រយៈពេល ៤ថ្ងៃ ចាប់ពីថ្ងៃទី២៤ ដល់ ថ្ងៃទី២៧ ខែមិថុនា ឆ្នាំ២០២១ ក្នុងការប្រមូលសំណាកអាជីវករ និងអ្នកពាក់ព័ន្ធ នឹងអ្នកមានវិជ្ជមានជំងឺកូវីដ-១៩ ស្ថិតក្នុងផ្សារលើ ក្រុងសៀមរាប មានចំនួនជាង១៣០០នាក់ ក្នុងនោះ អ្នកមានវិជ្ជមានជំងឺកូវីដ-១៩ មានចំនួន ១៤៩នាក់ នេះបើតាមការឱ្យដឹងពីលោក មួង ណារិន អនុប្រធានមន្ទីរសុខាភិបាលខេត្តសៀមរាប នៅព្រឹកថ្ងៃទី២៧ម្សិលមិញ។
លោក មួង ណារិន បញ្ជាក់ថា នៅថ្ងៃទី២៧នេះ ជាថ្ងៃបិទបញ្ចប់ការប្រមូលយកសំណាក មេរោគកូវីដ-១៩ នៅមុខផ្សារលើធំថ្មី។ បន្ទាប់ពីនេះ អាជីវករ និងអ្នកពាក់ព័ន្ធ ដែលនៅសេសសល់ នឹងត្រូវទៅផ្ដល់សំណាកបន្តនៅ មណ្ឌលចត្តាឡីស័កសាលាគរុកោលសល្យខេត្ត ក្រុងសៀមរាប ជំនួសវិញ។
លោក មួង ណារិន មើលឃើញថា ការអញ្ជើញមកផ្ដល់សំណាកនៅថ្ងៃចុងក្រោយនេះ មានការកើនឡើង ដែលបង្ហាញពីការភ្ញាក់រលឹក និងទំនួលខុសត្រូវខ្ពស់របស់ប្រជាពលរដ្ឋ ចំពោះការថែរក្សាសុខភាពខ្លួនឯង បញ្ខៀសការចម្លងទៅក្រុមគ្រួសារ និងសហគមន៍របស់ខ្លួន។
លោក រ៉ន រ៉ាំ និងភរិយា ជាមួយនិងកូនតូចអាយុ៥ខែ រស់នៅ ឃុំតាយ៉ែក ស្រុកសូទ្រនិគម ខេត្តសៀមរាប មានមុខរបរជាកម្មករ លើកឡើងថា ដោយសារតែមិត្តភក្តិរបស់លោក ធ្លាប់ជួបគ្នា និងមានវិជ្ជមានកូវីដ-១៩ ទើបលោក ខំធ្វើដំណើរពីស្រុកសូទ្រនិគម មកផ្ដល់សំណាកនៅមុខផ្សារលើធំថ្មីនេះ ដែលជាស្មារតីខុសត្រូវ របស់លោក និងគ្រួសារ ដោយមិនធ្វេសប្រហែសឡើយ។
គួររំឭកថា ផ្សារលើធំថ្មី ក្រុងសៀមរាប ត្រូវបានបិទជាបណ្ដោះអាសន្ន ដោយសេចក្ដីសម្រេចរបស់រដ្ឋបាលខេត្តសៀមរាប រយៈពេល ១៤ថ្ងៃ នៅថ្ងៃទី២៤ ខែមិថុនាឆ្នាំ២០២១នេះ។
គិតត្រឹមយប់ថ្ងៃទី២៧ ខែមិថុនា ឆ្នាំ២០២១ ខេត្តសៀមរាប មានអ្នកវិជ្ជមានជំងឺកូវីដ-១៩ សរុបចំនួន៩៣៩នាក់ បានព្យាបាលជាសះស្បើយចំនួន ៣៦២នាក់ ស្លាប់៩នាក់ និង៥៦៨នាក់ កំពុងសម្រាកព្យាបាលនៅមន្ទីរពេទ្យបង្អែកខេត្តសៀមរាប មណ្ឌលចត្តាឡីស័កគរុកោសល្យ និងវិក្រឹតការខេត្ត និងវិទ្យាល័យដំដែក។
អត្ថបទ និង រូបភាព៖ លោក ងិន គឹមឡេង
កែសម្រួលអត្ថបទ៖ លោក សេង ផល្លី
