កាលរសៀលថ្ងៃទី២៥ ខែមិថុនា ឆ្នាំ២០២១នេះ លោក ស៊ុន ចំណាន នាយកទីចាត់រដ្ឋបាលសាលាខេត្ត រួមជាមួយក្រុមការងារយុវជនខេត្តចុះជួយក្រុងសៀមរាប បាននាំយកអំណោយជាគ្រឿងឧបភោគបរិភោគ និងសម្ភារប្រើប្រគល់ជូនដល់សាលាសង្កាត់សាលាកំរើក ស្ថិតក្នុងក្រុងសៀមរាប ខេត្តសៀមរាប សម្រាប់អាជ្ញាធរមូលដ្ឋាននេះធ្វើការបែងចែកទៅតាមស្ថានភាព និងតម្រូវការចាំបាច់ជាក់ស្តែងនៃការខ្វះខាតក្នុងជីវភាពប្រចាំថ្ងៃរបស់បងប្អូនប្រជាពលរដ្ឋក្នុងសង្កាត់។ អំណោយទាំងនោះដែររួមមាន៖ អង្ករ១៥០០គីក្រាម ,មី១០កេសធំ ,ទឹកត្រី២០យួរ ,ទឹកស៊ីអ៊ីវ២០យួរ ,ត្រីខ១០០កំប៉ុង ,ទឹកសុទ្ឋវីតាល៥០០មីលីលីត្រ ៣០កេស រួមនឹងអាល់កុល និងម៉ាសមួយចំនួនទៀត សរុបជាថវិកាប្រមាណជា១៣០០ដុល្លារសហរដ្ឋអាមេរិក។
ក្នុងនាមរដ្ឋបាលខេត្ត ក៏ដូចជាក្រុមការងារយុវជនខេត្តចុះជួយក្រុងសៀមរាប លោក ស៊ុន ចំណាន បានបង្ហាញនូវក្តីបារម្ភពីសុខទុក្ខរបស់បងប្អូនប្រជាពលរដ្ឋទូទាំងខេត្ត ជាមួយនឹងការប្រឈមទៅនឹងវិបត្តិជំងឺកូវីដ-១៩ ដែលបញ្ហានេះយើងទាំងអស់គ្នាត្រូវតែចូលរួមការពារ ទប់ស្កាត់ ប្រយុទ្ឋប្រឆាំង ដើម្បីកាត់ផ្តាច់ខ្សែចម្លងជំងឺបានឆាប់ ហើយបញ្ហានេះក៏ជាមិនមែនបញ្ហារបស់បុគ្គលណាម្នាក់ឡើយ ទាំងថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ ព្រះសង្ឃ ប្រជាពលរដ្ឋទូទៅ ត្រូវតែចូលរួមបង្ការទប់ស្កាត់ជំងឺឆ្លងដ៏កាចសាហាវនេះ ពីព្រោះបច្ចុប្បន្ននេះជំងឺនេះបាននឹងកំពុងបន្តតាមយាយីដល់សុខភាពរបស់មនុស្ស នៅទូទាំងពិភពលោកនៅឡើយសំខាន់នៅកម្ពុជាយើង ។
លោកបន្ថែមថា ចំពោះអំណោយជាស្បៀងអាហារ និងសម្ភារៈប្រើប្រាស់ដែលបាននាំមកនាពេលនេះ គឺជាលើកទី២ហើយដែលក្រុមការងារយុវជនបាននាំយកមកប្រគល់ជូនអាជ្ញាធរសង្កាត់ ស្របពេលបងប្អូនប្រជាពលរដ្ឋក្នុងសង្កាត់នេះមួយចំនួន ពួកគាត់ពិតជាជួបការលំបាកក្នុងជីវភាពមែន ដោយសារតែវិបត្តិជំងឺកូវីដ-១៩ ដោយសារតែការងារ និងកិច្ចការជួញដូរផ្សេងៗ របស់ពួកគាត់ខ្លះត្រូវបានផ្អាក ឬមិនដំណើរការចំណូលគ្រួសារតិចជាដើម។
ក្នុងឱកាសនោះដែរ លោក សាម ឡម ចៅសង្កាត់សាលាកំរើក បានថ្លែងអំណរគុណនូវការយកចិត្តទុកដាក់របស់ក្រុមការងារយុវជនខេត្តចុះជួយក្រុងសៀមរាប ដែលបានជួយឧបត្ថម្ភស្បៀងអាហារនាពេលនេះ។ ចំពោះអំណោយដែលទទួលបានពេលនេះ លោកនឹងចាតចែងយកទៅចែកជូនដល់គោលដៅសំខាន់ៗ និងបែងចែងផ្តល់ជូនប្រជាពលរដ្ឋ ដែលបានកំពុងធ្វើចត្តាឡីស័ក និងប្រជាពលរដ្ឋខ្វះខាតនៅ ក្នុងអំឡុងពេលជំងឺកូវីដ-១៩ កំពុងរាតត្បាត ទៅតាមលទ្ឋភាពដែលសង្កាត់មាន។ ជាមួយនោះក្នុងនាមអាជ្ញាធរមូលដ្ឋាន នឹងបន្តសហការគ្នាជាប្រចាំជាមួយសមត្ថកិច្ចមូលដ្ឋាន មន្ត្រីសុខាភិបាល ក្រុមយុវជនសង្កាត់ ធ្វើការណែនាំអប់រំពន្យល់ដល់ប្រជាពលរដ្ឋឱ្យពួកគាត់ប្រតិបត្តិឲ្យបានខ្ជាប់ខ្ជួននូវវិធានការ ៣កុំ ៣ការពារ និង២ចូលរួមរបស់រាជរដ្ឋាភិបាល និងការណែនាំ វិធានការរបស់ក្រសួងសុខាភិបាល៕
អត្ថបទ និង រូបភាព៖ យូ វង្ស
កែសម្រួលអត្ថបទ៖ អ៊ុន ណារាជ្យ
