នៅព្រឹកថ្ងៃទី១៧ ខែឧសភា ឆ្នាំ២០២១នេះ លោក ជី សុខ ប្រធានសាលាដំបូងខេត្ត និងលោក កើត វណ្ណារ៉េត ព្រះរាជអាជ្ញាអមសាលាដំបូងខេត្ត រួមនឹងសហការី បាននាំយកនូវអំណោយរួមមាន ៖ អង្ករ ២តោន , មី ២០០កេសតូច , ត្រីខ ២០កេស , ប្រេងឆា ៣០កេស , ទឹកត្រី ១០០យួរ , ទឹកស៊ីអ៊ីវ ១០០យួរ ឧបត្ថម្ភជូនដល់រដ្ឋបាលខេត្ត ដើមី្បយកទៅប្រើប្រាស់ និង ផ្តល់ជូនពលរដ្ឋធ្វើចត្តាឡីស័ក និង ពលរដ្ឋខ្វះខាត់នៅ ក្នុងអំឡុងពេលធ្វើយុទ្ធនាការប្រយុទ្ធប្រឆាំងនឹងជំងឺកូវីដ-១៩នៅខេត្តសៀមរាប និង ថវិកាចំនួន ៨.៤៨០.០០០រៀល ឧបត្ថម្ភជូនដល់សាខាកាកបាទក្រហមកម្ពុជាខេត្តសៀមរាប ក្នុងឱកាសខួបទី១៥៨ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ដែលពិធីប្រគល់នេះបានប្រព្រឹត្តទៅក្រោមអធិបតីភាពឯកឧត្តម ទៀ សីហា អភិបាលខេត្ត និង ជាប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប ។
លោក ជី សុខ បានបញ្ជាក់ថា ក្នុងពេលវេលានេះ យើងត្រូវតែចាំបាច់ចូលរួមជាមួយរាជរដ្ឋាភិបាល ដែលមានសម្តេចតេជោ ហ៊ុន សែន ជានាយករដ្ឋមន្ត្រី ក្នុងពេលដែលប្រជាពលរដ្ឋ បានកំពុងជួបនូវវិបត្តិជំងឺកូវីដ-១៩សំខាន់បងប្អូនប្រជាពលរដ្ឋនៅខេត្តសៀមរាប មួយចំនួនទទួលរងគ្រោះធ្វើឲ្យប៉ះពាល់នូវជំងឺដ៏កាចសាហាវនេះ ។
មានប្រសាសន៍ក្នុងឱកាសនោះ ឯកឧត្តម ទៀ សីហា បានបង្ហាញនូវក្តីសោមនស្សរីករាយ ចំពោះទឹកចិត្តដ៍ឧត្តុង្គឧត្តម របស់សាលាដំបូងខេត្ត រួមទាំងមន្ត្រីរាជការក្រោមឱវាទ ដែលបានលះបង់នូវធនធានផ្ទាល់ ចូលរួមយ៉ាងធំធេងក្នុងពេលដែលយើងទាំងអស់គ្នាកំពុងប្រឈម និងជួបការលំបាកដោយសារវិបត្តិជំងឺកូវីដ-១៩ ដើម្បីចូលរួមចំណែកជាមួយរាជរដ្ឋាភិបាល ក៏ដូចជារដ្ឋបាលខេត្តសៀមរាប ហើយរដ្ឋបាលខេត្ត នឹងយកអំណោយទាំងអស់នេះ ឲ្យដល់គោលដៅសំខាន់ៗ និងបែងចែង ផ្តល់ជូនប្រជាពលរដ្ឋ ដែលបានកំពុងធ្វើចត្តាឡីស័ក និង ពលរដ្ឋខ្វះខាតនៅ ក្នុងអំឡុងពេលធ្វើយុទ្ធនាការប្រយុទ្ធប្រឆាំងនឹងជំងឺកូវីដ-១៩ នៅក្នុងខេត្តសៀមរាប ក្នុងព្រឹត្តិការណ៍ ២០កុម្ភៈទៅតាមលទ្ឋភាពដែលរដ្ឋបាលខេត្តមាន ។
ឯកឧត្តមមានប្រសាសន៍ទៀតថា ទោះជាខេត្តសៀមរាប មានមោទនភាពក្នុងការគ្រប់គ្រងស្ថានភាពជំងឺកូវីដ-១៩បានល្អក៏ដោយ ក៏ប៉ុន្តែវាក៏កំពុងស្ថិតក្នុងការហ៊ុព័ទ្ធ ដោយហានីភ័យយ៉ាងធ្ងន់ធ្ងរ ជាមួយនឹងការព្រួយបារម្ភដោយសារបងប្អូនប្រជាពលរដ្ឋដែលបានវិលត្រឡប់មកពីបណ្តារាជធានី ខេត្តមានហានីភ័យខ្ពស់នៃជំងឺកូវីដ-១៩ ប៉ុន្តែ រដ្ឋបាលខេត្ត បានគិតគូរក្នុងការបង្កើនសមត្ថភាពកាត់ផ្តាច់ខ្សែចម្លង វាប្រសើរជាងការប្រមូលកម្លាំងទៅទប់ទល់ ក្នុងពេលនិងក្រោយពេល មានការផ្ទុះជម្ងឺកូវីដ-១៩ ក្នុងសហគមន៍ នៅក្នុងព្រឹត្តិការណ៍សហគមន៍២០កុម្ភៈ ។
ក្នុងនោះដែរឯកឧត្តមអភិបាលខេត្ត បានធ្វើការអំពាវនាវដល់បងប្អូនប្រជាពលរដ្ឋទាំងអស់ក្នុងខេត្តសៀមរាប ត្រូវចូលរួមអនុវត្តវិធានការរបស់រាជរដ្ឋាភិបាល៣កុំ ៣ការពារ និង២ចូលរួម ឲ្យមានប្រសិទ្ធភាពខ្ពស់បំផុត និង បន្តប្រកាន់នូវវិធានសុខាភិបាល ឲ្យបានខ្ជាប់ខ្ជួនទៀតផង ៕
អត្ថបទ និង រូបថត ៖ យូ វង្ស ,ងិន គឹមឡេង
កែសម្រួលអត្ថបទ ៖ លោក លីវ សាន្ត
