ខណ:ពេលដែលខេត្តសៀមរាប កំពុងដំណើរការជួសជុល និងស្ថាបនាហេដ្ឋារចនាសម្ព័ន្ឋផ្លូវចំនួន៣៨ខ្សែ ព្រមទាំងប្រព័ន្ឋលូបង្ហូររំដោះទឹកស្អាត ទឹកកខ្វក់ ប្រព័ន្ឋអគ្គីសនី ប្រព័ន្ឋបណ្តាញទឹកស្អាត និងបណ្តាញទូរគមនាគមន៍នានា ត្រូវបានជួបប្រទះភាពរអាក់រអួល ដែលជាការរំខានដល់អ្នកប្រើប្រាស់ ជាពិសេសបណ្តាញខ្សែកាប ខ្សែអ៊ិនធឺណែតផ្សេងៗ ក៏ជួបបញ្ហាដែរ។ ទោះជាយ៉ាងណាគេសង្ឃឹមថា ក្រោយពីជួសជុលកែលំអនូវផ្លូវទាំង៣៨ខ្សែនេះរួច បណ្តាញទាំងអស់នេះនឹងលែងចោទជាបញ្ហាទៀតឡើយ។ ផ្ទុយទៅវិញនឹងជួយរួមចំណែកតាមគម្រោងផែនការទីក្រុងសៀមរាប ធ្វើឱ្យស្អាត នឹងក្លាយជាទីក្រុងឆ្លាតវៃទៀតផង។ ជាមួយនឹងនោះប្រព័ន្ឋអ៊ិនធឺណែត ពិតជាតម្រូវការដ៏ចាំបាច់របស់ភ្ញៀវទេសចរណ៍ ក្រុមហ៊ុន សហគ្រាសមនិងប្រជាពលរដ្ឋអ្នកប្រើប្រាសផងដែរ។ នេះបើតាមការឱ្យដឹងពី លោក សុខ សីហា ប្រធានមន្ទីរប្រៃសណីយ៍ និងទូរគមនាគមន៍ ខេត្ដសៀមរាប នៅព្រឹកថ្ងៃទី១៨ ខែឧសភាឆ្នាំ២០២១ ។
លោក សុខ សីហា បន្តថា បច្ចុប្បន្ននេះបណ្តាញទូរគមនាគមន៍ក្នុងខេត្ត និងក្រុមការងារពាក់ព័ន្ធរួមមាន អង្គភាពអគ្គិសនី រដ្ឋាករស្វយ័តទឹកស្អាត និងក្រុមការងារសាងសង់ផ្លូវ ៣៨ខ្សែក្នុងក្រុងសៀមរាប បានសហការគ្នាយ៉ាងមមាញឹកតបណ្ដាញមួយចំនួនក្នុងនោះបណ្តាញបំពង់ផ្លូវខ្សែកាប បណ្តាញខ្សែកាបអុបទិកទាំងអស់ នឹងដាក់ចូលក្នុងបំពង់កប់ក្រោមដីនៅតាមផ្លូវសំខាន់ៗ មួយចំនួន ដែលការងារនេះយើងនឹងបន្ដអនុវត្ដកាត់ទំលាក់ខ្សែពីលើអាកាស ទៅដាក់ក្នុងបំពង់កប់ក្រោមដីនៅតាមផ្លូវសំខាន់ៗទាំងនោះ ឱ្យសម្រេចរួចរាល់នៅឆ្នាំ២០២៣ខាងមុខ ស្របតាមគម្រោងអភិវឌ្ឍន៍ហេដ្ឋារចនាសម្ព័ន្ធផ្លូវ៣៨ខ្សែ ដែលជាផ្លូវកំពុងកែលម្អនៅក្នុងក្រុងសៀមរាប ដើម្បីឱ្យមានសោភ័ណ្ណភាពមនិងសុវត្ថិភាព ព្រមទាំងកាត់បន្ថយហានិភ័យនានា ក្នុងការរក្សាបានសណ្ដាប់ធ្នាប់សាធារណ:ល្អ ស្របតាមទីក្រុងទេសចរណ៍ប្រវត្តិសាស្រ្ត នៃទឹកដីអង្គរ។
លោក សុខ សីហា បានឱ្យដឹងទៀតថា នៅក្នុងខេត្ដសៀមរាប មានក្រុមហ៊ុនអ៊ិនធឺណែតចំនួន១១ក្រុមហ៊ុន ដោយក្រុមហ៊ុនដែលបានទទួលអាជ្ញាប័ណ្ណជីកកប់បំពង់កាបទូរគមនាគមន៍ក្រោមដីចំនួន២ក្រុមហ៊ុន រួមមាន ទូរគមនាគមន៍ កម្ពុជា TC របស់រដ្ឋ និងក្រុមហ៊ុន (ខេមបូឌា)ហ្វីបើអុបទិកខមញូនីខេសិនណេតវើកCambodia Fiber Optic Communication Network (CFOCN )។ លោកប្រធានមន្ទីររូបនេះទទួលស្គាល់ថាពិតជាមានការរអាក់រអួលសម្រាប់អតិថិជនដែលប្រើប្រាស់ប្រព័ន្ឋអ៊ិនធឺណែត និងបណ្ដាញទូរទស្សន៍ខ្សែកាបជាដើម ខណ:ដែលការជួសជូលកែលំអផ្លូវទាំង៣៨ខ្សែក្នុងក្រុងសៀមរាបមិនទាន់រួចរាល់ តែយើងរំពឹងថា ក្រោយពីហេដ្ឋារចនាសម្ព័ន្ឋទាំងនេះរៀបរយល្អហើយ បណ្តាញទូរគមនាគមន៍ទាំងអស់នៅក្នុងក្រុងសៀមរាបនឹងលែងចោទជាបញ្ហាទៀតហើយ ហេតុនេះសូមអំពាវនាវដល់ប្រជាពលរដ្ឋឱ្យមានការយោគយល់ ចំពោះផលប៉ះពាល់នៅពេលអ្នកជំនាញជីកកាយដីដាក់ខ្សែកាបអ៊ុបទិកនៅខាងមុខលំនៅឋានរបស់ពួកគាត់ និងភាពរអាក់រអួលខ្លះពីការដាច់ប្រពន្ធ័នេះជាដើម៕
អត្ថបទ និងរូបភាព៖ យូ វង្ស
កែសម្រួល៖ លីវ សុខុន
