ថ្លែងក្នុងពិធីប្រកាសផ្ទេរភារកិច្ច តែងតាំងមុខតំណែងស្នងការ នៃស្នងការដ្ឋាននគរបាលខេត្តព្រះវិហារ កាលពីពេលថ្មីៗនេះ ឯកឧត្តម នាយឧត្តមសេនីយ៍ ខេង សុមេធ អគ្គស្នងការរងនគរបាលជាតិ និងជាមេបញ្ជាការនគរបាលជាតិទទួលបន្ទុកទិសភូមិភាគទី៤ និងទី៥ បានបញ្ជាក់ថា កំណែទម្រង់ស៊ី ជម្រៅ ដែលត្រូវយកចិត្តទុកដាក់ នោះគឺការពង្រឹងយន្តការគ្រប់គ្រងដឹកនាំកម្លាំងច្បាស់លាស់ មានតម្លាភាព និង លុប បំបាត់អំពើអសកម្ម ដើម្បីពង្រឹងបន្ថែមជំនឿទុកចិត្តរបស់ប្រជាពលរដ្ឋ មកលើគោលនយោបាយដឹកនាំរបស់រាជ រដ្ឋាភិបាលស្របច្បាប់ ដែលប្រសូត្រចេញពីឆន្ទៈរបស់រាស្ត្រ តាមរយៈនៃការបោះឆ្នោត ពិសេស តួនាទីនិងភារកិច្ច របស់មន្ត្រីនគរបាលជាតិទាំងអស់ គឺបម្រើរាស្ត្រ និងបម្រើសង្គម ជាតិ ចៀសវាងឲ្យបានការយកតួនាទី ភារកិច្ចជាមុខរបរ ដើម្បីលាភសក្ការៈផ្ទាល់ខ្លួន ។
ឯកឧត្តម ខេង សុមេធ មានប្រសាសន៍ទៀតថា បន្ថែមពីលើនេះ គឺការបម្រើសេវាសាធារណៈជូនប្រជាពលរដ្ឋបានល្អប្រសើរ ពង្រឹងយន្តការដោះស្រាយទំនាស់ពីដើមដំបូងឲ្យមានប្រសិទ្ធភាព តម្លាភាព ការប្រើដោយកម្លាំង ដើម្បីដោះស្រាយបញ្ហានោះ វាមិនមែនជាមធ្យោបាយល្អនោះឡើយ រួមទាំងការអនុវត្តផែនការរៀបចំភូមិ ឃុំ-សង្កាត់ “ ស “ គ្មានគ្រឿងញៀន គឺជាគោលដៅនៃការកសាងមូលដ្ឋានមានសុវត្ថិភាព ព្រោះបញ្ហាគ្រឿងញៀន នៅតែជាក្តីកង្វល់របស់ប្រជាពលរដ្ឋ ព្រោះអាចនិយាយបានថា វាជាឃាតកបំផ្លាញសុភមង្គលគ្រួសារ និង សង្គមជាតិ បើទោះជាកម្លាំងសមត្ថកិច្ចបានចេញប្រតិបត្តិការបង្ក្រាប ទទួលបានលទ្ធផលជាក់ស្តែងជាបន្តបន្ទាប់ក៏ដោយ ៕
អត្ថបទ និង រូបថត : លោក ហិន គឹមឡេង
កែសម្រួលអត្ថបទ : លោក លីវ សាន្ត
