លោកឧត្តមសេនីយ៍ឯក ពៅ ស៊ា នាយកមជ្ឈមណ្ឌលអភិវឌ្ឍន៍យោធិនពិការសម្តេចតេជោ ហ៊ុន សែន គូលែន ៣១៧ សៀមរាប នៅព្រឹកថ្ងៃទី២១ ខែមិថុនា ឆ្នាំ២០២១នេះ បានដឹកនាំបើកកិច្ចប្រជុំដើម្បីផ្សព្វផ្សាយពីការបង្កើនការប្រុងប្រយ័ត្នឲ្យបានខ្ពស់ដើម្បីទប់ស្កាត់ការឆ្លងកូវីដ-១៩ ពីសំណាក់បងប្អូនជាយោធិន និងគ្រួសារយោធិនទាំងអស់ ក្រោយព្រឹត្តិការណ៍សហគមន៍២០កុម្ភៈ នៅមិនទាន់មានភាពធូស្រាល ខណៈខេត្តសៀមរាបមានករណីឆ្លងថ្មីជាបន្តបន្ទាប់។
លោកឧត្តមសេនីយ៍ឯក ពៅ ស៊ា បានបញ្ជាក់បន្ថែមថា អ្វីដែលកងកម្លាំងយើងទាំងអស់ត្រូវអនុវត្តឲ្យបានខ្ពស់នូវវិធានការណែនាំរបស់រាជរដ្ឋាភិបាល ក្រសួងសុខាភិបាល និងរដ្ឋបាលខេត្តសៀមរាប ដោយអនុវត្តអោយបានម៉ឺងម៉ាត់ និងខ្ជាប់ខ្ជួនប្រកបដោយស្មារតីទទួលខុសត្រូវខ្ពស់ និងត្រូវប្រកាន់ខ្ជាប់ជានិច្ច តាមអនុសាសន៍សម្តេចអគ្គមហាសេនាបតិតេជោ ហ៊ុន សែន គឺ៣កុំ និង៣ការពារ ដើម្បីការពារខ្លួនឯង និងក្រុមគ្រួសារឲ្យគេចផុតពីជំងឺកាចសាហាវនេះ។ ជាមួយនោះត្រូវបន្តផ្សព្វផ្សាយឲ្យបានទូលំទូលាយ ក្រើនរំលឹកឱ្យបានជាប្រចាំដល់បងប្អូន និងក្រុមគ្រួសារយោធិនពិការ របស់យើងអំពីវិធីការពារទប់ស្កាត់ កាត់ផ្តាច់ការចម្លងមេរោគឆ្លង ជាពិសេសត្រូវរាយការណ៍ឲ្យបានទាន់ពេលវេលារាល់សកម្មភាពពលរដ្ឋចេញចូលក្នុងមូលដ្ឋាន។
លោកនាយកមជ្ឈមណ្ឌល ក៏បានជំរុញបន្ថែមដល់កងកម្លាំងទាំងអស់ពីគោលដៅការងារនៅតាមបណ្តាផ្នែក និងជំនាញពាក់ពន្ធ័ទាំងអស់ ដោយត្រូវធ្វើបន្ត និងបន្ថែមការងារថ្មីដើម្បីអនុវត្តន៍ឲ្យកាន់តែមានប្រសិទ្ធិភាព នូវរាល់បទបញ្ជាដែលបានដាក់ចេញ។ លោកក៏បានជំរុញបន្ថែមទៅលើការបង្កើតផល និងការចិញ្ចឹមសត្វ តបតាមតម្រូវការទីផ្សានាពេលបច្ចុប្បន្ន និងទៅថ្ងៃខាងមុខ ដើម្បីឲ្យគ្រួសារបងប្អូនយោធិនពិការយើងមានជីវភាពធូរធា បានល្អប្រសើឡើងថែមទៀត ៕
អត្ថបទ និង រូបថត ៖ លោក ខេង ឧត្តម
កែសម្រួលអត្ថបទ ៖ លោក អ៊ុន ណារាជ្យ
