ប្រជាពលរដ្ឋ ១៧គ្រួសារ ក្នុងចំណោម ១៩គ្រួសារ មកពី៧ភូមិ ក្នុងឃុំក្លាំងហាយ ស្រុកស្រីស្នំ ខេត្តសៀមរាប បានយល់ព្រមបញ្ឈប់ការកាប់ទន្ទ្រានដី ក្នុងតំបន់គម្របព្រៃឈើទំហំជាង១០០ហិកតា តាមរយៈកិច្ចប្រជុំពិភាក្សា រវាងក្រុមការងារចម្រុះ របស់រដ្ឋបាលខេត្ត ជាមួយប្រជាពលរដ្ឋ និងអាជ្ញាធរស្រុក នេះបើតាមការឱ្យដឹងតាមទូរស័ព្ទពីលោក ហម ផល ប្រធានរដ្ឋបាលស្រុកស្រីស្នំ រសៀលថ្ងៃទី២៤ ខែមិថុនា ឆ្នាំ២០២១។
លោក ហម ផល បានឱ្យដឹងថា លទ្ធផលនៃកិច្ចប្រជុំ ដឹកនាំដោយ លោក ង៉ាន់ ភិរុណ អភិបាលរងខេត្ត តំណាងឯកឧត្តម ទៀ សីហា អភិបាលខេត្តសៀមរាប ភាគីប្រជាពលរដ្ឋ បានឯកភាពតាមសំណើអាជ្ញាធរ និងយកសំណើនេះ ដាក់ជូនឯកឧត្តមអភិបាលខេត្ត ធ្វើការសម្រេចជាផ្លូវការ។
គួរំលឹកថា ការចុះពិនិត្យទីតាំងដី និងប្រជុំពិភាក្សា ដោយក្រុមការងារចម្រុះ របស់រដ្ឋបាលខេត្តនេះ ធ្វើឡើងបន្ទាប់ ទទួលបានការស្នើសុំបង្កបង្កើនផល លើដីស្រែដែលធ្លាប់ប្រើប្រាស់ និងកាន់កាប់ នៅតំបន់ព្រៃទទឹង ភូមិសាស្ត្រឃុំក្លាំងហាយ។ ពាក្យស្នើសុំនេះដែរ ធ្វើឡើងក្រោយពី រដ្ឋបាលឃុំ បានទៅចុះបោះបង្គោលព្រំការពារតំបន់គម្របដីព្រៃឈើ កាលពីពាក់កណ្ដាលឆ្នាំ២០២០ ដែលប្រជាពលរដ្ឋ បានអះអាងថា ជាដីតាំងពីដូនតា និងបានអាស្រ័យផល តាំងពីមុន និងចាប់ពីឆ្នាំ២០០២មកម្ល៉េះ។
ជាមួយនោះ លោកអភិបាលរងខេត្ត ក៏បានណែនាំដល់ប្រជាពលរដ្ឋបញ្ឈប់ការកាប់ទន្រ្ទានដីព្រៃឈើ ដែលនៅសេសសល់បន្តទៀត ដើម្បីថែរក្សាទុកជាប្រយោជន៍សាធារណៈ ជាពិសេសបងប្អូនប្រជាពលរដ្ឋ អាចទាញយកផលអនុផលជាច្រើនពីសហគមន៍ព្រៃឈើនេះដោយស្របច្បាប់។ ផ្ទុយទៅវិញ ប្រជាពលរដ្ឋ ដែលនៅបន្តកាប់ទន្រ្ទានដីព្រៃជាសម្បត្តិរបស់រដ្ឋ ជននោះ នឹងត្រូវផ្តន្ទាទោសទៅតាមច្បាប់៕
សូមជម្រាបថា ក្រុមការងារចម្រុះ ដែលបានចុះទៅពិនិត្យទីតាំងដីប្រជាពលរដ្ឋ និងជួបប្រជុំពិភាគ្សា កាលពិថ្ងៃទី២៣ម្សិលមិញនេះ មានការចូលរួមពី លោកនាយកទីចាត់ការអន្តរវិស័យសាលាខេត្ត លោកប្រធានក្រុមប្រឹក្សាស្រុក លោក អភិបាលស្រុក តំណាងមន្ទីរបរិស្ថានខេត្ត តំណាងមន្ទីរធនធានទឹក និងឧតុនិយមខេត្ត តំណាងមន្ទីរកសិកម្ម រុក្ខាប្រមាញ់ និងនេសាទខេត្ត លោកនាយខណ្ឌរដ្ឋបាលព្រៃឈើសៀមរាប អាជ្ញាធរមូលដ្ឋាន និងមន្រ្តីជំនាញពាក់ព័ន្ធជាច្រើនរូប។
អត្ថបទ៖ លោក សេង ផល្លី
រូបភាព៖ រដ្ឋបាលខេត្តសៀមរាប
