ឯកឧត្ដម ឡុង កុសល អគ្គនាយករង និងជាអ្នកនាំពាក្យអាជ្ញាធរជាតិអប្សរា បានឲ្យដឹងនៅថ្ងៃទី០៨ខែមិថុនា នេះថា ទោះស្ថិតនៅក្នុងបរិបទនៃជំងឺកូវីដ-១៩ ប៉ុន្តែអាជ្ញាធរជាតិអប្សរា បាននឹងកំពុងមមាញឹកក្នុងការថែរក្សានូវបរិស្ថានជុំវិញតំបន់អង្គរ ជាពិសេសការតាមដាន និងតួតពិនិត្យជាប្រចាំទៅលើភ្ញៀវទេសចរ ដែលចូលមកទស្សនាតំបន់រមណីយដ្ឋានអង្គរ ព្រមទាំងប្រាសាទនានា ដោយបច្ចុប្បន្នយើងសង្គេតឃើញថា មានភ្ញៀវទេសចរជាតិ និងអន្តរជាតិកំពុងតែមានវត្តមានចូលមកទស្សនាកំសាន្តជាបន្តបន្ទាប់ហើយ ក្រោយពេលបើកអោយចូលទស្សនាអស់រយ:ពេលជាង១ខែប៉ុណ្ណោះ ដែលភ្ញៀវភាគច្រើនជាភ្ញៀវជាតិដែលមកពីបណ្តាខេត្តផ្សេងៗ។ ក្នុងនោះដែរបើតាមការស្រង់ទិន្នន័យ គិតត្រឹមថ្ងៃទី០១ ខែឧសភា មកទល់ព្រឹកថ្ងៃទី០៨ ខែមិថុនា ឆ្នាំ២០២១នេះ នៅតាមបណ្តាប្រាសាទទាំងអស់មានភ្ញៀវចូលមកទស្សនាសរុប ៧៩ ,១៨៧នាក់ ក្នុងនោះភ្ញៀវជាតិ ចំនួន៧៥,៣៤៣នាក់ ភ្ញៀវបរទេសចំនួន ៣,១៣៧នាក់ និងព្រះសង្ឃចំនួន៦១៦អង្គ។
ឯកឧត្តម ឡុង កុសល បានឲ្យដឹងទៀតថា ចំនួនកើនឡើងគួរឲ្យគត់សម្គាល់នេះដែរ ក្រុមការងារក៏នៅតែបន្តតាមដាន និងត្រួតពិនិត្យជាប្រចាំចំពោះភ្ញៀងទេសចរដែលបានចូលមកទស្សនានៅតាមបណ្ដាប្រសាសទទាំងអស់ ដោយមន្ត្រីអាជ្ញាធរជាតិអប្សរាដែលប្រចាំការតាមច្រកត្រួតពិនិត្យ នៅតែបន្តវិធានការការពាររបស់ក្រសួងសុខាភិបាល ហើយចំពោះករណីភ្ញៀវមិនព្រមអនុវត្តតាមដូចជាការបាញ់វាស់កម្តៅ ពាក់ម៉ាស់ បាញ់អាកុលជាដើមនោះ គឺមិនអនុញ្ញាតិអោយចូលជាដាច់ខាត។
បើតាមលោក កង កំសាន្ត ដែលជាភ្ញៀវទេសចរជាតិមួយរូបមកពីខេត្តស្វាយរៀង បានឲ្យដឹងថា គាត់មកដើរលេងលក្ខណ:គ្រួសារ គឺពួកគាត់បានមកលេងនៅខេត្តសៀមរាបដែលជាទឹកដីប្រវត្តិសាស្ត្រ ជាលើកទី៣ហើយៗ លើកនេះលោកឃើញថា នៅក្នុងខេត្តអាជ្ញាធរមានការរៀបចំកែលម្អរចនាសម្ព័ន្ធផ្លូវជាច្រើនខ្សែសម្រាប់ទទួលភ្ញៀវទេសចរនាពេលខាងមុខ ជាពិសេស គឺអាជ្ញាធរជាតិអប្សរាបានរៀបចំតំបន់រមណីយដ្ឋានអង្គរ និងប្រាសាទនានា ដើម្បីត្រៀបចាំទទួលភ្ញៀវមកទស្សនាបាននឹងទទួលបាននៅទេសភាពប្លែកៗល្អៗជាងមុន។
ព័ត៌មានជាតិ ថ្មីៗ
គួររំលឹកផងដែរថា អាជ្ញាធរជាតិអប្សរា និងគ្រឹះស្ថានអង្គរ បានអនុលោមតាមសេចក្តីសម្រេចរាជរដ្ឋាភិបាលលេខ ៥៣ សសរ ចុះថ្ងៃទី២៥ ខែមេសា ឆ្នាំ២០២១ ស្តីពីការបញ្ចប់ការហាមឃាត់ការធ្វើដំណើរ និងបញ្ចប់ការបិទរមណីយដ្ឋានទេសចរណ៍ នៅទូទាំងប្រទេស អាជ្ញាធរជាតិអប្សរា និងគ្រឹះស្ថានអង្គរ នឹងបើកការចូលទស្សនាប្រាសាទនានា និងលក់សំបុត្រចូលទស្សនា ក្នុងរមណីយដ្ឋានអង្គរជាធម្មតាឡើងវិញ ចាប់ពីថ្ងៃទី២៥ ខែមេសា ឆ្នាំ២០២១កន្លងមក៕
អត្ថបទ និង រូបភាព៖ លោក ស៊ាន សុផាត
កែសម្រួលអត្ថបទ៖ លោក អ៊ុន ណារាជ្យ
