ឯកឧត្តម ឡុង កុសល អគ្គនាយករង និងជាអ្នកនាំពាក្យ នៃអាជ្ញាធរជាតិអប្សរា បានឲ្យដឹងថា សត្វស្លាបចំនួន៣ប្រភេទ មានចំនួន ១១ក្បាល រួមមាន សត្វក្ងោក(Peafowl) ចំនួន៥ក្បាល , សត្វកេងកងធំ(Great Hornbill) ចំនួន៣ក្បាល និង សត្វព្វាំង(Wreathed Hornbill) ចំនួន៣ក្បាល ដែលបានដឹកជញ្ជូនពីភ្នំពេញមកដល់ព្រៃធម្មជាតិរមណីយដ្ឋានអង្គរ កាលពីថ្ងៃទី១៣ ខែឧសភា ឆ្នាំ២០២១កន្លងទៅនេះ នឹងត្រូវព្រលែងចេញពីទ្រុងចូលក្នុងព្រៃធម្មជាតិនៃឧទ្យានអង្គរនៅពេលឆាប់ៗខាងមុខនេះ ក្រោមកិច្ចសហការគ្នារវាងអាជ្ញាធរជាតិអប្សរា រដ្ឋបាលព្រៃឈើភ្នំពេញ និងអង្គការ Wildlife Alliance ។
ឯកឧត្តម ឡុង កុសល បានបញ្ជាក់ទៀតថា កន្លងមកគម្រោងដោះលែងសត្វព្រៃក្នុងឧទ្យានអង្គរ ទទួលបានជោគជ័យក្នុងការដោះលែងសត្វព្រៃជាច្រើនប្រភេទចូលក្នុងព្រៃធម្មជាតិនៃឧទ្យានអង្គរ មានដូចជា សត្វទោចមកុដ(Pileated gibbon) ចំនួន១១ក្បាល (កើតកូនបានចំនួន៤ក្បាល) , សត្វឈ្លូស(Red muntjac) ចំនួន៤ក្បាល , សត្វស្វាព្រាម(Silvered langurs) ចំនួន១២ក្បាល , សត្វសំពោចក្រអូប(Common palm civets) ចំនួន៥ក្បាល , សត្វភេខ្លួនរលោង(Smooth-coated otter) ចំនួន៤ក្បាល(កើតកូនបានចំនួន២ក្បាល) , សត្វឆ្មារដាវ(Leopard Cat) ចំនួន២ក្បាល , សត្វកេងកងតូច(Oriental Pied Hornbill) ចំនួន២ក្បាល និងសត្វផ្សេងៗមួយចំនួនទៀត ដែលមកដល់សព្វថ្ងៃនេះ សត្វទាំងអស់នេះនៅតែមានវត្តមាននៅទីនោះនៅឡើយ ក្រោមការយកចិត្តទុកដាក់តាមដាន និងថែទាំជាប្រចាំពីក្រុមការងារ។
ក្នុងឱកាសនេះដែរ ឯកឧត្តម ឡុង កុសល បានធ្វើការអំពាវនាវដល់សាធារណជន ភ្ញៀវជាតិ អន្តរជាតិ ជាពិសេសប្រជាពលរដ្ឋដែលរស់នៅតំបន់នោះ ចូលរួមថែរក្សាសត្វព្រៃទាំងនោះទាំងអស់គ្នា ជៀសវាងពេលប្រទះឃើញមានបំណងមិនល្អ និងមេត្តាកុំផ្តល់ចំណីឲ្យសត្វទាំងនោះ ៕
អត្ថបទ និង រូបថត ៖ ជា ស្រស់ , ឈិត សាវី
កែសម្រួលអត្ថបទ ៖ លោក លីវ សាន្ត
