មន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តសៀមរាប សហការជាមួយអាជ្ញាធរស្រុកពួក នៅព្រឹកថ្ងៃទី២៤ ខែមិថុនា ឆ្នាំ២០២១នេះ បាននាំយកអំណោយរបស់រាជរដ្ឋាភិបាលកម្ពុជា តាមរយ:ក្រសួងសង្គមកិច្ច អតីតយុទ្ធជន និងយុវនីតិសម្បទា ដែលជាគ្រឿងឧបភោគបរិភោគ ទៅចែកជូនប្រជាពលរដ្ឋក្រីក្រលំបាកក្នុងវិបត្តិកូវីដ-១៩ចំនួន ៥៥គ្រួសារ មកពីឃុំចំនួន ៣ ក្នុងស្រុកពួក រួមមាន៖ ១- ភូមិល្វាចំនួន ១៥គ្រួសារ ,២- ភូមិរើលចំនួន ២៥គ្រួសារ ,៣- ឃុំត្រីញ័រចំនួន ១៥គ្រួសារ ។ អំណោយដែលបានចែកជូនប្រជាពលរដ្ឋនាពេលនោះ ដោយក្នុងមួយគ្រួសារៗទទួលបាន៖ អង្ករចំនួន ២៥គី.ក្រ, មីចំនួន ១កេស, ទឹកស៊ីអ៊ីវចំនួន ១យួរ, ទឹកត្រីចំនួន ១យួរ, ត្រីខកំប៉ុងចំនួន ១យួរ និងប៊ីចេងចំនួន ១កញ្ចប់(០.៥គី.ក្រ)។
លោក អោ ម៉ៅ មន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តសៀមរាប បានឱ្យដឹងថា អំណោយទាំងអស់នេះ របស់រាជរដ្ឋាភិបាលកម្ពុជា ផ្តល់ឲ្យតាមរយ:ក្រសួងសង្គមកិច្ច អតីតយុទ្ធជន និងយុវនីតិសម្បទា ហើយអនុវត្តដោយផ្ទាល់ នៃមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តសៀមរាប។ លោកប្រធានមន្ទីរបានឲ្យដឹងទៀតថា អំណោយទាំងនេះគឺក្រសួងសង្គមកិច្ច ក៏ដូចជាមន្ទីរសង្គមកិច្ចខេត្ត បានគ្រោងជាប្រចាំឆ្នាំ សម្រាប់ជួយដោះស្រាយជីវភាពប្រជាពលរដ្ឋក្រីក្រជួបការលំបាក ដោយគ្រោះមហន្តរាយផ្សេងៗ ជាពិសេសក្នុងវិបត្តិ នៃការរីករាលដាលជំងឺកូវីដ-១៩។
លោក បានបន្ថែមថា ក្រុមការងារធ្វើការនេះ ជាលក្ខណ:តូចៗ ដោយសារបារម្ភ និងការពារខ្លាចឆ្លងរីករាលដាលជំងឺកូវីដ-១៩ ។ លោក ក៏បានអំពាវនាវដល់បងប្អូនប្រជាពលរដ្ឋ ទី១- ត្រូវខិតខំបង្កបង្កើនផល ដើម្បីឱ្យជីវភាពបានល្អប្រសើរពីព្រោះថាពេលនេះគឺជាពេលរដូវវស្សា ដែលបងប្អូនអាចធ្វើបាន។ ទី២- សូមបងប្អូនយកចិត្តទុកដាក់ថែទាំសុខភាព, ត្រូវចូលរួមបង្ការ ទប់ស្កាត់ការរីករាលដាលជំងឺកូវីដ-១៩ និងអនុវត្តវិធានការរបស់រាជរដ្ឋាភិបាល និងក្រសួងសុខាភិបាលគឺ ៣ការពារ និង៣កុំឲ្យបានខ្ជាប់ខ្ជួន៕
ប្រភព: មន្ទីរសង្គមកិច្ចខេត្តសៀមរាប
កែសម្រួល៖ លីវ សុខុន
