នៅរសៀលថ្ងៃទី១៧ ខែឧសភា ឆ្នាំ២០២១ ព្រះគ្រូ ឧត្តមសិលមុនី ឥស្សរត្ថេរ យឹម ហន ព្រះគ្រូសូត្រឆ្វេង វត្តពោធិបន្ទាយជ័យ និងព្រះវិភត្តិមុនីញាណ ហ៊ាក់ គឹមហ៊ាក់(ហំ)ព្រះរាជាគណ:ថ្នាក់កត្តិយស នៃព្រះរាជាណាចក្រកម្ពុជា និងជាព្រះចៅអធិការវត្តអារញ្ញសាគរ បាននាំយកអង្ករ និងសម្ភារ:ផ្ទះបាយ ផ្តល់តាមរយ:ចៅសង្កាត់សៀមរាប ក្រុងសៀមរាប ខេត្តសៀមរាប សម្រាប់ជួយគ្រួសារដែលងាយរងគ្រោះដូចជាចាស់ជរាគ្មានទីពឹង, ជនមានពិការភាព, ស្ត្រីម៉េម៉ាយមានជំងឹនិងកូនច្រើន ដែលពួកគាត់ជួបបញ្ហាក្នុងជីវភាពប្រចាំថ្ងៃ ចំនួន១០០គ្រួសារ ដែលរស់នៅក្នុងភូមិភ្នំក្រោម សង្កាត់សៀមរាប ដោយក្នុងមួយគ្រួសារៗទទួលបាន÷ អង្ករ ៨គ.ក្រ និងសម្ភារ:ផ្ទះបាយមានដូចជា ខ្ទះឆា ចានស្លាបព្រា ធុងទឹកកក បំពង់ទឹកក្តៅ។
សូមជម្រាបថា នេះជាលើកទី២ ដែលជាទេយ្យទានរបស់ ព្រះគ្រូ ឧត្តមសិលមុនី ឥស្សរត្ថេរ យឹម ហន ព្រះគ្រូសូត្រឆ្វេង វត្តពោធិបន្ទាយជ័យ ដែលបានឧបត្ថម្ភប្រជាពលរដ្ឋ ក្នុងអំឡុងពេលប្រទេសកម្ពុជាជួបវិបត្តិ នៃជំងឺឆ្លងកូវីដ-១៩។ បន្ថែមពីនេះ ព្រះអង្គតែងតែសហការជាមួយចៅអធិការវត្តជាច្រើនទៀត ក្នុងខេត្តសៀមរាប ដើម្បីស្វែងរកកៀងគរការឧបត្ថម្ភពីសប្បុរសជនជិតឆ្ងាយសម្រាប់ផ្តល់ជូនគ្រួសារ ដែលងាយរងគ្រោះ និងជួបបញ្ហាលើជីវភាពប្រចាំថ្ងៃ។
ក្នុងនាមអាជ្ញាធរមូលដ្ឋាន លោក ម៉ៃ សាមេត ចៅសង្កាត់សៀមរាប បានចាត់ទុកការផ្តល់ជូននូវសម្ភារសម្រាប់គ្រួសាទីទ័លក្រនាពេលនេះ ជាគុណបំណាច់ដ៏ធំធេងណាស់ ដែលអាចជួយសម្រាលនូវភាពខ្វះខាតបានមួយរយ:ពេលដែរ ស្របពេលដែលកម្ពុជាក៏ដូចជាពិភពលោកទាំងមូលកំពុងប្រឈមទៅនឹងវិបត្តិ នៃជំងឹឆ្លងកូវីដ-១៩។ មិនតែប៉ុណ្ណោះ បណ្តាលបាត់បង់អាយុជីវិតមនុស្សរាប់លាននាក់ ខាតបង់ផ្នែកសេដ្ឋកិច្ច ជាពិសេសបងប្អូនប្រជាពលរដ្ឋរស់នៅខេត្តសៀមរាប បានផ្អាកឬក៏បិទអាជីវកម្មជាបន្តបន្ទាប់ ការផ្អាកពីការងារ និងបាត់បង់មុខរបរជាច្រើន ដោយសារបងប្អូននៅខេត្តសៀមរាបភាគច្រើនប្រកបរបរ និងធ្វើការងារពឹងផ្អែកទៅលើវិស័យទេសចរណ៍ជាអាទិភាព។
លោក ចៅសង្កាត់ ចាត់ទុកការផ្តល់អំណោយពេលនេះ គឺបង្ហាញនូវការជួយគ្នាទៅវិញទៅមកនិងក្តីស្រឡាញ់រាប់អាន និងមេត្តាករុណា ដល់គ្នាទៅវិញទៅមកក្នុងកាល:ទេស: ដែលយើងទាំងអស់គ្នាកំពុងជួបនូវបញ្ហាប្រឈមនឹងជំងឺកូវីដ-១៩។ លោក ម៉ៃ សាមេត បានអំពាវនាវដល់បងប្អូនប្រជាពលរដ្ឋទាំងអស់ ត្រូវយកចិត្តទុកដាក់ថែទាំសុខភាព ដូចជាការបរិភោគត្រូវរក្សាអនាម័យ ដើម្បីចៀសវាងជំងឺរាគរុសផ្សេងៗ ជាពិសេសនេះ កុំភ្លេចការពារកុំឱ្យឆ្លងជំងឺកូវីដ-១៩ ដោយទាំងអស់គ្នាត្រូវអនុវត្តបានម៉ត់ចត់ការណែនាំរបស់ក្រសួងសុខាភិបាល និងវិធានការ ៣កុំ និង៣ការពាររបស់សម្តេចតេជោ សែន នាយករដ្ឋមន្ត្រី៕
អត្ថបទ និងរូបភាព ៖ យូ វង្ស
កែសម្រួល៖ លីវ សុខុន
