យោងតាមបណ្ដាញទំនាក់ទំនងសង្គម «ហ្វេសប៊ុក» ផ្លូវការរបស់រដ្ឋបាលខេត្តសៀមរាប បានឲ្យដឹងថា បន្ទាប់ពីក្រុមការងារចម្រុះរបស់ខេត្ត ដឹកនាំដោយលោក ពៅ ពិសិដ្ឋ អភិបាលរងខេត្ត និងជាប្រធានក្រុមការងារទី២ នៃក្រុមការងារទទួលបន្ទុក និងសម្របសម្រួលការចាក់វ៉ាក់សាំងការពារជំងឺកូវីដ-១៩ ដែលទទួលមុខព្រួញនៅស្រុកស្វាយលើ និងស្រុកជីក្រែង បានចុះត្រួតពិនិត្យទីតាំងចាក់វ៉ាក់សាំងការពារជំងឺកូវីដ-១៩ ជូនប្រជាពលរដ្ឋដែលរស់នៅស្រុកស្វាយលើ និងស្រុកជីក្រែង កាលពីថ្ងៃទី១៤ ខែកក្កដា ឆ្នាំ២០២១។
ក្រោយពិការចុះពិនិត្យរួចរាល់រដ្ឋបាលខេត្ត បានសម្រេចរៀបចំការចាក់វ៉ាក់សាំងការពារជំងឺកូវីដ-១៩ ដោយឥតគិតថ្លៃ ជូនប្រជាពលរដ្ឋដែលរស់នៅស្រុកជីក្រែង ចាប់ពីថ្ងៃទី១៦ ខែកក្កដា ឆ្នាំ២០២១ ដែលមានទីតាំងស្ថិតក្នុងបរិវេណសាលាបឋមសិក្សាក្របីរៀល និងស្រុកស្វាយលើ ចាប់ពីថ្ងៃទី១៦ ខែកក្កដា ឆ្នាំ២០២១ ដែលស្ថិតក្នុងបរិវេណវត្តស្វាយលើ ខណៈស្រុកផ្សេងទៀតនឹងជូនដំណឹងពេលក្រោយ។ ក្នុងនោះដែរមុនពេលបងប្អូនប្រជាពលរដ្ឋទៅចាក់វ៉ាក់សាំង សូមធ្វើការទំនាក់ទំនងជាមួយមេភូមិ ឬឃុំជាមុនសិន ដើម្បីទទួលបានឯកសារសម្រាប់ចាក់វ៉ាក់សាំងនៅតាមភូមិ/ឃុំ ដែលបងប្អូនកំពុងរស់នៅ។
ជាមួយគ្នានោះដែរ រដ្ឋបាលខេត្តក៏ដូចជាប្រជាពលរដ្ឋ បានថ្លែងនូវអំណរគុណយ៉ាងជ្រាលជ្រៅបំផុតចំពោះសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា គណៈកម្មការកាតព្វកិច្ចចាក់វ៉ាក់សាំង និង ក្រុមការងារចាក់វ៉ាក់សាំងទាំងអស់ ដែលបានរៀបចំនិងបានចាក់វ៉ាក់សាំងជូនដល់ប្រជាពលរដ្ឋក្នុងខេត្តសៀមរាបនាពេលនេះ។
សូមជម្រាបថា ការចាក់វ៉ាក់សាំងការពារជំងឺកូវីដ-១៩ ដោយឥតគិតថ្លៃ ជូនដល់ប្រជាពលរដ្ឋក្នុងខេត្តសៀមរាបនាពេលនេះ ត្រូវបានរដ្ឋបាលខេត្តរៀបចំបែងចែកជាពីរជំហាន ក្នុងនោះជំហានទី១ គឺសម្រាប់បងប្អូនប្រជាពលរដ្ឋមានទីលំនៅក្នុងក្រុងសៀមរាប ដែលបានដំណើរការចាក់វ៉ាក់សាំង តាំងពីថ្ងៃទី១០ ខែកក្កដា មកម៉្លេះក្នុងគម្រោងផែនការរយៈ១៤ថ្ងៃ ដោយគ្រោងនឹងបញ្ចប់នៅថ្ងៃទី២៣ ខែកក្កដា ឆ្នាំ២០២១ខាងមុននេះ និងជំហានទី២ គឺសម្រាប់បងប្អូនប្រជាពលរដ្ឋមានទីលំនៅតាមបណ្ដាស្រុក ខណៈស្រុកប្រាសាទបាគងនេះ បានចាប់ផ្ដើមចាក់វ៉ាក់សាំងមុនគេ គឺចាប់ពីថ្ងៃទី១៥ ខែកក្កដា ឆ្នាំ២០២១នេះ រីឯស្រុកចំនួន០៣ទៀត រួមមាន ៖ ស្រុកសូទ្រនិគម , ស្រុកស្វាយលើ និង ស្រុកជីក្រែង ត្រូវបានប្រកាសចាក់វ៉ាក់សាំងចាប់ផ្ដើមពីថ្ងៃទី១៦ ខែកក្កដា ឆ្នាំ២០២១នេះដែរ។ ការវ៉ាក់សាំងនាពេលនេះ គឺចាក់ជូនប្រជាពលរដ្ឋដោយឥតគិតថ្លៃ ប៉ុន្តែប្រការដែលសំខាន់នោះ គឺបងប្អូនប្រជាពលរដ្ឋទាំងអស់ ដែលមកទទួលការចាក់វ៉ាក់សាំងនាពេលនេះ សូមចូលរួមអនុវត្តរក្សាគម្លាត សណ្តាប់ធ្នាប់ នៅទីតាំងចាក់វ៉ាក់សាំង តាមសង្កាត់នីមួយៗ សូមកុំប្រជៀត និង ដណ្តើមគ្នា ព្រោះបងប្អូនប្រជាពលរដ្ឋទាំងអស់ ដែលមានអាយុចាប់ពី១៨ឆ្នាំឡើង នឹងទទួលបានការចាក់វ៉ាក់សាំងការពារជំងឺកូវីដ-១៩ នេះគ្រប់ៗគ្នា នៅតាមទីតាំងដែលបានកំណត់៕
អត្ថបទ និង រូបថត ៖ ហ្វេសប៊ុករដ្ឋបាលខេត្ត
កែសម្រួលអត្ថបទ ៖ លោក លីវ សាន្ត
