ថវិកានិងសម្ភារៈសិក្សា ទទួលបានពីកម្មវិធី”ដំណើរសប្បុសរួមមិត្តលើកទី៥” ឆ្នាំ២០១៩ នឹងឧបត្ថម្ភទៅដល់សិស្សានុសិស្សជិត១៥០០នាក់នៃសាលាបឋមសិក្សានិងអនុវិទ្យាល័យ ចំនួន ៥ ក្នុងនៅស្រុកស្វាយលើ និងស្រុកប្រាសាទបាគង ក្នុងខេត្តសៀមរាប ដែលជួបប្រទះនឹងភាពខ្វះខាត។
យោងតាមរបាយការណ៍ កម្មវិធីនេះបានបង្កើតឡើងនៅឆ្នាំ២០១៥ និងបានរៀបចំដំបូងនៅខេត្តព្រៃវែង ក្រោយមកធ្វើនៅខេត្តតាកែវ បាត់ដំបង ស្វាយរៀងនិងលើកទី៥នៅខេត្តសៀមរាបនេះ។ គោលបំណងនៃកម្មវិធីនេះ គីដើម្បីកៀងគរថវិកានិងសម្ភារៈសិក្សាពីសប្បុរសជននានា ដើម្បីឧបត្ថម្ភដល់ សិស្សានុសិស្សដែលកំពុងសិក្សាជួបការខ្វះខាតនូវសម្ភារៈសិក្សាផ្សេងៗ ធ្វើយ៉ាងណាឲ្យពួកគាត់ មានឱកាសបានបន្តការសិក្សា យ៉ាងហោចណាស់ឱ្យចប់ថ្នាក់ទី១២ដែរ។
ថ្លែងនៅក្នុងពិធីនោះ លោក ពៅ ពិសិដ្ឋ អភិបាលរងខេត្តបានមានប្រសាសន៍លើកទឹកចិត្ត និងផ្ដាំផ្ញើដល់សិស្សានុសិស្សទាំងអស់ ត្រូវបន្តការខិតខំប្រឹងប្រែងរៀនសូត្រ និងប្រែក្លាយខ្លួនជាសិស្សល្អ កូនល្អ និងមិត្តល្អ ជាសិស្សដែលពូកែ សម្រាប់ជាសគំរូល្អដល់ប្អូនៗជំនាន់ក្រោយៗទៀត និងអ្វីដែលសំខាន់ផងនោះ គឺហាត់ពត់ខ្លួនឲ្យក្លាយជាពលរដ្ឋល្អ នៅក្នុង សង្គមជាតិ ចៀសវាងនូវអំពើអបាយមុខល្បែងពាលាគ្រប់ប្រភេទ និងគេចឱ្យឆ្ងាយពីគ្រឿងញៀន ព្រមទាំងចូលរួមគោរពច្បាប់ចរាចរណ៍ផ្លូវគោកឱ្យបានគ្រប់ៗគ្នា ដើម្បីចៀសវាងពីគ្រោះថ្នាក់ជាយថាហេតុ។
កម្មវិធី”ដំណើរសប្បុសរួមមិត្តលើកទី៥” ឆ្នាំនេះ ប្រារព្ឋពិធីនៅក្នុងបរិវែណអនុវិទ្យាល័យហ៊ុន សែន រលួស ស្រុកប្រាសាទបាគង ខេត្តសៀមរាប រៀបចំដោយអគ្គនាយកដ្ធានឧត្តមសិក្សា នៃក្រសួងអប់រំយុវជននិងកីឡា ក្រោមការសម្របសម្រួល របស់សាកលវិទ្យាល័យសៅស៏អ៊ីស្តអេយសៀ ដោយមានការចូលរួមនិងឧបត្ថម្ភពីគ្រឹះស្ថានសិក្សា បណ្ណាគារ ភ្នាក់ងារចែកចាយសៀវភៅនិងសម្ភារសិក្សា ក្រុមអតីតនិស្សិតមកពីបរទេស ដូចជាអតីតសហភាពសូវៀត ជប៉ុន និងអូស្រា្តលី អង្គភាពនានាចំណុះក្រសួងអបរំយុវជននិងកីឡា ថ្នាក់ដឹកនាំ មន្ត្រីរាជការ អាជីវករ សាស្ត្រាចារ្យ និស្សិត និងសប្បុរសជនជាតិ និងអន្តរជាតិនានាជាច្រើនកុះករ។
សូមបញ្ជាក់ថា ថវិកាដែលប្រមូលបាន មួយចំនួនបានយកទៅទិញសម្ភារៈសិក្សាសម្រាប់សិស្សានុសិស្ស គ្រឿងសង្ហារឹមក្នុងបណ្ណាល័យ សាងសង់កន្លែងលាងដៃនិងអាងចំរោះទឹកស្អាត និងឧបត្ថម្ភសិស្សឆ្នើមពីររូប និងឧបត្ថម្ភសិស្សឆ្នើមពីររូប ដើម្បីទៅប្រកួតក្នុងកម្មវិធីកម្រិតពិភពលោកមួយក្នុងប្រទេសចិន។
ដំណើរសប្បុរសធម៌នេះដែរ គឺជាកម្មវិធីប្រចាំឆ្នាំរបស់អគ្គនាយកដ្ឋានឧត្តមសិក្សា រៀបចំឡើងក្នុងគោលបំណងលើកកម្ពស់កិច្ចការសង្គម បង្កើនភាពស្និទ្ឋស្នាលនិងចែករំលែកនូវសេចក្តីស្រឡាញ់ដល់អ្នកដែលកំពុងត្រូវការភាពកក់ក្តៅ ជាពិសេសកុមារកំព្រា និងសិស្សានុសិស្ស ដែលកំពុងជួបភាពខ្វះខាត និងជួបការលំបាកក្នុងការសិក្សា។
អត្ថបទ និង រូបថត : លោក យូ វង្ស
កែសម្រួលអត្ថបទ : លោក សេង ផល្លី
