នៅរសៀលថ្ងៃទី១០ ខែមិថុនា ឆ្នាំ២០២១ ក្រុមការងារមន្ត្រីសង្ឃសាលាគណខេត្តសៀមរាប ដឹកនាំដោយព្រះវិជ័យរង្សី បណ្ឌិត ឡាច លាង សាសនធរោ ព្រះធម្មធរគណខេត្ត ព្រះអនុគណក្រុងសៀមរាប និងជាចៅអធិការវត្តទេពពោធិវង្ស អមដំណើរដោយ ព្រះរាជាគណៈថ្នាក់កិត្តិយសនៃព្រះរាជាណាចក្រកម្ពុជា និងជាព្រះចៅអធិការវត្ត គ្រូសូត្រវត្តមួយចំនួនក្នុងខេត្ត បានចុះទៅសួរសុខទុក្ខ និងនាំយកអំណោយមួយចំនួនរួមមាន៖ មី១០កេស ,អង្ករ១៥០គីឡូក្រាម ,ត្រីខ១កេស ,ត្រីស្រស់ប្រមាណជាង១៥០គីឡូក្រាម ផ្តល់ជូនដល់មេឃុំឬស្សីលក និងមេឃុំគោកធ្លកលើ ស្រុកជីក្រែង ដើម្បីជួយសម្រួលដល់ជីវភាពរស់នៅប្រចាំថ្ងៃ ដែលជួបការលំបាកដោយសារវិបត្តិជំងឺកូវីដ-១៩ ហើយក្រុមគ្រួសារគាត់ត្រូវបានជួបប៉ះពាល់ដោយផ្ទាល់ និងដោយប្រយោលជាមួយអ្នកមានវិជ្ជមាននៃជំងឺនេះ និងមិនអាចចេញទៅណាបានដោយអាជ្ញាធរតម្រូវឱ្យធ្វើចត្តាឡីស័កនៅតាមលំនៅឋានរៀងខ្លួន។
ព្រះវិជ័យរង្សី បណ្ឌិត ឡាច លាង មានថេរដីកាទៀតថា ចំពោះអំណោយដែលបាននាំមកជូននាពេលនេះដែរ គឺបានមកពីការចូលរួមរបស់ព្រះសង្ឃក្នុងខេត្ត និងប្រជាពុទ្ឋបរិស័ទជិតឆ្ងាយយកមកប្រគេនហើយក្រុមមន្ត្រីសង្ឃខេត្ត បានធ្វើការបែងចែកទៅតាមលទ្ឋភាពដែលព្រះសង្ឃមាន ដើម្បីចែករំលែកនិងចូលរួមជាមួយរាជរដ្ឋាភិបាល ក្នុងការទប់ស្កាត់កាត់បន្ថយការឆ្លងជម្ងឺឆ្លងកូវីដ-១៩ ដែលកំពុងបង្កហានិភ័យដោយគម្រាមកំហែងមកលើសុខភាព និងអាយុជីវិតប្រជាជនកម្ពុជានាពេលបច្ចុប្បន្ន។
ព្រះវិជ័យរង្សី បណ្ឌិត ឡាច លាង ក៏បានលើកទឹកចិត្តដល់សមាជិកក្រុមគ្រួសារដែលកំពុងធ្វើចត្តាឡីស័ក ឱ្យខិតខំថែរក្សាសុខភាព កុំបាក់ទឹកចិត្តនិងត្រូវស្តាប់តាមការណែនាំរបស់ អាជ្ញាធរមូលដ្ឋានឱ្យបានម៉ត់ចត់និងប្រុងប្រយ័ត្នឱ្យបានខ្ជាប់ខ្ជួននូវវិធីសាស្ត្របង្កា និងការពារចៀសវាងនូវការចម្លងទៅអ្នកដទៃមកខ្លួនយើង។ វិធានការការពារដ៍មានប្រសិទ្ឋភាពសម្រាប់ជាយ័នការពារហានិភ័យពីជំងឺនេះ គឺត្រូវអនុវត្តតាមនូវសេចក្តីណែនាំនានា របស់ក្រសួងសុខាភិបាល និងសេចក្តីអំពាវនាវនូវវិធានការរបស់ប្រមុខ រាជរដ្ឋាភិបាល គឺ៣ការពារ និង៣កុំ ក្នុងការទប់ស្កាត់ការរីករាល ដាលនៃជំងឺកូវីដ-១៩នេះ។
ក្នុងឱកាសនោះដែរ ក្នុងនាមអាជ្ញាធរមូលដ្ឋាន លោកស្រី សែន សុផល មេឃុំឬស្សីលក បានថ្លែងអំណរព្រះគុណនូវព្រះទ័យយកចិត្តទុកដាក់របស់ព្រះសង្ឃ បានជួយឧបត្ថម្ភសម្ភារទាំងនេះ សម្រាប់បែងចែកដល់ក្រុមគ្រួសារដែលកំពុងធ្វើចត្តាឡីស័ក១៤ថ្ងៃ ហើយពួកគាត់មិនអាចចេញទៅប្រកបអាជីវកម្មធ្វើស្រែចម្ការបានដូចមុន។ ជាមួយបញ្ហានេះដែរ អាជ្ញាធរឃុំស្រុកក៏តែងតែសហការគ្នាជាមួយសមត្ថកិច្ចមូលដ្ឋាន ក្រុមយុវជនឃុំ និងប្រជាការពារ ដើម្បីណែនាំពន្យល់ជូនដល់ប្រជាពលរដ្ឋ ឱ្យយល់ពីវិធីការពារ និងឱ្យពួកគាត់អនុវត្តឱ្យបានខ្ជាប់ខ្ជួននូវវិធានការរបស់ក្រសួងសុខាភិបាល និងរាជរដ្ឋាភិបាល ទប់ស្កាត់ដល់ការឆ្លងជំងឺកូវីដ-១៩ ក្នុងសហគមន៍ ដោយបានស្នើដល់គាត់ ត្រូវប្រកាន់ខ្ជាប់នូវវិធានការ អនាម័យស្អាត ត្រូវពាក់ម៉ាស់ឱ្យបានត្រឹមត្រូវ លាងដៃជាមួយសាប៊ូ អាល់កុល ឬជែល និងត្រូវរក្សាគម្លាតសុវត្ថិភាពសង្គមឱ្យបានត្រឹមត្រូវ ហើយសូមចងចាំថា យើងភ្លេចកូវីដ-១៩ តែកូវីដ-១៩ មិនភ្លេចយើងទេ៕
អត្ថបទ និង រូបភាព៖ លោក យូ វង្ស
កែសម្រួលអត្ថបទ៖ លោក អ៊ុន ណារាជ្យ
