កាលពីម៉ោងប្រមាណ៣រសៀល ថ្ងៃទី១០ ខែមិថុនា ឆ្នាំ២០២១ មានករណីអគ្គីភ័យមួយ កើតឡើងក្នុងភូមិបន្ទាយចាស់ សង្កាត់ស្លក្រាម ក្រុងសៀមរាប បណ្ដាលឱ្យផ្ទះចំនួន ១ខ្នងខូចខាតទាំងស្រុង និងផ្ទះចំនួន ៣ខ្នងទៀត រងផលប៉ះពាល់ ប៉ុន្តែមិនបង្កឱ្យមានមនុស្សរងរបួស ឬបាត់បង់ជីវិតឡើយ។
តាមការឱ្យដឹងពី លោកវរសេនីយ៍ឯក ឌុត ខុន ស្នងការរងទទួលផែនបង្ការពន្លត់ និង សង្គ្រោះ នៃស្នងការដ្ឋាននគបាលខេត្តសៀមរាប បង្ហាញថា ករណីភ្លើងឆេះផ្ទះនេះ បង្កឡើងស្ត្រីឈ្មោះ បូ សុធាវី អាយុ៣៥ ឆ្នាំ មានទីលំនៅមិនពិតប្រាកដ និងមានបញ្ហាសតិមិនប្រក្រតី បានបង្កាត់ភ្លើងដាំបាយ នៅក្នុងបរិវេណដីទុកចោលមួយកន្លែង ដែលមានផ្ទះឈើមួយខ្នងទំហំ ៥ ម៉ែត្រ គុណនឹង ៥ ម៉ែត្រ ជាកម្មសិទ្ធរបស់លោក សេង ហួត អាយុ៦៣ឆ្នាំ មុខរបរលក់ម៉ូតូហុងដា ក្នុងក្រុងសៀមរាប។
លោកស្នងការរង បញ្ជាក់ថា ករណីអគ្គីភ័យនេះ មានការចូលរួមពន្លត់ ដោយប្រើប្រាស់ រថយន្តពន្លត់អគ្គីភ័យ របស់ស្នងការខេត្ត ចំនួន ២គ្រឿង , រថយន្តពន្លត់អគ្គីភ័យរបស់អាជ្ញាធរជាតិអប្សរា ចំនួន ២គ្រឿង និង រថយន្តពន្លត់អគ្គីភ័យ កងរាជអាវុធហត្ថខេត្តចំនួន ៣ គ្រឿង។ ក្រុមការងារជំនាញ បានពន្លត់ភ្លើងជាស្ថាពរ នៅវេលាម៉ោង៤:៤០នាទីរសៀល ថ្ងៃដដែល។ រីឯ ទ្រព្យសម្បត្តិខូចខាតរួមមាន ផ្ទះឈើមួយខ្នង ឆេះខ្ទេចទាំងស្រុង និងផ្ទះចំនួន ៣ខ្នងទៀត រងការខូចខាតប្រមាណ ៣០ភាគរយ។
អត្ថបទ និង រូបភាព៖ លោក ម៉ី សុខារិទ្ធ
លែសម្រួលអត្ថបទ៖ លោក សេង ផល្លី
