ក្រសួងសាធារណៈ និងដឹកជញ្ជូនបានព្រមានចាត់វិធានការផ្លូវច្បាប់ចំពោះអ្នកបើកបរល្មើសច្បាប់ចរាចរណ៍ផ្លូវ ដឹកលើសទម្ងន់ ដោយលើកឡើងថា នឹងរៀបចំកម្មវិធីដកពិន្ទុប័ណ្ណបើកបរ និងពិន័យបទល្មើសចរាចរណ៍ផ្លូវគោក តាមរយៈការស្កេនលើប័ណ្ណបើកបរ ដើម្បីកាត់បន្ថយពិន្ទុចំពោះអ្នកបើកបរយានយន្តខុសច្បាប់ ទៅតាមស្ថានបទល្មើសនៃច្បាប់ចរាចរណ៍ផ្លូវគោក។ នេះបើតាមការបញ្ជាក់របស់ឯកឧត្ដមទេសរដ្ឋមន្ដ្រី ស៊ុន ចាន់ថុល រដ្ឋមន្ដ្រីក្រសួងសាធារណៈការ និងដឹកជញ្ជូន ក្នុងពិធីបើកអោយដំណើរជាផ្លូវការនូវមណ្ឌលផ្ដល់សេវាសាធារណៈរបស់ក្រសួងសាធារណៈការ និងដឹកជញ្ជូន នៅក្រុងសៀមរាប កាលពីថ្ងៃទី២១ ខែកក្កដាកន្លងទៅ។
ឯកឧត្ដមទេសរដ្ឋមន្ដ្រី ស៊ុន ចាន់ថុល បញ្ជាក់ទៀតថា បច្ចុប្បន្នក្រុមការងារជំនាញក្រសួង និងអគ្គស្នងការដ្ឋាននគរបាលជាតិ ក្រសួងមហាផ្ទៃ បានសហការរៀបកម្មវិធីដកពិន្ទុប័ណ្ណបើកបរ និងពិន័យបទល្មើសចរាចរណ៍ផ្លូវគោក អាចចាប់យករូបភាពយានយន្តដែលបើកបរល្មើសច្បាប់ តាមរយៈការស្កេនលើប័ណ្ណបើកបរ ដើម្បីកាត់បន្ថយពិន្ទុចំពោះអ្នកបើកបរយានយន្តខុសច្បាប់ទៅតាមស្ថាននៃបទល្មើស។ ក្នុងនោះក៍ចាត់វិធានការចំពោះអ្នកមិនពាក់ខ្សែក្រវាត់សុវត្ថិភាព បើកបរលើសល្បឿនកំណត់ បើកបរក្នុងស្ថានភាពស្រវឹង ផ្ទុកមនុស្សលើសកំណត់ ឬល្មើសភ្លើងសញ្ញា ជាពិសេសទៅទៀតការដឹកទំនិញលើសទម្ងន់ជាដើម។
ឯកឧត្តមទេសរដ្ឋមន្ត្រី បញ្ជាក់បន្ថែមថា សម្រាបកម្មវិធីដកពិន្ទុប័ណ្ណបើកបរនេះ បង្កើតឡើងដើម្បីឱ្យអ្នកបើកបរគោរពច្បាប់ចរាចរណ៍ កាត់បន្ថយគ្រោះថ្នាក់ចរាចរណ៍ ដោយហេតុថា។ ជារៀងរាល់ឆ្នាំរដ្ឋបានខាតបង់ថវិកាជាតិប្រមាណ ៣៥០លានដុល្លារអាមេរិក ដោយសារគ្រោះថ្នាក់ចរាចរណ៍ និងបានបង្កឱ្យប្រជាពលរដ្ឋរងរបួសស្លាប់ ខូចខាតទ្រព្យសម្បត្តិឯកជន និងចំណាយលើការបង់ថ្លៃព្យាបាល និងបានអំពាវនាវឱ្យបងប្អូនប្រជាពលរដ្ឋចូលរួមជាមួយរាជរដ្ឋាភិបាលគោរពច្បាប់ចរាចរណ៍ទាំងអស់គ្នា ក្នុងនោះក៏សូមសំណូមពរដល់អ្នកប្រើប្រាស់ផ្លូវទាំងអស់គ្នា ជាពិសេសក្រុមហ៊ុនដឹកទំនិញសូមគោរពច្បាប់ចរាចរ ច្បាប់ផ្លូវថ្នល់ កុំដឹកទំនិញលើសទម្ងន់នៃច្បាប់បានកំណត់ ដែលផ្លូវឲ្យផ្លូវយើងឆាប់ខូចរីករិល ខូចមុនអាយុកាលនៃផ្លូវផងដែរ។
ឯកឧត្ដម ស៊ុន ចាន់ថុល ក៏បានឲ្យដឹងថែរថា កម្មវិធីដកពិន្ទុប័ណ្ណបើកបរនេះគ្រោងនឹងគោរពរាយការណ៍ជូនសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោកនាពេលឆាប់ៗនេះ ដើម្បីស្នើសុំការឯកភាព និងអាចដាក់ឱ្យប្រើប្រាស់ផ្លូវការ នៅដើមឆ្នាំ២០២២ខាងមុខ។ ជាមួយគ្នានោះឯកឧត្តមក៏បានសំណូមពរផងដែរដល់មនុស្សបួនប្រភេទ រួមមាន៖ អ្នកថា អ្នកធ្វើ អ្នក ឈរមើល និងអ្នកទិទៀន ឱ្យចូលរួមជាមួយរាជរដ្ឋាភិបាល ក្រោមការដឹកនាំដ៏ត្រឹមត្រូវរបស់សម្ដេចអគ្គមហា សេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដើម្បីកសាងប្រទេសជាតិយើងឱ្យបានរុងរឿងថែមទៀត និងបានរម្លឹកនូវពាក្យស្លោកមួយឃ្លាថា៖ សំដីអត់ប្រយោជន៍នាំគ្រោះដល់ជាតិ ការងារមានប្រសិទ្ធភាពនាំជាតិរុងរឿង៕
អត្ថបទ និងរូបភាព៖ លោក ឈិត វី
កែសម្រួលអត្ថបទ៖ លោក អ៊ុន ណារាជ្យ
