នៅព្រឹកថ្ងៃទី១៩ ខែកក្កដា ឆ្នាំ២០២១ លោក ទា គឹមសុទ្ឋ ប្រធានមន្រ្តីក្រសួងកសិកម្ម រុក្ខាប្រមាញ់ និងនេសាទខេត្តសៀមរាប បានដឹកនាំបើកកិច្ចប្រជុំបូកសរុបលទ្ធផលការងារឆមាសទី១ និងទិសដៅការងារឆមាសទី២ ឆ្នាំ២០២១ ដើម្បីឆ្លុះបញ្ចាំងការងារទៅនឹងផែនការប្រចាំឆ្នាំ២០២១ តាមរយៈការរាយការណ៍របស់ជំនាញទាំង១២ ចំណុះមន្ទីរដែលស្ថិតនៅក្នុងកម្មវិធីផែនការចំនួន៥ នៃជំនាញនីមួយ និងវាយតម្លៃផែនការដែលបានកំណត់ ឆ្នាំ២០២១ ក្នុងបរិបទកូវីដ-១៩ ដោយមានការអញ្ជើញចូលរួមពី លោក លោកស្រី ប្រធាន អនុប្រធានមន្ទីរ ប្រធាន អនុប្រធានការិយាល័យ ចំណុះមន្ទីរសរុបជាង២០រូបផងដែរ។
មានប្រសាសន៍ក្នុងឱកាសនោះលោក ទា គឹមសុទ្ឋ បានជំរុញដល់ថ្នាក់ដឹកនាំចំណុះមន្ទីរទាំងអស់ ត្រូវបន្តខិតខំដោះស្រាយបញ្ហាប្រឈម ដែលនៅសេសសល់ក្នុងពេលកន្លងមក និងបន្តអនុវត្តឲ្យមានប្រសិទ្ធភាពទិសដៅឆមាសទី២ ឆ្នាំ២០២១ បើទោះបីជាប្រទេសកម្ពុជា ក៏ដូចជាខេត្តសៀមរាបយើងស្ថិតនៅក្នុងបរិបទនៃរីករាលដាលដោយសារជំងឺកូវីដ-១៩ក្តី។
ក្នុងឱកាសនោះដែរ លោកប្រធានមន្ទីរ ក៏បានណែនាំដល់មន្ត្រីទាំងអស់គ្នាត្រូវបន្តរក្សាសាមគ្គីភាពផ្ទៃក្នុង ចែករំលែកបទពិសោធន៍ តាមជំនាញសមត្ថភាព ដើម្បីផ្តល់សេវាជូនប្រជាពលរដ្ឋនៅមូលដ្ឋានឲ្យមានប្រសិទ្ធិភាព និងបន្តជម្រុញកំណើនផលិតកម្មកសិផលគ្រប់ប្រភេទ លើកកម្ពស់ការស្រាវជ្រាវ និងការផ្សព្វផ្សាយកសិកម្ម ដើម្បីបង្កើនទិន្នផលដំណាំ កែលម្អគុណភាពផលិតផល និងឆ្លើយតបឲ្យទាន់ពេលវេលាជូនកសិករនូវគ្រោះមហន្តរាយធម្មជាតិនានា និងបន្តជម្រុញកំណើនផលិតកម្មសត្វគ្រប់ប្រភេទ ជាពិសេសការចាក់ថ្នាំបង្ការជំងឺសត្វ និងរោគឆ្លងពីសត្វ ដែលនាំឱ្យធានាបាននូវការ ផ្គត់ផ្គង់សត្វ និងសាច់ប្រកបដោយអនាម័យ និងសុវត្ថិភាព៕
អត្ថបទ និង រូបភាព៖ លោក យូ វង្ស
