កាលថ្ងៃទី០៩ ខែកុម្ភៈ ឆ្នាំ២០១៩នេះ បុគ្គលិក គ្រឹះស្ថានមីក្រូហិរញ្ញវត្ថុហត្ថាកសិករ លីមីតធីត ចំនួនប្រមាណជិត ៤០០ នាក់ បានរៀបចំសកម្មភាពការងារសង្គម សម្អាតបរិស្ថានក្នុងក្រុងសៀមរាប ក្រោមប្រធានបទ “ខ្ញុំ ស្រឡាញ់ទីក្រុងស្អាត” ដែល កម្មវិធីនេះគឺផ្តោតការយកចិត្តទុកដាក់ជាសំខាន់ទៅលើបរិស្ថានស្អាត និង ការដាក់បង់អង្គុយនៅតាមទីសាធារណៈ ដើម្បីបង្កើនសោភ័ណភាព ជាប្រយោជន៍សម្រាប់សាធារណជនទូទៅ ។
លោក ម៉ិច សុខមេត្រី អគ្គនាយកអភិវឌ្ឍន៍អាជីវកម្ម នៃគ្រឹះស្ថានមីក្រូហិរញ្ញវត្ថុ ហត្ថាកសិករ លីមីតធីត បានមានប្រសាសន៍ថា ការងារបរិស្ថាននៅថ្ងៃនេះ ជាសកម្មភាពថ្មីបន្ថែមទៀត ដែលបានបង្ហាញកាន់តែច្បាស់អំពីការយកចិត្តទុកដាក់របស់ហត្ថាកសិករក្នុងការចូលរួម ចំណែកក្នុងការ អភិវឌ្ឍន៍សុខុមាលភាពសង្គមកម្ពុជាឲ្យកាន់តែប្រសើរឡើង ដូច្នេះតាមរយៈនេះ សូមថ្លែងអំណរគុណដល់លោកអភិបាលរងក្រុង និងអាជ្ញាធរគ្រប់លំដាប់ថ្មាក់ដែលបានចូលរួម និងជួយជ្រោមជ្រែង ទាំងអស់ឲ្យកម្មវិធីក្នុងថ្ងៃនេះប្រព្រឹត្តទៅដោយរលូន។
លោក ម៉ិច សុខមេត្រី មានប្រសាសន៍ទៀតថា នេះមិនមែនជាលើកទីមួយទេ ដែលហត្ថាកសិករបានចូលរួមចំណែកក្នុងការងារសង្គម ហត្ថាកសិករបានធ្វើការងារសង្គមជាច្រើនដូចជា សាងសង់អគារមន្ទីពេទ្យ សាងសង់អាគារសិក្សា ផ្តល់សម្ភារសិក្សា អណ្តូងទឹក បង្រៀនអតិថិជននិងសិស្សានុសិស្សអំពីចំណេះដឹងហរិញវត្ថុជាដើម ។
មានប្រសាសន៍ក្នុងឱកាសនោះ លោក បូ មេងទ្រី អភិបាលរងក្រុងសៀមរាប បានសម្តែងនូវការកោតសរសើរចំពោះហត្ថាកសិករដែលតែងតែចំណាយពេលវេលា ថវិកា និងលើកទឹកចិត្តឲ្យបុគ្គលិកចូលរួមកិច្ចការសង្គមតាមរូបភាពផ្សេងៗកន្លងមក ជាពិសេស ទាំងថ្នាក់ដឹកនាំ និងបុគ្គលិករបស់ហត្ថាកសិករ ដែលតែងតែចំណាយ ពេលវេលា និងថវិកាដើម្បីចូលរួមចំណែកក្នុងការអភិវឌ្ឍន៍សង្គម ជាក់ស្តែងដូចការងារសម្អាតបរិស្ថាន និងការផ្តល់ បង់អង្គុយសំរាប់សារណៈជននៅក្នុងក្រុងសៀមរាបនាថ្ងៃនេះ ហើយសង្ឃឹមថា សកម្មភាពនេះ គឺគម្រូដ៏ល្អក្នុងការជំរុញក្រុមហ៊ុនឯកជននានា ឲ្យចូលរួមក្នុងកិច្ចការសង្គមឲ្យបានច្រើនផងដែរ ៕
អត្ថបទ និង រូបថត : លោក យូ វង្ស
កែសម្រួលអត្ថបទ : លោក លីវ សាន្ត
