មន្ដ្រីជំនាញ បានអះអាងថា ក្រុមការងារកំពុងមមាញឹកតបណ្ដាញខ្សែកាប្លិ៍អ៊ុបទិក នៅតាមផ្លូវសំខាន់ៗមួយចំនួន ក្នុងក្រុងសៀមរាប ដើម្បីធ្វើយ៉ាងណានឹងលែងមាននៅលើអាកាសទៀតហើយនៅឆ្នាំ២០២៣ខាងមុខ ដោយបណ្ដាញខ្សែនោះបានបង្វែដាក់ក្នុងបំពង់កប់ក្រោមដីវិញ ។
លោក សុខ សីហា ប្រធានមន្ទីរប្រៃសនីយ៍ និងទូរគមនាគមន៍ ខេត្ដសៀមរាប បានឱ្យដឹងកាលពីថ្ងៃទី១៦ខែឧសភានេះថា បច្ចុប្បន្ននេះ ក្រុមការងារពាក់ព័ន្ធរួមមាន អង្គភាពអគ្គិសនី រដ្ឋករទឹកនិងក្រុមការងារសាងសង់ផ្លូវ៣៨ខ្សែក្នុងក្រុងសៀមរាប បានសហការគ្នា បាននឹងកំពុងមមាញឹកតបណ្ដាញខ្សែកាបទាំងអស់ដាក់ចូលក្នុងបំពង់កប់ក្រោមដីនៅតាមផ្លូវសំខាន់ៗមួយចំនួន ដើម្បីធ្វើយ៉ាងណាលែងឱ្យមានខ្សែកាបទាំងមាននៅលើអាកាសបន្ដទៀត ប៉ុន្ដែដោយឡែកផ្លូវតូចនៅតែមានដដែល ។លោកមានប្រសាសន៍ថា ការកាត់ខ្សែកាបដាក់ក្នុងបំពង់កប់ក្រោមដីនេះ បានធ្វើឡើងចាប់ពីចុងឆ្នាំ២០១៨ដល់ឆ្នាំបច្ចុប្បន្ននេះ បានកប់ខ្សែកាបក្រោមដីតាមបណ្ដោយផ្លូវសំខាន់ៗនៅក្នុងក្រុងសៀមរាបបានជាង១៤ផ្លូវខ្សែដែលមានប្រវែងជាង៧០គម ។លោកថា គម្រោងនេះនឹងបន្ដអនុវត្ដកាត់ខ្សែពីលើអាកាស ទៅដាក់ក្នុងបំពង់កប់ក្រោមដីនៅតាមផ្លូវសំខាន់ៗទាំងនោះ ឱ្យរួចរាល់នៅឆ្នាំ២០២៣ ស្របតាមគម្រោងអភិវឌ្ឍន៍ហេដ្ឋារចនាសម្ព័ន្ធផ្លូវ៣៨ខ្សែដែលជាផ្លូវកំពុងកែលម្អនៅក្នុងក្រុងសៀមរាប។ប៉ុន្ដែលោកបានបញ្ជាក់ថា បើទោះបី ការដាក់ខ្សែកាបអ៊ុបទិកនេះមិនឱ្យមានលើអាកាសក្ដី ប៉ុន្ដែអាចនៅមានដាក់ក្នុងបំពង់ភ្ជាប់ជាមួយ នឹងបង្គោលភ្លើងអគ្គីសនី ដើម្បីងាយស្រួលអ្នកជំនាញតបណ្ដាញចូលផ្ទះប្រជាពលរដ្ឋ។លោកថា ការរៀបចំឱ្យមានខ្សែកាបអ៊ុបទិចនៅក្រោមដីនេះ ដើម្បីឱ្យនៅលើផ្លូវមានសោភ័ណ្ណភាពនិងសុវត្ថិភាព សណ្ដាប់ធ្នាប់ល្អនៅក្នុងទេសចរណ៍មួយនេះ ស្របតាមផ្លូវដែលបានអភិវឌ្ឍន៍៣៨ខ្សែផងដែរ។
លោក សុខ សីហា បានឱ្យដឹងថា នៅក្នុងខេត្ដសៀមរាប មានក្រុមហ៊ុនអ៊ីនធ័រណែតចំនួន១១ក្រុមហ៊ុន ។ក្រុមហ៊ុនដែលបានទទួលអាជ្ញាប័ណ្ណដាក់បំពង់ទីបក្រោមដីចំនួន២ក្រុមហ៊ុន រួមមាន ទូរគមនាគមន៍ កម្ពុជា TC របស់រដ្ឋ និងក្រុមហ៊ុន ស៊ីហ្វុក CFOCN ។បើតាមលោកសីហាថា ផ្លូវដែលបានកាត់ទម្លាក់បណ្ដាញខ្សែកាប្លិ៍ ដើម្បីរៀបចំឱ្យមានសោភណ្ឌភាពនិងសណ្ដាប់ធ្នាប់ល្អមានផ្លូវ លោកតាណឺយ ផ្លូវជុំវិញផប់ស្ទ្រីត ផ្លូវហ្សាឌឺហ្គោល ផ្លូវ៦០ម៉ែត្រ ផ្លូវកូម៉ៃ ផ្លូវ៧មករា ផ្លូវជាតិលេខ៦ ចាប់ពីព្រំប្រទល់រដ្ឋបាលស្រុកពួក ដល់ស្រុកប្រាសាទបាគង ផ្លូវស៊ីវុត្ថា និងផ្លូវសំខាន់ៗមួយចំនួនទៀតស្ថិតនៅក្នុងក្រុងទេសចរណ៍អង្គរ។លោកក៏បានអំពាវនាវដល់ប្រជាពលរដ្ឋឱ្យមានការយោគយល់ ចំពោះការប៉ះពាល់នៅពេលអ្នកជំនាញជីកកាយដីដាក់ខ្សែកាបអ៊ុបទិចនៅខាងមុខលំនៅឋានរបស់ពួកគាត់ផងដែរ៕
អត្ថបទ និង រូបភាព៖ ឈិត សាវី
