នៅរសៀលថ្ងៃទី១៥ខែឧសភាឆ្នាំ២០២១ សមាគមមរតកព្រះពុទ្ឋសាសនានិងសង្គម ដឹកនាំដោយព្រះតេជគុណ រតនឃោសកោ សោម សេរីរិទ្ឋី នាយកសមាគម ព្រមទាំងសហការីសមាគម និងព្រះចៅអធិការវត្តប្រាសាទលលៃស្រុកប្រាសាទបាគង និងព្រះគ្រូសូត្រស្តាំវត្តពោធិបន្ទាយជ័យក្រុងសៀមរាប បាននិមន្ដ និង អញ្ជើញចុះទៅមណ្ឌលចត្តាឡីស័កសាលាសិក្សាទឹកលិចស្ថិតនៅក្នុងឃុំបឹងមាលាស្រុកស្វាយលើខេត្តសៀមរាប ដើម្បីសួរសុខទុក្ខ និងចែករំលែកស្បៀងអាហារដល់អ្នកកំពុងធ្វើចត្តាឡីស័កជាង២២គ្រួសារនៅទីនោះ គិតចាប់ពីកើតមានព្រឹត្តិការណ៍សហគមន៍២០កុម្ភៈ២០២១ មក ប្រជាពលរដ្ឋដែលត្រឡប់មកពីខេត្តនានាក្នុងប្រទេសកម្ពុជា មកធ្វើចត្តាឡីស័កនៅក្នុងឃុំនេះសរុបចំនួន១២៥នាក់ ។ខណៈដែលប្រជាពុទ្ឋបរិស័ទជិតឆ្ងាយមិនបានជួបជុំប្រារព្ឋពិធីផ្សេងៗតាមប្រពៃណីទំនៀមទំលាប់ ដោយសារខ្លាចឆ្លងវីរុសកូវីដ១៩ និងដោយការអនុវត្តតាមការណែនាំរបស់រាជរដ្ឋាភិបាល ក្រសួងសុខាភិបាល និងគណៈសង្ឃនាយក នៃព្រះរាជាណាចក្រកម្ពុជា អំពីវិធានការ ៣ការពារ ៣កុំក្នុងការបង្ការទប់ស្កាត់ការរីករាលដាលជំងឺកូវីដ១៩ទៅក្នុងគ្រួសារនិងសហគមន៍។
សួរសុខទុក្ខនិងសំណេះសំណាល នាឱកាសនោះ ព្រះតេជគុណ រតនឃោសកោ សោម សេរីរិទ្ឋី នាយកសមាគមមានសង្ឃដីកាថា៖ ដោយសារតែមេរោកូវីដ-១៩ បានបណ្តាលឱ្យប៉ះពាល់ជីវភាពប្រជាពុទ្ធបរិស័ទទូទៅ ដូច្នេះហើយបានជាសមាគម បានត្រៀមស្បៀងអាហារខ្លះៗតាមលទ្ធភាពសម្រាប់ជួយដល់បងប្អូនប្រជាពុទ្ឋបរិស័ទដែលជួបការលំបាកក្នុងជីវភាពប្រចាំថ្ងៃ បង្ហាញពីក្តីព្រួយបារម្ភ ចែករំលែកនិងជួយទុក្ខធុរៈគ្នាក្នុងគ្រាលំបាក ព្រោះ ថា ការលំបាកនិងសេចក្តីទុក្ខរបស់ញាតិញោមក៍ជាការលំបាកនិងសេចក្តីទុក្ខរបស់ព្រះសង្ឃដែរ។ជាងនេះទៅទៀតក៍ជាឆន្ទៈចូលរួមជាមួយរាជរដ្ឋាភិបាលនិងអាជ្ញាធរមូលដ្ឋានក្នុងការជួយបន្ឋូរបន្ថយខ្លះៗនូវតម្រូវការចាំចាច់របស់បងប្អូនកំពុងធ្វើចត្តាឡីស័កមិនអាចចេញទៅណាបាន ដោយអនុវត្តទៅតាមការណែនាំរបស់មន្ត្រីសុខាភិបាលនិងអាជ្ញាធរមានសមត្ថកិច្ច។ព្រះអង្គបន្តថា៖សម្ភារអំណោយជាគ្រឿងឧបភោគបរិភោគបន្តិចបន្តួចនេះ បានមកពីការចូលរួមរបស់សមាជិក្នុងសមាគម និងមួយអន្លរបានមកពីការបរិច្ចាកពីព្រះយសមុនីវង្សី រិត ស៊ីធីម ព្រះរាជាគណៈថ្នាក់កិត្តិយស និងជាព្រះគ្រូសូត្រស្តាំវត្តពោធិ៍បន្ទាយជ័យ ក្រុងសៀមរាប ព្រះសមថមុនី មុត្ត វិបុល ព្រះរាជាគណៈថ្នាក់កិត្តិយស និងជាព្រះចៅអធិការវត្តប្រាសាទលលៃ ស្រុកប្រាសាទបាគង ដើម្បីជូនដល់អាជ្ញាធរមូលដ្ឋានយកទៅចែករំលែកនិងជួយទុក្ខធុរៈគ្នាក្នុងគ្រាលំបាក ព្រោះព្រះអង្គយល់ឃើញថា ការលំបាកនិងសេចក្តីទុក្ខរស់ញាតិញោមក៍ជាការលំបាករបស់ព្រះសង្ឃដែរ។សម្ភារៈរួមមាន ត្រីខ ១០០ កំប៉ុង ទឹកត្រី៣០ដប ទឹកស៊ីអ៊ីវ៣០ដប មី៣០កែស ទឹកបរិសុទ្ឋ២០យួរ អាល់កុល១០លីត្រ ម៉ាស៥ប្រអប់ផងដែរ សរុបថវិកាចំណាយជាង១លានរៀល។
ព្រះអង្គ ក៏បានណែនាំឱ្យអាជ្ញាធរមូលដ្ឋានជួយពន្យល់ណែនាំដល់អ្នកកំពុងធ្វើចត្តាឡីស័កក៍ដូចជាបងប្អូនប្រជាពលរដ្ឋក្នុងមូលដ្ឋានទាំងអស់ ត្រូវប្រុងប្រយ័ត្នឱ្យបានខ្ពស់ ជាពិសេសត្រូវអនុវត្តឱ្យបានជាប្រចាំនូវវិធានការ ៣ការពារនិង៣កុំរបស់សម្តេចតេជោ សែន នាយករដ្ឋមន្ត្រីនិងសេចក្តីណែនាំនិងអំពាវនាវរបស់ក្រសួងសុខាភិបាលក្នុងការទប់ស្កាត់ ការពារកុំឱ្យឆ្លងមេរោគកូវីដ-១៩ចូលទៅក្នុងសហគមន៍បន្តទៀត ព្រោះមេរោគនេះវាកាចសារហាវនិងធ្វើឱ្យមនុស្សរាប់ម៉ឺននាក់បានស្លាប់នៅទូទាំងពិភពលោក នេះជាពេលវេលាដែលយើងត្រូវរួមគ្នា ទប់ស្កាត់ និងកម្ចាត់ជំងឺនេះ យើងមិនត្រូវមើលស្រាលឬធ្វេសប្រហែសនិងប្រមាថជាដាច់ខាត វិធានការបីការពារនិងបីកុំរបស់សម្តេចតេជោ សែន នាយករដ្ឋមន្ត្រី គឺ “៣ការពារ” ទី១ដោយការពាក់ម៉ាស់ ២/លាងសំអាតដៃឱ្យបានញឹកញាប់ ៣)រក្សា គម្លាតសុវត្ថិភាពសង្គមបុគ្គលម្នាក់ទៅម្នាក់ឱ្យបានយ៉ាងតិចមួយម៉ែត្រកន្លះឡើងទៅឱ្យបានគ្រប់ៗគ្នា និង”៣កុំ” គឺកុំទី១កុំចូលទៅទីកន្លែងបិទជិតខ្យល់ចេញចូលនិងប្រើម៉ាស៊ីនត្រជាក់ច្រើន កុំទី២ កុំទៅទីដែលមានមនុស្សច្រើនកុះករ និងកុំទី៣ កុំប៉ះពាល់គ្នា ជួបជុំគ្នាច្រើនជាដើម ។
អត្ថបទ និងរូបភាព៖ លោក យូ វង្ស
