ស្របពេលដែលខេត្តសៀមរាប ទទួលរងនូវឥទ្ធិពលរាំងស្ងួតនៃបាតុភូតអែលនីណូ ក្នុងឆ្នាំ២០១៩នេះ សាខាកាកបាទក្រហមកម្ពុជា ខេត្តសៀមរាប បានប្រគល់អណ្ដូងទឹកស្អាតចំនួន ៦ ប្រភេទអណ្ដូងស្នប់អាហ្វ្រីដេស៍ ជូនដល់ប្រជាពលរដ្ឋនៅសហគមន៍ ភូមិបេង ចំនួន១ ភូមិស្មាច់ ចំនួន១ ភូមិរំដេង ចំនួន២ និងភូមិព្រិច ចំនួន២ ក្នុងឃុំត្រាំសសរ ស្រុកស្រីស្នំ ខេត្តសៀមរាប។
មានប្រសាសន៍នាឱកាសនោះ លោកជំទាវបណ្ឌិត គួយ ណាលីន ឃឹមប៊ុនសុង អនុប្រធានគណៈកម្មាធិការសាខា បានបង្ហាញពីការព្រួយបារម្ភរបស់ថ្នាក់ដឹកនាំកាកបាទក្រហមកម្ពុជា ខណៈខេត្តសៀមរាប ក៏ដូចជាប្រទេសកម្ពុជារងឥទ្ធិពលនូវបាតុភូតរាំងស្ងួត អែលនីណូនេះ។
លោកជំទាវ បានអំពាវនាវ ទៅដល់ប្រជាពលរដ្ឋ នៅស្រុកស្រីស្នំទាំងអស់ ក៏ដូចជាតំបន់ដែលរងផលប៉ះពាល់ខ្លាំងនៃគ្រោះរាំងស្ងួតនេះ ត្រូវធ្វើការរក្សាទឹកទុក ត្រូវជូនដំណឹងមកអាជ្ញាធរមូលដ្ឋានករណីពុំមានទឹកប្រើប្រាស់ ព្រោះរដូវប្រាំងមានរយៈពេលជាច្រើនខែទៀត ដូច្នេះបងប្អូនត្រូវសួរនាំព័ត៌មានបន្ថែមពីអាជ្ញាធរមូលដ្ឋាន ចៀងវាងខ្វះខាតទឹកប្រើប្រាស់ប្រចាំថ្ងៃ។ មួយវិញទៀត សុខភាពកុមារក៏ជារឿងគួរឲ្យព្រួយបារម្ភផងដែរ បើឃើញថា កុមារខុសពីប្រក្រតីត្រូវប្រញាប់បញ្ជូនទៅមណ្ឌលសុខភាពដែលនៅជិតបំផុត។
សូមបញ្ជាក់ថា៖ អណ្ដូងទឹកស្អាតចំនួន៦ ដែលប្រគល់ដោយសាខាកាកបាទក្រហមកម្ពុជា ខេត្តសៀមរាបនាពេលនេះ ជាការឧបត្ថម្ភដោយសប្បុរសជនចិនឈ្មោះ លោក ហ៊ឺ ចាយ លាង (HE JIA LIANG) ។ ក្នុងនោះ ប្រជាពលរដ្ឋដែលមានវត្តមានក្នុងពេលនោះ ម្នាក់ៗទទួលបាន សារុង១ និងថវិកា១ម៉ឺនរៀលផងដែរ៕
អត្ថបទ និង រូបថត : លោក គឿន វេត
កែសម្រួលអត្ថបទ : លោក សេង ផល្លី
