អាជ្ញាធរស្រុកអង្គរជុំ ខេត្តសៀមរាប នៅថ្ងៃទី១៤ ខែកក្កដានេះ បានសម្រេចបិទជាបណ្ដោះអាសន្ននូវផ្សារចារឈូក ស្រុកអង្គរជុំ ជាបណ្តោះអាសន្ន បន្ទាប់ពីក្រុមគ្រូពេទ្យរកឃើញមានអាជីវករក្នុងផ្សារនេះ និងអ្នកពាក់ព័ន្ធជាង៥០នាក់ទៀត មានវិជ្ជមានមេរោគកូវីដ-១៩។
បើតាមលោក លុក ផុស អភិបាលស្រុកអង្គរជុំ ខេត្តសៀមរាប បានឲ្យដឹងនៅព្រឹកថ្ងៃទី១៥ ខែកក្កដា ឆ្នាំ២០២១នេះថា រដ្ឋបាលស្រុក បានសម្រេចបិទផ្សារចារឈូកនេះកាលពីល្ងាចថ្ងៃទី១៤ ខែកក្កដា ឆ្នាំ២០២១ បន្ទាប់ពីរកឃើញអាជីវករនៅក្នុងផ្សារនេះមានវិជ្ជមានមេរោគកូវីដ-១៩ ។ លោកថា ការបិទនេះធ្វើឡើងមួយរយៈពេល ដើម្បីកាត់ផ្តាច់ការចម្លងនៃមេរោគកូវីដ-១៩នេះ។
លោកអភិបាលស្រុកបញ្ជាក់បន្ថែមថា កាលពីថ្ងៃទី១៤ ខែកក្កដាម្សិលមិញ ក្រុមគ្រូពេទ្យបានធ្វើតេស្តបងប្អូនប្រជាពលរដ្ឋដែលមានការពាក់ព័ន្ធសរុបចំនួន ៣៥២នាក់ ជាលទ្ធផលវិជ្ជមានចំនួន ៥២នាក់ ហើយនៅព្រឹកនេះ ហើយក្រុមគ្រូពេទ្យក៏កំពុងរកឃើញជាបន្តបន្ទាប់ទៀតដែរ។
ទន្ទឹមនឹងការរកឃើញនេះ រដ្ឋបាលស្រុកអង្គរជុំ ក៏បានជម្រាបជូនបងប្អូនប្រជាពលរដ្ឋ ដែលបានពាក់ព័ន្ធដោយផ្ទាល់ ឬដោយប្រយោល ជាមួយអ្នកវិជ្ជមាននៅក្នុងផ្សារចារឈូកនេះ និងអ្នកវិជ្ជមានផ្សេងៗទៀត សូមរួសរាន់ធ្វើចត្តាឡីស័កតាមផ្ទះក្នុងក្រុមគ្រួសាររៀងៗខ្លួនឱ្យបានគ្រប់១៤ថ្ងៃ ដោយមិនត្រូវពាក់ព័ន្ធ និងប៉ះពាល់ជាមួយអ្នកដទៃជាដាច់ខាត។ ប្រសិនបើមានការប្រែប្រួលសុខភាព សូមផ្តល់ព័ត៌មានមកកាន់លេខទូរស័ព្ទ០១២ ៩៥៥ ៤៧៤/០៧៧ ៧៨៩ ០០៧ ដើម្បីក្រុមការងារចាត់វិធានការក្នុងការយកសំណាកធ្វើតេស្តស្រាវជ្រាវ៕
អត្ថបទ៖ លោកជា ស្រស់
កែសម្រួល៖ លោក អ៊ុន ណារាជ្យ
