កាលពីរសៀលថ្ងៃទី២៤ ខែមិថុនា ឆ្នាំ២០២១ម្សិលមិញនេះ លោក ចាន់ សត្ថា និង លោកស្រី លី ហៀង , លោកស្រី ញាន ភួងម៉ាលី និងលោក អេង ជីមី បាននាំយកស្បៀងអាហារ សម្ភារការពារជំងឺកូវីដ-១៩ ដែលសរុបជាថវិកាចំនួន២.៩៩៥ដុល្លារអាមេរិក បានមកពីការមូលមតិរួមគ្នាពីញាតិមិត្ត និងសប្បុរសជនជិតឆ្ងាយទាំងក្នុងនិងក្រៅប្រទេស ក្នុងនោះមាន ៖ អង្ករ ,ត្រីខ ,មី ,ទឹកត្រី ,ស្ករ ,អំបិល ,ប៊ីចេង ,ខ្លាញ់ ,សាប៊ូ ,ម៉ាស ,អាកុល ,ជែល ,ទឹកសុទ្ធ និងដំណាប់ស្វាយ ប្រគល់ជូនដល់គ្រួសារទីទ័លលំបាកខ្លាំង ក្នុងអំឡុងពេលនៃការរីករាលជំងឺកូវីដ-១៩ និងបាត់ឱកាសការងារ ,គ្រួសារមានជីវភាពខ្វះខាតប្រភេទក្រ១ ក្រ២ ,ជនចាស់ជរាគ្មានទីពឹង ,ជនមានពិការភាពសរុបចំនួន២០៧គ្រួសារ ក្នុងនោះនៅក្រុងសៀមរាប មកពីសង្កាត់សាលាកំរើក ចំនួន៥០គ្រួសារ ,សង្កាត់សំបូរ ចំនួន២៨គ្រួសារ ,សង្កាត់គោកចក ចំនួន៧៦គ្រួសារ ,សង្កាត់ក្របីរៀល ចំនួន០២គ្រួសារ និងស្រុកប្រាសាទបាគង មកពីឃុំអំពិល ចំនួន៥១គ្រួសារ។ ក្រៅពីទទួលបានស្បៀងអាហារនិងសម្ភារការពារជំងឺកូវីដ-១៩ នោះ គ្រួសារខ្វះខាតក្នុងជីភាព ទាំង២០៧គ្រួសារនេះ ក៏ទទួលបានថវិកាផងដែរ ដែលក្នុងមួយគ្រួសារទទួលបានចំនួនមួយម៉ឺនរៀល ។
លោកស្រី ញាន ភួងម៉ាលី តំណាងសប្បុរសជន បានឲ្យដឹងថា នេះជាលើកទី៣ហើយសម្រាប់សកម្មភាពការងារមនុស្សធម៌ ចាប់តាំងពីកម្ពុជាជួបវិបត្តិដោយការការរីករាលដាលនៃជំងឺកូវីដ-១៩ ហើយយើងនឹងកៀរគរស្វែងរកការគាំទ្រពីសប្បុរសជនជិតឆ្ងាយបន្តទៀត ដើម្បីប្រមូលថវិកានិងសន្សំទុកទិញសម្ភារស្បៀងអាហារសម្រាប់ជំហានបន្ទាប់ យកមកឧបត្ថម្ភជូនដល់គ្រួសារជួបការលំបាកនិងជនមានពិការភាព ចាស់ជរាគ្មានទីពឹងជាដើម ទៅតាមលទ្ឋភាពដែលអាចធ្វើបាន ដើម្បីចូលរួមសម្រាលការលំបាកជាមួយអាជ្ញាធរមូលដ្ឋាន និងរាជរដ្ឋាភិបាល ក្នុងគ្រាលំបាកដោយសាវិបត្តិនៃជំងឺកូវីដ-១៩ ។
មានប្រសាសន៍ក្នុងឱកាសនោះ លោក សាម ឡម ចៅសង្កាត់សាលាកំរើក បានសម្ដែងនូវការអំណរគុណ និងកោតសរសើរចំពោះសកម្មភាពសប្បុរសធម៌ របស់សប្បុរសជនដែលបានលះបង់ធនធានផ្ទាល់ទោះតិចក្តីច្រើនក្តី ដើម្បីយកមកចែករំលែកដល់គ្រួសារខ្វះខាតលើជីវភាពប្រចាំថ្ងៃ ក្នុងដំណាក់កាលជួបការលំបាកដោយសារជំងឺកូវីដ-១៩ ដែលនេះបង្ហាញឱ្យឃើញពីវប្បធម៌ចែករំលែក ជួយទុក្ខធុរៈគ្នាទៅវិញទៅមកក្នុងគ្រាលំបាក និងបង្ហាញពីទឹកចិត្តនិងស្មារតីយកអាសារ ជួយសង្គ្រោះគ្នាទៅតាមលទ្ឋភាព ស្របតាមគោលនយោបាយរបស់រាជរដ្ឋាភិបាលកម្ពុជា ក្នុងការកាត់បន្ថយភាពក្រីក្ររបស់បងប្អូនប្រជាពលរដ្ឋ។ ជាមួយគ្នានេះដែរ លោកចៅសង្កាត់ បានអំពាវនាវដល់បងប្អូនប្រជាពលរដ្ឋទាំងអស់ ត្រូវចូលរួមអនុវត្តតាមសេចក្តីជូនដំណឹងនិងសេចក្តីណែនាំនានារបស់រដ្ឋបាលខេត្ត ដើម្បីការពារការឆ្លងជំងឺកូវីដ-១៩ និងជាពិសេសត្រូវប្រកាន់ខ្ជាប់នូវវិធានការរបស់ក្រសួងសុខាភិបាល ពិសេសវិធានការរបស់រាជរដ្ឋាភិបាល គឺ៣ការពារ និង៣កុំ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
