រាជរដ្ឋាភិបាលកម្ពុជាសម្រេចយកខេត្តសៀមរាប ជាខេត្តសម្រាប់ទទួលប្រជាពលរដ្ឋខ្មែរចំណាកស្រុកពីក្រៅប្រទេស បន្ទាប់ពីខេត្តឧត្តរមានជ័យខ្វះខាតកន្លែង មិនអាចទទួលដាក់ប្រជាពលរដ្ឋខ្មែរចំណាកស្រុកបន្ដទៀតបាន។ នេះបើតាមការបញ្ជាក់ពីលោកវេជ្ជបណ្ឌិត ប៉ែន ផលគុណ ប្រធានមន្ទីរពេទ្យបង្អែកខេត្តសៀមរាប កាលពីថ្ងៃទី១៤ ខែកក្កដា ឆ្នាំ២០២១ ម្សិលមិញ។
លោកវេជ្ជបណ្ឌិត ប៉ែន ផលគុណ បានឲ្យដឹងថា បច្ចុប្បន្នដោយមានការភ័យខ្លាចចំពោះការរកឃើញវិរុសបំប្លែងខ្លួនថ្មីប្រភេទ ឌែលតា (Delta) ទៅលើប្រជាពលរដ្ឋខ្មែរ ដែលចំណាកស្រុកពីក្រៅប្រទេស ដែលមេរោគនេះមានភាពកាចសាហាវជាងមេរោគធម្មតា ហើយបច្ចុប្បន្នប្រទេសកម្ពុជាក៏បានរកឃើញចំនួន២២ករណីផងនោះ ទើបប្រមុខរាជរដ្ឋាភិបាលកំណត់ឲ្យប្រជាពលរដ្ឋខ្មែរចំណាកស្រុកពីក្រៅប្រទេស ត្រូវធ្វើចត្តាឡីស័កនៅខេត្តឧត្តរមានជ័យដែលជាខេត្តជាប់ព្រំប្រទល់។ ប៉ុន្ដែជាក់ស្ដែងពេលនេះ ប្រជាពលរដ្ឋចំណាកស្រុកកាន់តែមានចំនួនច្រើន លើសពីបន្ទុកទើបរាជរដ្ឋាភិបាលកម្ពុជាសម្រេចយកខេត្តសៀមរាប ជាខ្សែត្រៀមទី២ បន្ទាប់ពីខេត្តឧត្តរមានជ័យ ក្នុងការទទួលប្រជាពលរដ្ឋខ្មែរចំណាកស្រុកទាំងអស់ ទោះមិនមែនមានស្រុកកំណើតនៅខេត្តសៀមរាបក៏ដោយ។
សូមជ្រាបថា គិតចាប់ពីថ្ងៃទី១០ ខែមីនា ឆ្នាំ២០២១ ដល់ថ្ងៃទី១៣ ខែកក្កដា ឆ្នាំ២០២១ ខេត្តសៀមរាប មានប្រជាពលរដ្ឋចំណាកស្រុកត្រឡបមកពីក្រៅប្រទេសវិញមានចំនួន ៧៨៤៦នាក់ ស្រី៣១៦១នាក់។
គួរឲ្យដឹងដែរថា កាលពីពេលថ្មីៗកន្លងទៅនេះ រដ្ឋបាលខេត្តសៀមរាប បានចេញលិខិតផ្លូវការមួយ ដោយផ្អែកតាមសភាពការណ៍នៃការរីករាលដាលជំងឺកូវីដ-១៩ បំប្លែងខ្លួនថ្មីប្រភេទ ឌែលតា និងដើម្បីបង្ការទប់ស្កាត់ការរីករាលដាលជំងឺកូវីដ-១៩ បំប្លែងខ្លួនថ្មីប្រភេទឌែលតានេះ រដ្ឋបាលខេត្តបានធ្វើការណែនាំដល់គណៈអភិបាលក្រុង/ស្រុក បង្កើនការយកចិត្តទុកដាក់បន្ថែមទៀត។ ក្នុងត្រូវពង្រឹងវិធានការណ៍ចត្តាឡីស័ក នៅតាមមណ្ឌលឲ្យបានម៉ឺងម៉ាត់ ស្របតាមគោលការណ៍របស់ក្រសួងសុខាភិបាល ជាពិសេសចំពោះប្រជាពលរដ្ឋធ្វើចំណាកស្រុក ដែលត្រឡប់ទៅមូលដ្ឋានរស់នៅវិញ ត្រូវធ្វើការត្រួតពិនិត្យឲ្យមានម៉ត់ចត់ក្នុងករណីដែលប្រជាពលរដ្ឋ ពុំបានឆ្លងកាត់ការធ្វើចត្តាឡីស័ក នៅតាមព្រំដែន និងត្រូវពង្រឹងការអនុវត្តវិធានការទាំងផ្នែករដ្ឋបាល ផ្នែកសុខាភិបាល សំដៅបង្ការ គ្រប់គ្រង និងកាត់ផ្ដាច់នូវខ្សែរយៈចម្លងនែមេរោគកូវីដ-១៩ ប្រភេទថ្មីនេះ នៅតាមមូលដ្ឋាន ដែលត្រូវបានរកឃើញអ្នកដែលបានឆ្លងជំងឺនេះ៕
អត្ថបទ ៖ លោកស្រី ហែម បូរ៉ាន្នី
កែសម្រួលអត្ថបទ៖ លោក អ៊ុន ណារាជ្យ
