បន្ទាប់ពីទទួលបានសេចក្តីសម្រេចរបស់រដ្ឋបាលខេត្តសៀមរាប ស្តីពីការបិទបញ្ចប់ការកំណត់ “តំបន់ក្រហម” នៅភូមិចំនួន៤ ក្នុងសង្កាត់ស្រង៉ែ ក្រុងសៀមរាប រួមមាន ភូមិរការធំ ភូមិព្រៃធំ ភូមិចន្លោង និងភូមិស្រង៉ែ ដើម្បីជាការអនុវត្តតាមគោលការណ៍ ណែនាំដ៏ខ្ពង់ខ្ពស់ពីឯកឧត្តម ទៀ សីហា អភិបាលនៃគណៈអភិបាលខេត្ត កាលរសៀលពីថ្ងៃទី២៤ ខែមិថុនា ឆ្នាំ២០២១ លោក នួន ពុទ្ធារ៉ា អភិបាលក្រុង និងជាប្រធានគណៈបញ្ជាការឯកភាព រដ្ឋបាលក្រុងសៀមរាប បានដឹកនាំក្រុមការងារ និងលោកចៅសង្កាត់ស្រង៉ែ ព្រមទាំងលោកមេភូមិ ចុះពិនិត្យមើលការបើកភូមិសាស្ត្រនេះឡើងវិញ និងបានជួបសាកសួរសុខទុក្ខ លើកទឹកដល់គ្រួសារបងប្អូនប្រជាពលរដ្ឋដែលមានសមាជិក មានវិជ្ជមានកូវីដ-១៩ កំពុងសំរាកព្យាបាលនៅឯមន្ទីរពេទ្យ ។
ក្នុងឱកាសនោះដែរ លោក នួន ពុទ្ធារ៉ា បានឲ្យដឹងថា បើទោះបីជាការកំណត់តំបន់ក្រហម នៅក្នុងភូមិទាំង៤ ត្រូវបានបិទបញ្ចប់ពិតមែន តែសម្រាប់សមាជិកគ្រួសារពលរដ្ឋ ដែលបានប៉ះពាល់ជាមួយអ្នកវិជ្ជមានកូវីដ-១៩ កន្លងមកត្រូវធ្វើចត្តាឡីសក័បន្ត ដោយកំណត់ទីតាំងបិទខ្ទប់ ត្រឹមតាមខ្នងផ្ទះ និងបង្រួមអោយតូចជាងមុន ដើម្បីកុំអោយមានផលប៉ះពាល់ដល់ការរស់នៅ របស់គ្រួសារពលរដ្ឋដ៏ទៃ ដែលមិនជាប់ពាក់ពន្ធ័ ស្របពេលដែលយើងត្រូវរួមគ្នាទប់ស្កាត់កុំអោយមេរោគកូវីដ-១៩ មានការឆ្លងបន្តទៀតនៅក្នុងសហគមន៍យើង។
លោកអភិបាលក្រុងបញ្ជាក់បន្ថែមថា ក្នុងការចុះពិនិត្យនេះ ក្រុមការងារបានកំណត់ខ្នងផ្ទះគ្រួសារពលរដ្ឋដែលមានការប៉ះពាល់ជាមួយអ្នកវិជ្ជមានកូវីដ-១៩ ដែលទើបរកឃើញថ្មីត្រូវបិទខ្ទប់បន្ត ដោយក្នុងនោះនៅក្នុងភូមិចន្លោង មានចំនួន០៤ខ្នងផ្ទះ ស្មើរនិង០៤ គ្រួសារ និងនៅក្នុងភូមិព្រៃធំ មានចំនួន២២ ខ្នងផ្ទះ ស្មើរនិង២២គ្រួសារ។ ជាមួយគ្នានោះដែរ លោកអភិបាលក្រុង ក៏បានលើកទឹកចិត្ត និងស្នើរដល់សមាជិកគ្រួសារបងប្អូនប្រជាពលរដ្ឋ ដែលមានសមាជិកគ្រួសារមានវិជ្ជមានកូវីដ-១៩ សូមមានការអត់ធ្មត់ និងបន្តចូលរួមសហការណ៍ដោយអនុវត្តន៍អោយខ្ជាប់ខ្ជួនបំផុត តាមការណែនាំរបស់ក្រសួងសុខាភិបាល ដើម្បីរួមគ្នាកាត់ផ្តាច់មិនអោយមានការចម្លងបន្តនៅក្នុងសហគមន៍យើង៕
ប្រភព៖ រដ្ឋបាលក្រុងសៀមរាប
កែសម្រួលអត្ថបទ៖ លោក អ៊ុន ណារាជ្យ
