នាព្រឹកថ្ងៃទី១៧ ខែឧសភា ឆ្នាំ២០២១នេះ នីសាលប្រជុំសាលាខេត្តសៀមរាប គណៈកម្មការចម្រុះរវាងរដ្ឋបាលខេត្តសៀមរាប និងអាជ្ញាធរជាតិអប្សរា បានបើកកិច្ចប្រជុំពិភាក្សាមួយ ដែលផ្តោតជាសំខាន់ ទៅលើការបំពេញតួនាទី ភារកិច្ច របស់គណៈកម្មការចម្រុះ ដើម្បីសម្របសម្រួលការប្រើប្រាស់ដីធ្លី ការទប់ស្កាត់សំណង់ខុសច្បាប់ និងរៀបចំសណ្តាប់ធ្នាប់នៅតំបន់រមណីយដ្ខានអង្គរ ដោយឈរលើមូលដ្ឋាននៃការអនុវត្តសេចក្តីសំរេចរបស់រាជរដ្ឋាភិបាលកម្ពុជា លេខ ៧០ សសរ ចុះថ្ងៃទី១៦ ខែវិច្ឆិកា ឆ្នាំ២០០៤ ស្តីពីការកំណត់បទដ្ឋានប្រើប្រាស់ដីធ្លីនៅតំបន់១ និងតំបន់២ ក្នុងរមណីយដ្ឋានសៀមរាបអង្គរ ។
កិច្ចប្រជុំនេះ បានប្រព្រឹត្តទៅក្រោមអធិបតីភាព ឯកឧត្ដម ទៀ សីហា អភិបាល នៃគណៈអភិបាលខេត្តសៀមរាប និង ឯកឧត្តម ហង់ ពៅ អគ្គនាយក នៃអគ្គនាយកដ្ឋានអាជ្ញាធរជាតិអប្សរា ដោយមានការចូលរួមពីសំណាក់ឯកឧត្តម លោក លោកស្រី ជាអភិបាលរងខេត្ត , អគ្គនាយករងនៃអគ្គនាយកដ្ឋានអាជ្ញាធរជាតិអប្សរា , ថ្នាក់ដឹកនាំនៃមន្ទីរ អង្គភាពពាក់ព័ន្ធមួយចំនួនក្នុងខេត្ត និង អាជ្ញាធរមូលដ្ឋាន ដែលមានភូមិសាស្រ្តជាប់ក្នុងដែនដីនៃរមណីយដ្ឋានអង្គរ ។
ឯកឧត្តម ទៀ សីហា មានប្រសាសន៍ថា កិច្ចប្រជុំរបស់គណៈកម្មការចម្រុះមួយនេះ គឺជាការជួបជុំពិភាក្សាពិសេសមួយ ហើយក៏មិនមែនជាលើកដំបូងនោះដែរ បន្ទាប់ពីសមាសភាពរបស់គណកម្មការមួយនេះ ត្រូវបានសម្រេចបង្កើតឡើង កាលពីដើមខែកក្កដា ឆ្នាំ២០២០កន្លងទៅ ដោយផ្តោតជាសំខាន់ទៅលើដែនកំណត់ សម្រាប់ការអនុវត្តតួនាទី-ភារកិច្ច ក្នុងក្របខ័ណ្ឌនៃកិច្ចសហការគ្នា ដើម្បីស្វែងរកគន្លឹះដោះស្រាយបញ្ហាប្រឈមនានា ពាក់ព័ន្ធនឹងការប្រើប្រាស់ដីធ្លី ការសាងសង់សំណង់របស់ប្រជាពលរដ្ឋ ដែលបានតាំងទីលំនៅ និងរស់នៅតាំងពីយូរណាស់មកហើយ គឺមុនឆ្នាំ២០០៤ក្នុងតំបន់រមណីដ្ឋានអង្គរ និងការកំណត់លិខិតបទដ្ឋានគតិយុត្តិជាធរមាន ។
ព័ត៌មានជាតិ ថ្មីៗ
គួររំលឹកថា កិច្ចប្រជុំបានពិភាក្សាធ្វើឲ្យប្រសើរឡើង ការធ្វើសមាហរណកម្មជាមួយគ្នា ក្នុងការអនុវត្តគម្រោងនានារបស់អាជ្ញាធរមូលដ្ឋាន និងអាជ្ញាធរជាតិអប្សរា ហើយក៏ជាការកែលម្អរួមគ្នាផងដែរ គឺតម្រូវឲ្យមានកិច្ចពិភាក្សាគ្នាជាចាំបាច់ សម្រាប់កិច្ចសហប្រតិបត្តិការ និងកំណត់ព្រំដែនតួនាទីភារកិច្ចរបស់អាជ្ញាធរខេត្ត និងអាជ្ញាធរជាតិអប្សរា ការកំណត់ជនបង្គោល ដើម្បីសហការអនុវត្តការងារ ឲ្យមានប្រសិទ្ធភាព៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
