នៅព្រឹកថ្ងៃទី១៣ ខែឧសភា ឆ្នាំ២០២១ ឯកឧត្តម គុជ លីណា អនុប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប និងជាតំណាងឯកឧត្តម ទៀ សីហា ប្រធានគណៈកម្មាធិការសាខា និងសហការី រួមជាមួយលោក ង៉ាន់ ភិរុណ អភិបាលរងខេត្តសៀមរាប បាននាំយកអំណោយមនុស្សធម៌របស់សាខាកាកបាទក្រហមកម្ពុជាខេត្ត ជូនប្រជាពលរដ្ឋចំនួន ១៦គ្រួសារ នៅឃុំរុនតាឯក ស្រុកបន្ទាយស្រី ដែលលំនៅដ្ឋានរបស់ពួកគាត់បានរងគ្រោះដោយខ្យលកន្ត្រាក់ បណ្ដាលឲ្យរលំផ្ទះ៣ខ្នង និងរបើកដំបូល១៣ខ្នង ដោយគ្រួសាររលំផ្ទះក្នុងមួយគ្រួសារៗទទួលបាន៖ អង្ករ៣០គីឡូក្រាម ,ស័ង្កសី១៦សន្លឹក ,មី១កេស ,ត្រីខ១យួរ ,ទឹកស៊ីអ៊ីវ១យួរ ,មុង១ ,ភួយ១ ,សារុង១ ,ក្រមា១ ,អាវយឺត៣ និងថវិកា២សែនរៀល។ ចំពោះគ្រួសាររបើកដំបូលក្នុងមួយគ្រួសារៗទទួលបាន៖ អង្ករ៣០គីឡូក្រាម ,ស័ង្កសី១០សន្លឹក ,ត្រីខ១យួរ ,ទឹកស៊ីអ៊ីវ១យួរ ,មុង១ ,ភួយ១ ,សារុង១ ,ក្រមា១ ,អាវយឺត៣ និងថវិកា៨ម៉ឺនរៀល។
មានប្រសាសន៍នាឱកាសនោះ ឯកឧត្តម គុជ លីណា បានពាំនាំនូវការផ្ដាំផ្ញើសួរសុខទុក្ខពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក៏ដូចជាឯកឧត្តម ទៀ សីហា ប្រធានគណៈកម្មាធិការសាខា ដែលតែងតែយកចិត្តទុកដាក់គិតគូរចំពោះសុខទុក្ខប្រជាពលរដ្ឋគ្រប់រូប មិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ។ ឯកឧត្តមបានសំដែងនូវការសោកស្ដាចំពោះការខូចខាតផ្ទះសំបែង ទ្រព្យសម្បត្តិដែលនេះ ជាគ្រោះមហន្តរាយដោយធម្មជាតិ គ្មាននរណាម្នាក់ចង់ជួបប្រទះឡើយ។ ចំពោះអំណោយមនុស្សធម៌ដែលបាននាំយកមកចែកជូនបងប្អូននាពេលនេះ មិនសមល្មមនឹងការខាតបង់របស់បងប្អូន តែក៏វាពិតជាអាចជួយសម្រាលទុក្ខបាករបស់បងប្អូនបានមួយកម្រិត ហើយក៏ជាការបង្ហាញនូវការយកចិត្តទុកដាក់ចំពោះប្រជាពលរដ្ឋគ្រប់រូបពីសំណាក់ថ្នាក់ដឹកនាំ ពិសេសគឺកាកបាទក្រហមកម្ពុជា ដែលមានសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ដូចដែលបានលើកឡើងថា “កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា -មិនទុកនរណាម្នាក់ចោល” និង “ទីណាមានទុក្ខលំបាក ទីនោះមានកាកបាទក្រហមកម្ពុជា” ។
ឯកឧត្តមអនុប្រធានគណៈកម្មាធិការសាខា ក៏បានអំពាវនាវសូមឱ្យបងប្អូនប្រជាពលរដ្ឋទាំងអស់ ត្រូវតែចេះការពារខ្លួនពីជំងឺកូវីដ-១៩ ជាពិសេសត្រូវអនុវត្តឱ្យបានខ្ជាប់ខ្ជួន តាមវិធានការរបស់រាជរដ្ឋាភិបាល គឺ ៣ការពារ និង៣កុំ រួមទាំងវិធានការផ្សេងៗទៀតរបស់ក្រសួងសុខាភិបាល ដើម្បីរួមគ្នាទប់ស្កាត់ការឆ្លងរាលដាលជំងឺកូវីដ-១៩នេះ កុំឲ្យមានការឆ្លងចូលក្នុងសហគមន៍របស់ខ្លួន ៕
អត្ថបទ និង រូបភាព៖ ខេង ឧត្តម
កែសម្រួល៖ អ៊ុន ណារាជ្យ
