ក្រោយពីមានការរីករាលដាលនៃជំងឺកូវីដ១៩ពីមួយថ្ងៃទៅមួយថ្ងៃ នៅក្នុងសហគមន៍ខេត្ដសៀមរាប អាជ្ញាធរខេត្ដនេះបានសម្រេចយកវិទ្យាល័យអង្គរមួយទៀត ធ្វើជាមជ្ឍមណ្ឌលព្យាបាលអ្នកមានជំងឺកូវីដ១៩ ដែលមានកំរិតស្រាល ខណៈដែលទីតំាងពីរទៀត នៅក្នុងសៀមរាបសម្រាប់ព្យាបាលអ្នកជំងឺកំរិតធ្ងន់និងកំរិតស្រាល។
បើតាមឯកឧត្តមវេជ្ជបណ្ឌិត ក្រុស សារ៉ាត់ ទិប្រឹក្សាក្រសួងសុខាភិបាល និងជាប្រធានមន្ទីរសុខាភិបាល ខេត្ដសៀមរាប មានប្រសាសន៍នៅព្រឹកថ្ងៃទី២៨ ខែមិថុនា ឆ្នាំ២០២១នេះថា ការយកវិទ្យាល័យអង្គរធ្វើជាមជ្ឍមណ្ឌលសម្រាប់ព្យាបាលជំងឺកូវីដ-១៩នេះ គឺដើម្បីសម្រួលដល់កន្លែងព្យាបាលអ្នកជំងឺនៅកន្លែងពីរទៀត ខណៈដែលអាជ្ញាធរបានរកឃើញអ្នកវិជ្ជមានកូវីដ-១៩ កើនឡើងជាបន្ដបន្ទាប់ ជាពិសេសបានធ្វើឲ្យចំនួនអ្នកជំងឺច្រើនលើសចំនួនគ្រែសម្រាប់ព្យាបាល។ ឯកឧត្តមបន្ថែមថា វិទ្យាលអង្គរជាកន្លែងទី៣នេះហើយ សម្រាប់ព្យាបាលអ្នកជំងឺមានកំរិតស្រាល ដែលមានជាង១០០បន្ទប់ អាចដាក់បានអ្នកជំងឺពី៥០០នាក់ ទៅ៦០០នាក់ ហើយការយកន្លែងនេះ ធ្វើឡើងយរយៈពេល៣ថ្ងៃមកហើយ ដែលមកដល់ពេលនេះ មានអ្នកជំងឺកូវីដ-១៩ ចំនួន១៨២នាក់ បាននឹងកំពុងសំរាកព្យាបាលនៅទីនោះ។
ឯកឧត្តមវេជ្ជបណ្ឌិត បញ្ជាក់ថា នៅក្នុងក្រុងសៀមរាប មានទីតាំងកន្លែងព្យាលបាលអ្នកជំងឺចំនួន៣កន្លែង ទីតាំងទី១នៅមន្ទីរពេទ្យបង្អែកខេត្ដមានចំនួន៤០គ្រែ សម្រាប់ព្យាលអ្នកជំងឺមានកំរិតធ្ងន់សង្គ្រោះបន្ទាន់ កន្លែងទី២នៅសាលាគរុកោសល្យនិងវិក្រិត្ដការខេត្ដសម្រាប់ព្យាបាលអ្នកជំងឺកំរិតធម្យម ដែលអាចដាក់អ្នកជំងឺពី៨០នាក់ ទៅ១០០នាក់ និងនៅវិទ្យាល័យអង្គរនេះ សម្រាប់អ្នកជំងឺមានកំរិតស្រាល។ ជាមួយគ្នានោះកន្លែងព្យាបាលជំងឺកូវីដ-១៩ ទី៣នេះ គឺសម្រាប់តែដាក់តែអ្នកមានវិជ្ជមានកូវីដ-១៩ ដែលបានរកឃើញនៅតាមណ្ឌលចត្ដាឡីស័កនៅក្នុងក្រុងសៀមរាប រួមមាននៅមណ្ឌលចត្ដាឡីស័ក វិទ្យាល័យសម្ដេចឪ សាលារៀនវត្ដស្វាយ និងនៅតាមបណ្ដាមណ្ឌលចត្ដាឡីស័កក្នុងស្រុកខ្លះដែលជាប់ព្រំប្រទល់ជាមួយក្រុងសៀមរាបតែប៉ុណ្ណោះ។ ចំពោះនៅតាមបណ្ដាស្រុក គឺមានមណ្ឌលព្យាលបាលជំងឺកូវីដ-១៩ កំរិតស្រាល និងកំរិតមធ្យមចំនួន ៤កន្លែងទៀត រួមមានស្រុកពួក ស្រុកអង្គរជុំ ស្រុកសូទ្រនិគម និងស្រុក្រឡាញ់។
សូមជម្រាបថា ពាក់ព័ន្ធនឹងព្រឹត្តិការណ៍សហគមន៍២០កុម្ភៈ គិតត្រឹមថ្ងៃទី២៧ ខែមិថុនា ឆ្នាំ២០២១ ខេត្តសៀមរាបរកបានឃើញអ្នកវិជ្ជមានជំងឺកូវីដ-១៩សរុបចំនួន ៩៣៩នាក់ ក្នុងនោះបានព្យាបាលជាសះស្បើយចំនួន៣៦២នាក់ ស្លាប់៩នាក់ និង៥៦៨នាក់កំពុងសម្រាកព្យាបាល នៅមន្ទីរពេទ្យបង្អែកខេត្តសៀមរាប មណ្ឌលចត្តាឡីស័កគរុកោសល្យ និងវិក្រឹតការខេត្ត និងវិទ្យាល័យដំដែក៕
អត្ថបទ និង រូបភាព៖ ឈិត សាវី
កែសម្រួល៖ អ៊ុន ណារាជ្យ
