តាមរយៈនៃរូបថតរបស់នាយកដ្ឋានសណ្តាប់ធ្នាប់ នឹងសំណេររបស់នាយកដ្ឋានផ្សព្វផ្សាយរបស់អាជ្ញាធរជាតិអប្សរា បានបង្ហាញអំពីសកម្មភាពនៃក្រុមការងារថែទាំ សម្អាតអនាម័យ-បរិស្ថាន ដើម្បីនិរន្តរភាពសម្រស់អង្គរ ហើយអ្វីដែលជាបំណងនៃការចេញបង្ហាញរូបថតនិងសំណេរទាំងនោះ គឺសំដៅទៅរកការអំពាវនាវ ស្វាគមន៍ជាថ្មីទៀតការចូលរួម ពីសំណាក់សាធារណជនទូទៅ និងភ្ញៀវទេសចរ!
រសៀលថ្ងៃ០៨ ខែមិថុនា ឆ្នាំ២០២១នេះ នាយកដ្ឋានផ្សព្វផ្សាយនៃអាជ្ញាធរជាតិអប្សរាបានឲ្យដឹងថា ការថែទាំ និងសម្អាតអនាម័យរបស់ក្រុមការងារសម្អាតប្រាសាទ បានធ្វើឱ្យតំបន់រមណីយដ្ឋានអង្គរ មានភាពស្រស់បំព្រងទាំងរដូវប្រាំង និងរដូវវស្សា ។ ជាការកត់សម្គាល់ក្នុងរយៈពេលកន្លងមកហើយ អ្វីដែលសំខាន់ដើម្បីនិរន្តរភាពអនាម័យបរិស្ថានស្អាតនៅក្នុងតំបន់នេះ គឺមិនអាចខ្វះបាននោះទេ ការចូលរួមរបស់ប្រជាពលរដ្ឋ។ ជារៀងរាល់ថ្ងៃក្រុមការងារថែទាំ សម្អាតអនាម័យ ពួកគាត់បានបែងចែកជាក្រុមៗ ធ្វើសកម្មភាពតាមមុខព្រួញគោលដៅដែលបានរៀបចំទុក រួមមានក្រុមបោសស្លឹកឈើ បោសដី ស្រោចស្មៅ កាត់រុក្ខជាតិក្នុងនិងក្រៅតំបន់ប្រាសាទ បារស្លែនិងរុក្ខជាតិក្នុងទឹកជាដើម។ សកម្មភាពទាំងនេះ មិនត្រឹមតែធ្វើឱ្យតំបន់ប្រាសាទមានសោភ័ណភាពស្រស់បំព្រងគ្រប់រដូវកាលប៉ុណ្ណោះទេ តែវាជាកិច្ចការអភិរក្សដែលអាជ្ញាធរជាតិអប្សរា បាននិងកំពុងធ្វើជាប្រចាំ។
នាយកដ្ឋានផ្សព្វផ្សាយនៃអជ្ញាធរជាតិអប្សរាបានសង្កត់ធ្ងន់លើសំណេររបស់ខ្លួនថា ច្បាស់ណាស់ កិច្ចការទាំងនេះមិនអាចខ្វះបានទេ ការចូលរួមពីសាធារណជន ក៏ដូចជាភ្ញៀវទេសចរផងដែរ ហើយយើងទាំងអស់គ្នាមានស្មារតីដូចគ្នា ក្នុងការធ្វើឱ្យបរិស្ថានក្នុងតំបន់រមណីយដ្ឋានអង្គរមានភាពស្រស់ស្អាតជានិច្ច ទាក់ទាញភ្ញៀវទេសចរ ពិសេសស័ក្ដិសមជាមួយគុណតម្លៃមិនអាចកាត់ថ្លៃបាន នៃរមណីយដ្ឋានអង្គរ៕
អត្ថបទ និង រូបថត ៖ លោក ងិន គឹមឡេង
