ឯកឧត្តម លី ធុជ ទេសរដ្ឋមន្ត្រីនិងជា អនុប្រធានទី១ អាជ្ញាធរមីន បានមានប្រសាសន៍ថា ប្រទេសម្ចាស់ជំនួយ ដៃគូអភិវឌ្ឍន៍ និងគ្រប់ភាគីពាក់ព័ន្ធសកម្មភាពមីន ចាំបាច់ត្រូវបន្តរួបរួមគ្នា និងប្តេជ្ញាគាំទ្រគ្នាទៅវិញទៅមក ដើម្បីបង្កើនសមត្ថភាពវិស័យសកម្មភាពមីន។ ការអំពាវនាវរបស់ឯកឧត្តម ទេសរដ្ឋមន្រ្តីមានប្រសាសន៍យ៉ាងដូច្នេះក្នុងសិក្ខាសាលាស្តីពី ការសំរេចបាននូវការអភិវឌ្ឍប្រកបដោយចីរភាព និងការអភិវឌ្ឍប្រកបដោយបរិយាប័ន្ននៅក្នុងប្រទេសដែលរងផលប៉ះពាល់ដោយគ្រាប់មីន និងសំណល់ជាតិផ្ទុះពីសង្គ្រាម ដែលបានប្រព្រឹត្តិទៅនៅព្រឹកថ្ងៃទី០១ ខែកក្កដា ដែលសិក្ខាសាលានេះដែរមានការឧបត្ថម្ភគាំទ្រដោយស្ថានទូតឥណ្ឌូណេស៊ីប្រចាំនៅកម្ពុជា។
ក្នុងឱកាសនោះដែរឯកឧត្តម លី ធុជ បានថ្លែងអំណរគុណយ៉ាងជ្រាលជ្រៅដល់រដ្ឋាភិបាល និងប្រជាជននៃសាធារណរដ្ឋឥណ្ឌូណេស៊ី តាមរយៈស្ថានទូតឥណ្ឌូនេស៊ីប្រចាំនៅទីក្រុងភ្នំពេញ ចំពោះការគាំទ្រដ៏សប្បុរសរៀបចំព្រឹត្តិការណ៍នេះបានទាន់ពេលវេលា ដោយសហការរៀបចំជាមួយមជ្ឈមណ្ឌលតំបន់អាស៊ានសម្រាប់វិស័យសកម្មភាពមីន(ARMAC) ហើយលោកទេសរដ្ឋមន្រ្តី សង្ឃឹមថា សិក្ខាសាលានេះនឹងផ្តល់នូវទិសដៅត្រឹមត្រូវឆ្ពោះទៅរកការបង្កើនប្រសិទ្ធភាពសកម្មភាពមីនក្នុងការជួយសម្រេចបាននូវចក្ខុវិស័យរបៀបវារៈឆ្នាំ២០៣០ នៃការធានាថា “គ្មាននរណាម្នាក់នៅសេសសល់ (No one is left behind)” ក្លាយជាការពិត ដែលរាល់លទ្ធផលនៃការពិភាក្សា នឹងត្រូវបានប្រែក្លាយទៅជាសកម្មភាពប្រកបដោយអត្ថន័យនៅថ្នាក់ជាតិ និងថ្នាក់តំបន់។ ក្នុងនាមរាជរដ្ឋាភិបាលកម្ពុជា ឯកឧត្តម ទេសរដ្ឋមន្រ្តី បានវាយតម្លៃខ្ពស់ចំពោះទំនាក់ទំនង និងកិច្ចសហប្រតិបត្តិការជាប្រវត្តិសាស្រ្តរវាងកម្ពុជា និងឥណ្ឌូនេស៊ី ក្នុងការចូលរួមគាំទ្រដល់ការអភិវឌ្ឍ និងការធានាបាននូវស្ថេរភាពនយោបាយ។
ឯកឧត្តម បញ្ជាក់ថា មជ្ឈមណ្ឌលតំបន់អាស៊ានសម្រាប់សកម្មភាពមីន (ARMAC) បានបង្កើតឡើងរយៈពេល ៩ ឆ្នាំមកហើយ ក្រោមគំនិតផ្តួចផ្តើមរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា នៅឯកិច្ចប្រជុំកំពូលអាស៊ានលើកទី២១ នៅរាជធានីភ្នំពេញ ហើយក្រោយមកមេដឹកនាំអាស៊ានបានទទួលយកសំណើនេះជាបន្តបន្ទាប់។ រយៈពេល ៤ ឆ្នាំចុងក្រោយនេះ ចាប់តាំងពីប្រតិបត្តិការរបស់ខ្លួននៅឆ្នាំ២០១៧ ARMAC បានក្លាយជាមជ្ឈមណ្ឌលដ៏គួរឱ្យទុកចិត្ត និងបានរួមចំណែកយ៉ាងសកម្មក្នុងកិច្ចខិតខំប្រឹងប្រែងអនុវត្តន៍ មិនត្រឹមតែលើការងារសហគមន៍សន្តិសុខនយោបាយអាស៊ាន២០២៥ ប៉ុណ្ណោះទេ ប៉ុន្តែថែមទាំងជំរុញកិច្ចសហប្រតិបត្តិការលើបញ្ហាអភិវឌ្ឍន៍សេដ្ឋកិច្ច-សង្គម ការអភិវឌ្ឍភាពជាដៃគូ សម្របសម្រួលការចែករំលែកចំណេះដឹង និងការគាំទ្រគំនិតផ្តួចផ្តើមខាងត្បូង-ខាងត្បូងនៅក្នុងតំបន់ផងដែរ។ សកម្មភាពមីនពិតជាមានតួនាទីសំខាន់ ក្នុងការដោះស្រាយបញ្ហាប្រឈមមនុស្សធម៌ជាបន្ទាន់ ដែលបណ្តាលមកពីវត្តមាននៃគ្រាប់មីន គ្រាប់បែកចង្កោម និងសំណល់ជាតិផ្ទុះដទៃទៀតក្នុងសម័យសង្រ្គាម ព្រមទាំងបានធ្វើឲ្យបណ្តាប្រទេសដែលនៅតែរងផលប៉ះពាល់យ៉ាងធ្ងន់ធ្ងរដូចជា កម្ពុជា ឡាវ មីយ៉ាន់ម៉ា ថៃ វៀតណាម និងហ្វីលីពីន ត្រូវការការគាំទ្របន្ទាន់ពីបណ្តាប្រទេសដែលមិនរងផលប៉ះពាល់ និងប្រទេសម្ចាស់ជំនួយ ហើយគ្រប់ភាគីពាក់ព័ន្ធ ចាំបាច់ត្រូវរួបរួមគ្នា និងប្តេជ្ញាបន្តគាំទ្រគ្នាទៅវិញទៅមក ដើម្បីបង្កើនសមត្ថភាពសកម្មភាពមីន។
គួរឲ្យដឹងថា ក្នុងរយៈពេល ៣០ឆ្នាំចុងក្រោយនេះ សកម្មភាពមីន និងសហគមន៍អភិវឌ្ឍន៍ បានធ្វើការរួមគ្នាជាដៃគូយ៉ាងជិតស្និទ្ធ ក្នុងការរំដោះផ្ទៃដីជូនបងប្អូនប្រជាពលរដ្ឋប្រកបដោយសុវត្ថិភាព ផ្តល់នូវផលវិជ្ជមានភ្លាមៗ និងបានរួមចំណែកដល់ការស្តារឡើងវិញ និងកិច្ចខិតខំប្រឹងប្រែងអភិវឌ្ឍន៍ក្នុងរយៈពេលវែងនៅក្នុងប្រទេសដូចជា កម្ពុជា ឡាវ វៀតណាម និងថៃ។ ទន្ទឹមនឹងនោះ រាជរដ្ឋាភិបាលកម្ពុជា ក្រោមការដឹកនាំដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានបង្ហាញពីការប្តេជ្ញាចិត្តរឹងមាំ និងស្ថិតស្ថេររបស់ខ្លួនក្នុងការកម្ចាត់គ្រាប់មីនដែលត្រូវបានស្គាល់អោយអស់នៅត្រឹមឆ្នាំ ២០២៥ ព្រមទាំងបានចាត់ទុកវិស័យបោសសម្អាតមីន ចូលរួមគាំពារដល់សុខសន្តិភាព និងការអភិវឌ្ឍប្រកបដោយចីរភាព។
សូមជម្រាបថា សិក្ខាសាលានេះ ក៏មានការអញ្ជើញចូលរួមថ្លែងសុន្ទរកថាពី លោក Sudirman Haseng ឯកអគ្គរដ្ឋទូតនៃសាធារណរដ្ឋឥណ្ឌូនេស៊ីប្រចាំនៅកម្ពុជា, លោក នង សកល អនុរដ្ឋលេខាធិការក្រសួងការបរទេស និងសហប្រតិបត្តិការអន្តរជាតិកម្ពុជា និងជាអនុប្រធានគណៈកម្មាធិការ ARMAC, លោក Sidharto R. Suryodipuro អគ្គនាយកកិច្ចសហប្រតិបត្តិការអាស៊ាននៃក្រសួងការបរទេសឥណ្ឌូនេស៊ី និងលោក ព្រហ្ម សួនប្រសិទ្ធ នាយកប្រតិបតិ្ត ARMAC និងភាគីពាក់ព័ន្ធសកម្មភាពមីនថ្នាក់ជាតិ-តំបន់-អន្តរជាតិ ជាច្រើនទៀតចូលរួមប្រជុំតាមប្រព័ន្ធវីដេអូផងដែរ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក អ៊ុន ណារាជ្យ
