នៅយប់ថ្ងៃទី១៥ ខែឧសភា ឆ្នាំ២០២១នេះ រដ្ឋបាលខេត្តសៀមរាប ប្រកាសជាផ្លូវការ អំពីការផ្លាស់ប្តូរទីតាំងពិនិត្យសុខភាពបឋម និង ស្កែន QR Code Stop COVID-19 “ទប់ស្កាត់ជំងឺកូវីដ-១៩ ព្រមទាំងចុះឈ្មោះអ្នកដំណើរចូលភូមិសាស្ត្រខេត្តសៀមរាប នៅចំពូចព្រំប្រទល់ខេត្តសៀមរាប-កំពង់ធំ ពីចំណុចឃុំល្វែងឬស្សី ស្រុកជីក្រែង ជិតព្រំប្រទល់ស្រុកស្ទោង ខេត្តកំពង់ធំ មកទីតាំងវិទ្យាល័យកំពង់ក្តី ស្ថិតនៅភូមិពោធិ៍សិរី ឃុំកំពង់ក្តី ស្រុកជីក្រែង ។
ការប្តូរទីតាំងនេះ គឺដើម្បីសម្រួលបញ្ចៀសការកកស្ទះ និងបង្ការទប់ស្កាត់ការឆ្លងជំងឺកូវីដ-១៩ ពិសេស គឺស្របពេលនៃការផ្លាស់ប្តូររដូវកាលដែលមានភ្លៀងធ្លាក់ជាបន្តបន្ទាប់ បណ្តាលឲ្យទីតាំងចាស់ដែលបានរៀបចំបន្ទាន់ដំបូងជាប់ដងផ្លូវជាតិលេខ៦នោះ មិនធានាបានទេ ចំពោះការរំខានណាមួយក្នុងពេលមានភ្លៀងខ្យល់កើតឡើងនោះ ដោយអនុវត្តចាប់ពីម៉ោង ២២៖០០ ថ្ងៃទី១៥ ខែឧសភា ឆ្នាំ២០២១នេះ តទៅ ។
បើតាមការបញ្ជាក់របស់រដ្ឋបាលខេត្តសៀមរាប បានឲ្យដឹងថា ការពិនិត្យសុខភាពបឋម និងការចុះឈ្មោះ ឬស្កែន QR Code គឺបានផ្តល់អត្ថប្រយោជន៍ និងធានាបាននូវប្រសិទ្ធភាពនៃការបង្ការ ទប់ស្កាត់ការឆ្លងរាលដាលជំងឺកូវីដ-១៩ តាមរយៈ៖ ១. ទទួលបានព័ត៌មានរបស់អ្នកដំណើរ , ២. ពិនិត្យសុខភាពបឋម ក្នុងករណីសង្ស័យឈានទៅយកសំណាក និងចត្តាឡីស័ក , ៣. ផ្តល់ព័ត៌មានច្បាស់លាស់ និងរហ័សដល់ក្រុ ការងារស្រាវជ្រាវ និងស្វែងរកអ្នកពាក់ព័ន្ធផ្ទាល់ និងប្រយោល , ៤. កាត់ផ្តាច់ប្រភពចម្លងទៅសហគមន៍ ។
រដ្ឋបាលខេត្តសៀមរាប បានធ្វើការសុំការយោគយល់ពីអ្នកដំណើរទាំងអស់ ដែលបានធ្វើដំណើរឆ្លងកាត់ ឬឆ្លងចូលភូមិសាស្ត្រខេត្តសៀមរាប សូមចូលរួមសហការជាមួយក្រុមការងារ ដើម្បីបង្ការ និងទប់ស្កាត់ការឆ្លងរាលដាលជំងឺកូវីដ-១៩ និងអនុវត្តនូវវិធានការរបស់ក្រសួងសុខាភិបាល និងអនុសាសន៍ដ៏ខ្ពង់ខ្ពស់របស់ សម្តេចតេជោនាយករដ្ឋមន្ត្រី នៃព្រះរាជាណាចក្រកម្ពុជា គឺ ៣ការពារ ៣កុំ ៕
អត្ថបទ និង រូបថត ៖ លោក ងិន គឹមឡេង និង រដ្ឋបាលខេត្ត
កែសម្រួលអត្ថបទ ៖ លោក លីវ សាន្ត
