លាតសន្ធឹងលើផ្ទៃដី១០២២ហិកតា ព្រៃឈើសហគមន៍ទឹកជប់ខ្នារពោធិ៍ មានទីតាំងស្ថិតនៅក្នុងឃុំខ្នារពោធិ៍ ស្រុកសូទ្រនិគម ខេត្តសៀមរាប ព្រៃសហគមន៍នេះ មិនត្រឹមតែជាតំបន់ការពារដើមឈើ ឲ្យរួចផុតពីការទន្ទ្រានរបស់មនុស្សប៉ុណ្ណោះទេ ប៉ុន្តែវាបានក្លាយជាជម្រកសត្វព្រៃ និងជាកន្លែងផ្តល់នូវអនុផលព្រៃឈើយ៉ាងសំបូរបែបដល់ប្រជាពលរដ្ឋក្នុងសហគមន៍ទៀតផង។
លោក ម៉ៅ ង៉ិ ប្រជាពលរដ្ឋរស់នៅក្នុងភូមិសំរោងថ្មី ឃុំខ្នារពោធិ៍ បានឲ្យដឹងកាលពីពេលថ្មីៗនេះថា នៅពេលទំនេរពីការបង្កបង្កើនផល រូបលោក និងប្រជាពលរដ្ឋក្នុងភូមិតែងតែមកព្រៃសហគមន៍ដើម្បីដកផ្សិត និងបេះផ្លែឈើព្រៃដែលវាឲ្យផលតាមរដូវកាលដោយអ្នកខ្លះមកដកផ្សិតសម្រាប់ហូបប្រចាំថ្ងៃ ឯខ្លះទៀតមករកដើម្បីហូបផង និងលក់ដូរសម្រាប់ដោះស្រាយជីវភាពផង។ លោកថា ក្នុងតំបន់សហគមន៍ទឹកជប់ខ្នារពោធិ៍នេះ ក្រៅពីផ្លែឈើព្រៃ និងផ្សិត ខាងសហគមន៍ក៏បានអនុញ្ញាតឲ្យប្រជាពលរដ្ឋ អាចកាប់កូនឈើតូចៗ យកទៅសង់ជម្រកស្នាក់នៅ ឬធ្វើរោងមាន់រោងទាបាន លើកលែងតែក្នុងគោលដៅអាជីវកម្ម។
បើតាមលោក គង់ ប៊ុនលួស អនុប្រធានសហគមន៍អេកូទេសចរណ៍ព្រៃទឹកជប់ខ្នារពោធិ៍ បានបង្ហាញថា នៅពេលដែលយើងថែរក្សាព្រៃឈើបានគង់វង្ស វានឹងផ្តល់ប្រយោជន៍ជាច្រើនមកដល់យើងវិញ ជាក់ស្តែងនៅក្នុងសហគមន៍អេកូទេសចរណ៍ព្រៃទឹកជប់ខ្នារពោធិ៍នេះ គឺប្រជាពលរដ្ឋជាង១០០០គ្រួសារ មកពីភូមិចំនួន៧ នៃឃុំខ្នារពោធិ៍ ពួកគាត់អាចទទួលបានផលពីព្រៃឈើបានជាបន្តបន្ទាប់ទៅតាមរដូវកាល ដូចជា៖ រកឃ្មុំ ដកផ្សិត បោចវល្លិ៍ បេះផ្លែគុយ សេមាន់ ផ្លែរំដួល និងផ្លែឈើព្រៃផ្សេងៗជាច្រើនទៀត។
លោកអនុប្រធានសហគមន៍ បានឲ្យដឹងទៀតថា សម្រាបតំបន់ព្រៃសហគមន៍នេះមិនត្រឹមតែជាកន្លែងដែលផ្តល់អនុផលព្រៃឈើដល់ប្រជាសហគមន៍ប៉ុណ្ណោះទេ ប៉ុន្តែទីតាំងព្រៃឈើសហគមន៍ទឹកជប់ខ្នារពោធិ៍ ក៏ជាកន្លែងទេសចរណ៍ធម្មជាតិមួយផងដែរ ដោយសារតំបន់នេះមានទេសភាពស្រស់ត្រកាល ជាពិសេសសម្រស់ដើមកោងកាងទឹកសាប បានទាក់ទាញអ្នកទេសចរឲ្យចង់ទៅទស្សនាកម្សាន្ត។ ជាមួយនោះនៅក្នុងបរិបទដែលពិភពលោកកំពុងរាតត្បាតដោយជំងឺកូវីដ-១៩ តំបន់ព្រៃសហគមន៍អេកូទេសចរណ៍ទឹកជប់ខ្នារពោធិ៍ បានបិទការចូលមកកម្សាន្តមួយរយៈពេល ដែលការបិទនេះក្នុងគោលដៅទប់ស្កាត់ការរីករាលដាលនៃជំងឺឆ្លងកូវីដ-១៩ ស្របតាមការណែនាំរបស់រាជរដ្ឋាភិបាល ក៏ដូចជាក្រសួងសុខាភិបាល និងរដ្ឋបាលខេត្តសៀមរាប ប៉ុន្តែបើទោះជាបែបនេះក្តី ក៏សហគមន៍អនុញ្ញាតឲ្យពលរដ្ឋក្នុងសហគមន៍ ចូលរកអនុផលព្រៃឈើដើម្បីដោះស្រាយជីវភាពផងដែរ៕
អត្ថបទ និង រូបថត ៖ លោក ជា ស្រស់
កែសម្រួលអត្ថបទ ៖ លោក អ៊ុន ណារាជ្យ
