នៅព្រឹកថ្ងៃទី១០ ខែកក្ដដា ឆ្នាំ២០២១នេះ ជាថ្ងៃដំបូង នៃចាក់ការវ៉ាក់សាំងការពារជំងឺកូវីដ-១៩ ដោយឥតគិតថ្លៃ ផ្ដល់ដោយប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន ដំណាក់កាលទីពីរ ជំហានទី១ ក្នុងក្រុងសៀមរាប ជាមួយនឹងការចុះពិនិត្យ និងសួរសុខទុក្ខដល់ប្រជាពលរដ្ឋ ប្រកបដោយការយកចិត្តទុកដាក់ពីអាជ្ញាធរ ក្នុងខេត្ត និងក្រុង គ្រប់លំដាប់ថ្នាក់។
តាមការឱ្យដឹងតាមទូរស័ព្ទពី លោក លោក នួន ពុទ្ធារ៉ា អភិបាលក្រុងសៀមរាប បង្ហាញថា ប្រជាពលរដ្ឋក្រុងសៀមរាបប្រមាណជាង២១ម៉ឺននាក់ នឹងទទួលបានការចាក់វ៉ាក់សាំងការពារជំងឺកូវីដ-១៩ ដោយក្រុមគ្រូពេទ្យនៃមន្ទីរពេទ្យខេត្តសៀមរាប និងក្រុមគ្រូពេទ្យយោធានៃក្រសួងការពារជាតិ។ ក្នុងនោះ ទីតាំងចំនួន ៣៨កន្លែង រួមមាន៖ មន្ទីរពេទ្យខេត្ត មណ្ឌលសុខភាព និងនៅតាមសាលារៀន ក្នុងសង្កាត់នីមួយៗ ត្រូវបានរៀបចំដែលរដ្ឋបាលក្រុង និងខេត្ត ដើម្បីសម្រួលចំនួនមនុស្ស ដែលមកទទួលវ៉ាក់សាំងនេះ។
លោក ធុយ ហ៊ត់ មេភូមិគោកដូង សង្កាត់គោកចក បង្ហាញថា ប្រជាពលរដ្ឋក្នុងមូលដ្ឋានរបស់លោក រាប់ទាំងប្រជាពលរដ្ឋគ្រប់អាយុចាក់វ៉ាក់សាំងការពារជំងឺកូវីដ-១៩ ចាប់ពី ១៨ឆ្នាំឡើងទៅ មានចំនួនសរុប ជិត ៣,០០០នាក់។ សម្រាប់មណ្ឌលសាលាបឋមសិក្សាគោកដូង ក្រុមការងារបានកំណត់ចាក់វ៉ាក់សាំងជូនចំនួន ៣៤០នាក់ ក្នុងមួយថ្ងៃ ពេលព្រឹកចំនួន ២០០នាក់ ពេលថ្ងៃចំនួន ១៤០នាក់ លើសពីនោះត្រូវរង់ចាំនៅថ្ងៃបន្ទាប់។
គួរជម្រាបដែរថា យុទ្ធនាការចាក់វ៉ាក់សាំងការពារជំងឺកូវីដ-១៩ក្នុងក្រុងសៀមរាបនេះ មានរយៈពេល ១៤ថ្ងៃ គឺចាប់ពីថ្ងៃទី១០ ដល់ ថ្ងៃទី២៣ ខែកក្កដា ឆ្នាំ២០២១។ បើតាមការបញ្ជាក់របស់ ឯកឧត្តម ទៀ សីហា អភិបាលខេត្តសៀមរាប លើកឡើងថា វ៉ាក់សាំងការពារជំងឺកូវីដ-១៩ ដែលជាអំណោយដ៏ថ្លៃថ្លារបស់ ប្រមុខរាជរដ្ឋាភិបាល សម្ដេចតេជោ ហ៊ុន សែន មានសម្រាប់គ្រប់ៗគ្នា។ ក្នុងនោះ ឯកឧត្តម អភិបាលខេត្ត ក៏បានអំពាវនាវដល់ប្រជាពលរដ្ឋ:
១. សូមរក្សាគម្លាត សណ្តាប់ធ្នាប់ នៅទីតាំងចាក់វ៉ាក់សាំង តាមសង្កាត់នីមួយៗ។
២. សូមកុំប្រជៀត ដណ្តើម និងព្យាយាមរុញគ្នា ដើម្បីបានចាក់មុន។
៣. ប្រជាជនតាមបណ្តាស្រុក សូមរង់ចាំជំហានបន្ទាប់ សូមកុំព្យាយាមមកចុះឈ្មោះចាក់វ៉ាក់សាំងក្នុងក្រុងសៀមរាប។ ព្រោះយើងនឹងយកវ៉ាក់សាំងទៅចាក់នៅស្រុករបស់បងប្អូនផ្ទាល់។
៤. សូមសហការជាមួយចៅសង្កាត់ អ្នកសម្របសម្រួលតាមមណ្ឌលចាក់វ៉ាក់សាំង ដែលនៅក្បែរផ្ទះរបស់បងប្អូនប្រជាពលរដ្ឋ។
៥. ចំពោះប្រជាជន នៅតាមបណ្ដាខេត្ដផ្សេងៗ សូមរង់ចាំវ៉ាក់សាំង ដែលគណៈកម្មការបានចាត់ចែង ទៅតាមបណ្តាខេត្តរបស់លោកអ្នក។
អត្ថបទ ៖ លោក ស៊ាន សុផាត
រូបភាព ៖ លោក ស៊ាន សុផាត, លោក យូ វង្ស , លោក ទ្រា ពន្លឺ
កែសម្រួលអត្ថបទ ៖ លោក សេង ផល្លី
