បើតាមលោកឧត្ដមសេនីយ៍ទោ សុក រីនណា ប្រធានក្រុមចាក់វ៉ាក់សាំង និងជានាយសេនាធិការរបស់យោធភូមិភាគទី៤ បានឲ្យដឹងនៅល្ងាចថ្ងៃទី១៩ ខែក្កដានេះថា យុទ្ធនាករចាក់វ៉ាក់សាំងបង្ការជំងឺកូវីដ-១៩ ដូសទី១ ជូនប្រជាពលរដ្ឋនៅតាមក្រុង/ស្រុកចំនួន៤ ក្នុងខេត្តសៀមរាប រួមមាន៖ ក្រុងសៀមរាប, ស្រុកប្រាសាទបាគង, ស្រុកពួក និងស្រុកក្រឡាញ់ គិតត្រឹមថ្ងៃទី១៩ ខែកក្កដា ឆ្នាំ២០២១នេះ សរុបបានចំនួន ១៩២,៩៤៥ នាក់ ខណៈនៅតាមបណ្ដាស្រុកចំនួន៨ទៀត បានសរុបចំនួន ៦០,៥៩៥ នាក់។
លោកឧត្ដមសេនីយ៍ទោ សុក រីនណា បានបញ្ជាក់ថា ការចាក់វ៉ាក់សាំងបង្ការជំងឺកូវីដ-១៩ ក្នុងក្រុងសៀមរាប, ស្រុកប្រាសាទបាគង, ស្រុកពួក និងស្រុកក្រឡាញ់ អាចនឹងបញ្ចប់មុនការគ្រោងទុកមុនគេ ព្រោះនៅទីតាំងចាក់វ៉ាក់សាំង គឺមានសភាពស្បើយប្រជាពលរដ្ឋ ហើយទីតាំងនៅតាមឃុំ/សង្កាត់មួយចំនួន ក៏ត្រូវបានបិទបញ្ចប់ខ្លះផងដែរ។ ក្នុងនោះដែរនៅតាមទីតាំងមួយចំនួនដែលមានប្រជាពលរដ្ឋដែលមកទទួលវ៉ាក់សាំងចំនួនតិច ក៏ដោយសារពួកគាត់ខ្លះបានទៅធ្វើការចំណាកស្រុក ខ្លះជាមន្ត្រីរាជការដែលបានចាក់រួចរាល់ និងខ្លះទៀតជាមូលដ្ឋានដែលប្រជាពលរដ្ឋកំពុងធ្វើចត្ដាឡីស័ក ហើយអាជ្ញាធរនឹងរៀបចំចាក់នៅពេលក្រោយ។
លោកឧត្ដមសេនីយ៍ទោ បានបញ្ជាក់បន្ថែមថា ជាមួយនឹងការផ្តល់វ៉ាក់សាំងចាក់ជូនបងប្អូនប្រជាពលរដ្ឋនាពេលនេះ ក្នុងនាមអាជ្ញាធរខេត្ត ក៏ដូចជាប្រជាពលរដ្ឋសូមថ្លែងអំណរគុណយ៉ាងជ្រាលជ្រៅចំពោះរាជរដ្ឋាភិបាល ក្រុមការងារចាក់វ៉ាក់សាំង ពិសេស សម្តេចតេជោនាយករដ្ឋមន្ត្រី ដែលតែងតែគិតគូសុខទុក្ខប្រជាពលរដ្ឋគ្រប់កាលៈទេសៈ មិនគិតថាប្រជាពលរដ្ឋជួបទុក្ខលំបាកយ៉ាង ក៏សម្តេចនៅតែគិតគូប្រជាពលរដ្ឋជានិច្ច។ ជាមួយគ្នានោះលោកក៍សូមអំពាវនាវដល់ប្រជាពលរដ្ឋ សូមចូលរួមសហការក្នុងការអនុវត្តនូវវិធានការឱ្យខ្ជាប់ខ្ជួន ដើម្បីរៀបចំសណ្តាប់ធ្នាប់របៀបរៀបរយ និងជៀសវាងការឆ្លងជំងឺជាយថាហេតុ៕
អត្ថបទ៖ លោក ឈិត សាវី
កែសម្រួល៖ លោក អ៊ុន ណារាជ្យ