ដើមី្បចូលរួមទ្រទ្រង់ក្នុងយុទ្ធនាការប្រយុទ្ធប្រឆាំងបង្កាទប់ស្កាត់ជំងឺកូវីដ-១៩ ជាមួយរាជរដ្ឋាភិបាល ក៏ដូចអាជ្ញាធរខេត្តសៀមរាប នៅព្រឹកថ្ងៃទី០២ ខែកក្កដា ឆ្នាំ២០២១នេះ ស្ថានទូតអូស្ត្រាលីប្រចាំនៅកម្ពុជា តាមរយៈគម្រោងកម្មវិធី ACCESS ដែលមានកិច្ចសហការជាមួយក្រសួងកិច្ចការនារី ត្រូវបានមន្ទីរកិច្ចការនារី ខេត្តសៀមរាប បានប្រគល់នូវអាល់កុលចំនួន ១០កេស ស្មើ ៩៩៩ដប ជូនរដ្ឋបាលខេត្តសៀមរាប ដើម្បីចូលរួមប្រយុទ្ធប្រឆាំង និងកាត់ផ្តាច់ខ្សែចម្លងជំងឺកូវីដ-១៩ ក្នុងខេត្តក្រោមវត្តមានរបស់លោក ពិន ប្រាកដ អភិបាលរងខេត្ត តំណាងដ៏ខ្ពង់ខ្ពស់ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប ។
ក្នុងនាមអាជ្ញាធរខេត្តលោក ពិន ប្រាកដ បានថ្លែងអំណរគុណចំពោះទឹកចិត្តដ៏សប្បុរសធម៌ របស់ស្ថានទូតអូស្ត្រាលី ប្រចាំនៅកម្ពុជា ក៏ដូចក្រសួងកិច្ចការនារី ដែលបានផ្តល់ជូននូវសម្ភារៈបម្រើការក្នុងការប្រយុទ្ធប្រឆាំង បង្កា និងទប់ស្កាត់ជំងឺកូវីដ-១៩ ដល់រដ្ឋបាលខេត្តសៀមរាប ស្របពេលដែរអាជ្ញាធរខេត្តកំពុងបន្តផ្តល់នូវសម្ភារៈ ឧបករណ៍ប្រើប្រាស់ជូនទៅតាមបណ្តាក្រុង/ស្រុក រួមទាំងគ្រឿងឧបភោគបរិភោគ ក្នុងការផ្គត់ផ្គង់ដល់បងប្អូនដែលបានវិលមកពីក្រៅប្រទេស និងរាជធានីខេត្ត ដែលជួបនូវហានិភ័យខ្ពស់នៃជំងឺកូវីដ-១៩ ដែលកំពុងធ្វើចត្តាឡីស័កនៅតាមមណ្ឌលក្រុង/ស្រុក។
លោកអភិបាលរងខេត្ត មានប្រសាសន៍បន្ថែមថា អ្វីដែរយើងត្រូវចូលរួមទាំងអស់គ្នានោះ គឺជាការបង្កើនសមត្ថភាពកាត់ផ្តាច់ខ្សែចម្លង ព្រោះវាប្រសើរជាងការប្រមូលកម្លាំងទៅទប់ទល់ក្នុងពេល និងក្រោយពេលមានការផ្ទុះជំងឺកូវីដ-១៩ ក្នុងសហគមន៍ ។ ជាមួយគ្នានោះលោកក៏បានធ្វើការអំពាវនាវដល់បងប្អូនប្រជាពលរដ្ឋទាំងអស់នៅក្នុងខេត្តសៀមរាប សូមបង្កើនការប្រុងប្រយ័ត្នដោយត្រូវអនុវត្តនូវវិធានការណ៍របស់រាជរដ្ឋាភិបាលគឺ ៣កុំ ៣ការពារ និង២ចូលរួមឲ្យមានប្រសិទ្ធភាពខ្ពស់បំផុត និង សូមបន្តប្រកាន់នូវវិធានសុខាភិបាលឲ្យបានខ្ជាប់ខ្ជួនទៀតផង។
សូមជម្រាបជូនថា ក្នុងព្រឹត្តិការណ៍សហគមន៍២០កុម្ភៈ មកទល់នឹងល្ងាចថ្ងៃទី០១ ខែកក្កដា ឆ្នាំ២០២១នេះ ខេត្តសៀមរាបបានរកឃើញអ្នកមានជំងឺកូវីដ-១៩ សរុបចំនួន ១,២៦៩នាក់ ព្យាបាលបានជាសះស្បើយចំនួន ៤៨៣នាក់ ស្លាប់ ១៣នាក់ និងកំពុងសម្រាកព្យាបាលចំនួន ៧៧៣នាក់ នៅក្នុងមន្ទីរពេទ្យបង្អែកខេត្តសៀមរាប មណ្ឌលចត្ថាឡីស័កគរុកោសល្យ និងវិក្រឹតការខេត្ត និងវិទ្យាល័យដំដែរ ស្រុកសូទ្រនិគម ៕
អត្ថបទ និង រូបភាព៖ លោក ជា ស្រស់ ,លោក ម៉ី សុខារិទ្ធ
កែសម្រួលអត្ថបទ៖ លោក អ៊ុន ណារាជ្យ
