជាពិសេស ចូរអនុវត្តឲ្យបានត្រឹមត្រូវនូវការណែនាំរបស់ក្រសួងសុខាភិបាល និងវិធានការ៣កុំនិង៣ការពាររបស់សម្តេចតេជោ សែន នាយករដ្ឋមន្ត្រីដើម្បីការពារ ការទប់ស្កាត់ និង បង្ការការសម្លងជំងឺកូវីដ១៩ ៕
អត្ថបទ និងរូបភាព៖ លោក យូ វង្ស
កែសម្រួល៖ លោក លីវ សាន្ត
