លោក ប៉ែន ផលគុណ ប្រធានមន្ទីរពេទ្យបង្អែកខេត្តសៀមរាប មានប្រសាសន៍ថា ដោយស្ថានភាពនៃជំងឺកូវីដ-១៩ ក្នុងខេត្តសៀមរាប កាន់តែកើតឡើងជារៀងរាល់ថ្ងៃនោះ ជាពិសេសនៅក្នុងក្រុងសៀមរាប បានធ្វើឲ្យចំនួនអ្នកជំងឺច្រើនលើសចំនួនគ្រែសម្រាប់ព្យាបាលដែលបានគ្រោងទុក ដូច្នេះដើម្បីដោះស្រាយនូវបញ្ហានេះ អាជ្ញាធរខេត្តបានគ្រោងយកវិទ្យាល័យអង្គរ ជាកន្លែងទី៣ សម្រាប់ព្យាបាលអ្នកជំងឺកូវីដ-១៩ ខណៈបច្ចុប្បន្ននេះនៅក្នុងក្រុងសៀមរាប មានមន្ទីរពេទ្យបង្អែកខេត្ត និង សាលាគោរុកោសល្យ និង វិក្រឹត្តការខេត្ត មានអ្នកជំងឺកំពុងព្យាបាលលើសពី៣០០នាក់ហើយ ។
លោក ប៉ែន ផលគុណ មានប្រសាសន៍យ៉ាងដូច្នេះ ក្នុងឱកាសអញ្ជើញធ្វើជាវាគ្មិននៃកម្មវិធីបច្ចុប្បន្នភាពសៀមរាប-អង្គរ របស់វិទ្យុនិងទូរទស្សន៍ជាតិខេត្ត នៃមន្ទីរព័ត៌មានខេត្តសៀមរាប កាលពីថ្ងៃទី២៣ ខែមិថុនា ឆ្នាំ២០២១ ម្សិលមិញនេះ ។
លោក ប៉ែន ផលគុណ មានប្រសាសន៍ទៀតថា ក្រៅពីក្រុងសៀមរាប មានវិទ្យាល័យដំដែក នៅក្នុងស្រុកសូទ្រនិគម បានយកធ្វើជាទីកន្លែងសម្រាប់ព្យាបាលអ្នកជំងឺកូវីដ-១៩ ដែលមានគ្រែប្រមាណ ១០០គ្រែ ហើយនៅតាមបណ្ដាស្រុកមួយចំនួន ដូចជា ស្រុកពួក ស្រុកក្រឡាញ់ និង ស្រុកអង្គរជុំ បានកំពុងត្រៀមជាកន្លែងសម្រាប់ព្យាបាលអ្នកជំងឺកូវីដ-១៩ ដែលកន្លែងនីមួយៗ មានគ្រែព្យាបាលប្រមាណ ២០គ្រែ ដូច្នេះក្នុងឱកាសនេះ សូមអំពាវនាវដល់បងប្អូនប្រជាពលរដ្ឋទាំងអស់ សូមចូលរួមទប់ស្កាត់ជំងឺកូវីដ-១៩ទាំងអស់គ្នា តាមគោលនយោបាយរបស់រាជរដ្ឋាភិបាលគឺ ៣កុំ រួមមាន ៖ កុំទៅកន្លែងបិទជិត គ្មានខ្យល់ចេញ ចូល , កុំទៅកន្លែងមនុស្សច្រើនកុះករ , កុំប៉ះពាល់គ្នា និង ៣ការពារ រួមមាន ៖ ត្រូវពាក់ម៉ាស់នៅគ្រប់ទីសាធារណៈ , លាងដៃជាមួយសាប៊ូ អាល់កុលឬជែល , រក្សាគម្លាតសង្គម ។
យោងតាមបណ្ដាញទំនាក់ទំនងសង្គមហ្វេសប៊ុកផ្លូវការរបស់ឯកឧត្តម ទៀ សីហា អភិបាលខេត្តសៀមរាប ឯកឧត្តមមានប្រសាសន៍ថា ការមិនសហការជាមួយអាជ្ញាធរ ការមិនអនុវត្តតាមវិធានការណែនាំរបស់ក្រសួងសុខាភិបាល ការលាក់បាំងព័ត៌មាន ការលួចបើកអាជីវកម្មដែលអាជ្ញាធរបានហាមឃាត់ ការរត់គេចពីតំបន់មានហានិភ័យ ឬរត់គេចពីមណ្ឌលចត្តាឡីស័ក នឹងធ្វើឲ្យការឆ្លងកាន់តែរីករាលដាល រហូតប៉ះពាល់ដល់អាយុជីវិតអ្នកដទៃ និងជាពិសេសប៉ះពាល់ទៅដល់ក្រុមគ្រួសាររបស់ខ្លួនផ្ទាល់ ដូច្នេះដើម្បីទប់ស្កាត់ការឆ្លងរីករាលដាលជំងឺកូវីដ-១៩ សូមបងប្អូនប្រជាពលរដ្ឋទាំងអស់ ត្រូវបន្តបង្កើនការប្រុងប្រយ័ត្ន យកចិត្តទុកដាក់ឲ្យបានខ្ពស់បន្ថែមទៀត ដោយចូលរួមអនុវត្តតាមវិធានការណែនាំរបស់ក្រសួងសុខាភិបាលឱ្យបានគ្រប់ៗគ្នា ដូចពាក្យស្លោកថា ការពារខ្លួនឯង ស្មើនឹងការពារក្រុមគ្រួសាររបស់លោកអ្នក ។
គួររំលឹកថា កាលពីពេលថ្មីៗនេះ លោកជំទាវ ឱ វណ្ណឌីន រដ្ឋលេខាធិការក្រសួងសុខាភិបាល និង ជាប្រធានគណៈកម្មការចំពោះកិច្ចចាក់វ៉ាក់សាំងការពារជំងឺកូវីដ-១៩ ក្នុងក្របខណ្ឌទូទាំងប្រទេស ធ្លាប់បានមានប្រសាសន៍ថា ជោគជ័យឬបរាជ័យ នៃការទប់ស្កាត់ការចម្លងជំងឺកូវីដ-១៩ គឺអាស្រ័យលើការចូលរួមរបស់បងប្អូនប្រជាពលរដ្ឋយើងទាំងអស់គ្នា ព្រោះថារាជរដ្ឋាភិបាល និង ក្រសួងសុខាភិបាលបានខិតខំអស់ពីចិត្តពីថ្លើមនៅក្នុងការអំពាវនាវ នៅក្នុងការដាក់ចេញនូវវិធានការចាំបាច់សម្រាប់ការអនុវត្ត ការកើតមាន ការឆ្លងរាលដាលជំងឺកូវីដ-១៩ នារយៈកាលកន្លងមក ប៉ុន្តែដោយសារមានបងប្អូនប្រជាពលរដ្ឋយើងមួយចំនួនមានការភ្លេច ប្រហែស និងមើលស្រាលលើស្ថានភាពនៃការវាយលុកចំពោះវីរុសកូវីដ-១៩ បានធ្វើឲ្យមានការចម្លងនេះ វាដើរពីកន្លែងមួយទៅកន្លែងមួយ ដូច្នេះដើម្បីទប់ស្កាត់ការឆ្លងរាលដាលជំងឺកូវីដ-១៩ សូមអនុវត្តឲ្យបានហ្មត់ចត់ និង ត្រឹមត្រូវបំផុត នូវវិធានការរបស់រាជរដ្ឋាភិបាល គឺ៣កុំ និង ៣ការពារ ។
សូមបញ្ជាក់ថា ពាក់ព័ន្ធនឹងព្រឹត្តិការណ៍សហគមន៍២០កុម្ភៈ គិតត្រឹមយប់ថ្ងៃទី២៣ ខែមិថុនា ឆ្នាំ២០២១នេះ ខេត្តសៀមរាប មានអ្នកវិជ្ជមានជំងឺកូវីដ-១៩ សរុបចំនួន ៧០១នាក់ ក្នុងនោះបានព្យាបាលជាសះស្បើយចំនួន២០៧នាក់ , កំពុងសម្រាកព្យាបាលនៅមន្ទីរពេទ្យបង្អែកខេត្តសៀមរាប មណ្ឌលចត្តាឡីស័កគរុកោសល្យ និងវិក្រឹតការខេត្ត និងវិទ្យាល័យដំដែក ចំនួន៤៨៦នាក់ និង ស្លាប់អ្នកវិជ្ជមានជំងឺកូវីដ-១៩ ចំនួន ០៨នាក់ ៕
អត្ថបទ ៖ លោកស្រី ហែម បូរ៉ាន្នី
កែសម្រួលអត្ថបទ ៖ លោក លីវ សាន្ត
