គិតចាប់ពីថ្ងៃទី១០ ដល់ល្ងាចថ្ងៃទី១២ ខែកក្កដា ឆ្នាំ២០២១នេះ ប្រជាពលរដ្ឋក្នុងក្រុងសៀមរាបជាង៤៤៩០០ អង្គ/នាក់ហើយ បានទទួលការចាក់វ៉ាក់សាំងដើម្បីការពារជំងឺកូវីដ-១៩ បន្ទាប់ពីរាជរដ្ឋាភិបាលបានអនុញ្ញាត្តឲ្យប្រជាពលរដ្ឋ ទទួលបានការចាក់វ៉ាក់សាំងដើម្បីការពារជំងឺកូវីដ-១៩ ដែលការទទួលបានវ៉ាក់សាំងដូសទី១នេះ បានធ្វើឲ្យពួកគាត់មានទំនុកចិត្ដ ពីវិធានការពារជំងឺដ៍កាចសាហាវមួយនេះ។ ពួកគាត់បានសម្ដែងការសប្បាយចិត្ដ និងថ្លែងអំណរគុណដល់រាជរដ្ឋាភិបាល និងអាជ្ញាធរខេត្តសៀមរាប ក៏ដូចជាក្រុមគ្រូពេទ្យដែលបានយកចិត្ដទុកដាក់ដល់ពួកគាត់។
បើតាមប្រជាពលរដ្ឋរស់នៅសង្កាត់សៀមរាប ពួកគាត់បានបង្ហាញអារម្មណ៍ដូចគ្នាថា ពួកគាត់បានទទួលស្ម័គ្រចិត្ដចាក់វ៉ាក់សាំងនេះ ដោយសារពួកគាត់ប្រឈមនឹងការឆ្លងជំងឺកូវីដ-១៩ ខណៈដែលនៅក្នុងក្រុងសៀមរាប បាននឹងកំពុងរីករាលដាលជំងឺនេះកាន់តែច្រើនឡើង។ ពួកគាត់បានបន្ដថា ការទទួលបានវ៉ាក់សាំងអាចជួយការពារជីវិតរបស់ពួកគាត់ពីសេចក្ដីស្លាប់ ជាងនោះទៅទៀតពួកគាត់ខ្លះជាអ្នកជំនួញ អ្នកលក់ដូរ អ្នកធ្វើការងារផ្នែកទេសចរណ៍ ហើយពេលបានទទួលវ៉ាក់សាំងនេះ ងាយស្រួលបានដើរទៅទស្សនា ក៍ដូចជាអ្នកទេសចរណ៍បានធ្វើដំណើរចេញពីប្រទេសមួយទៅប្រទេសមួយទៀត ក្រោយពេលទទួលបានវ៉ាក់សាំងហើយនោះ ពួកគាត់អាចជួយខ្លួនឯង ជួយគ្រួសារ និងសង្គមជាតិផងដែរ បើទោះបីមិនអាចការពារបាន១០០%ក៍ដោយ។
ជាមួយគ្នានោះដែរពួកគាត់ថ្លែងអំណរគុណដល់រាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវ៉ៃពិសំណាក់សម្ដេច តេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រម្ពុជា ដែលបានស្វះស្វែងក្នុងការរកវ៉ាក់សាំងចាក់ជូនប្រជាពលរដ្ឋ។ ក្នុងនោះដែរពួកគាត់បានអំពាវនាវដល់ប្រជាពលរដ្ឋទាំងអស់គ្នា សូមទៅទទួលវ៉ាក់សាំងអោយបានគ្រប់គ្នា ដើម្បីទប់ស្កាត់ និងលុបបំបាត់ការឆ្លងជំងឺកូវីដ-១៩ អោយបានឆាប់ៗនាពេលខាងមុខនេះ។
បើតាមលោក សុខ ថុល នាយករដ្ឋបាលខេត្តសៀមរាប បានឲ្យដឹងនៅព្រឹកនេះថា ការចាក់វ៉ាក់សាំងជូនពលរដ្ឋធ្វើឡើងចាប់ពីថ្ងៃទី១០ ដល់ថ្ងៃទី២៣ ខែកក្កដា ឆ្នាំ២០២១។ ក្នុងនោះគិតត្រឹមល្ងាចថ្ងៃទី១២ ខែកក្កដានេះ មានព្រះសង្ឃ និងបងប្អូនប្រជាពលរដ្ឋ រស់នៅទូទាំងក្រុងសៀមរាបមានចំនួនជាង ៤៤៩០០ អង្គ/នាក់ហើយ ដែលត្រូវបានចាក់វ៉ាកសាំងការពារជំងឺកូវីដ-១៩ ដោយរដ្ឋបាលខេត្ត បាននឹងកំពុងបន្តចាក់ជាបន្តបន្ទាប់នៅតាមទីតាំងទាំង ៣៨កន្លែងដែលរដ្ឋបាលបានគ្រោងទុករួចហើយសម្រាប់ការចាក់វ៉ាក់សាំងជូនដល់បងប្អូនប្រជាពលរដ្ឋ។ ចំពោះទីតាំងទាំងនោះគឺ នៅមន្ទីរពេទ្យខេត្ត, មណ្ឌលសុខភាព និងតាមសាលារៀន ក្នុងសង្កាត់នីមួយៗ ដែលបានត្រៀមរៀបចំចាក់ដោយក្រុមគ្រូពេទ្យនៃមន្ទីរពេទ្យ ខេត្តសៀមរាប និងក្រុមគ្រូពេទ្យយោធានៃក្រសួងការពារជាតិ ដោយក្នុងរយ:ពេល ៣ថ្ងៃកន្លងមកនេះ គឺបានប្រព្រឹត្តិទៅយ៉ាងល្អប្រសើរគួរកត់សម្គាល់។
គួរឲ្យដឹងដែរថា បើតាមលោកឧត្ដមសេនីយ៍ទោ សុក រីនណា នាយសេនាធិការយោធភូមិភាគទី៤ និងប្រធានក្រុមការងារចាក់វ៉ាក់សាំងបង្កាកូវីដ-១៩ បានបញ្ជាក់ថា ការផ្ដល់វ៉ាក់សាំងដល់ប្រជាពលរដ្ឋនេះ ធ្វើឡើងតាមគោលការណ៍ស្ម័គ្រចិត្ដ មិនប្រកាន់និន្នាការនយោបាយ បក្សពួកនិយម ជនបរទេស ពោលប្រជាពលរដ្ឋណាដែលមានអាយុចាប់ពី១៨ឆ្នាំឡើងទៅ។ ការចាក់វ៉ាក់សាំងបង្កាកូវីដ១៩នេះ មិនមានការលក់ដូរ ឬគិតកម្រៃជើងសារពីប្រជាពលរដ្ឋណាឡើយ ហើយបើសិនមានជនខិលខូចណាលួចលក់វ៉ាក់សាំងអោយពលរដ្ឋ និងត្រូវចាត់វិធានការផ្លូវច្បាប់។ លោកបន្ដថា ក្នុងពេលយុទ្ធនាការចាក់វ៉ាក់សាំងដូសទី១ ដំណាក់កាលទី២នេះ ពួកគាត់មកទទួលវ៉ាក់សាំងជាង១ម៉ឺននាក់ ទៅជិត២ម៉ឺននាក់ក្នុងមួយថ្ងៃ និងមានក្រុមគ្រូពេទ្យប្រតិបត្ដិការជាង ៣៥០នាក់ ដែលតាមផែនការចាក់ជូនពលរដ្ឋនៅក្រុងសៀមរាប មានចំនួនជាង២១ម៉ឺនាក់។ ជាមួយនោះលោកក៍សូមអំពាវនាវដល់ប្រជាពលរដ្ឋទៅទទួលវ៉ាក់សាំងត្រូវអនុវត្ដវិធានការការពារតាមការណែនាំពីក្រសួងសុខាភិបាល ៣ការពារ៣កុំ ដើម្បីប្រយុទ្ធប្រឆាំងជំងឺកូវីដ-១៩ នៅក្នុងសហគមន៍៕
អត្ថបទ និង រូបភាព៖ លោក ឈិត សាវី ,លោក ស៊ាន សុផាត
កែសម្រួលអត្ថបទ៖ លោក អ៊ុន ណារាជ្យ