នៅថ្ងៃចន្ទ ទី១១ ខែកុម្ភៈ ឆ្នាំ២០១៩ម្សិលមិញនេះ ឯកឧត្តម ហង់ ពៅ អគ្គនាយកស្ដីទីនៃអាជ្ញាធរជាតិអប្សរា បានដឹងនាំគណៈប្រតិភូនៃស្ថានទូតបារាំង ដើម្បីពិនិត្យមើលពីស្ថានភាពនៃជួសជុលប្រាសាទមេបុណ្យខាលិច ឬបារាយណ៍ខាងលិចផងដែរ។
ក្នុងឱកាសនោះដែរ ឯកឧត្តម ហង់ ពៅ បានមានប្រសាស៍ថា បន្ទាប់ពីការជួសជុលនៃប្រាសាទមេបុណ្យខាងលិច ត្រូវបានផ្អាក់ការជួសជុលមួយរយៈ បន្ទាប់ពីមានបញ្ហាមួយចំនួន និងកង្វះថវិកានាពេលកន្លងមកនេះ ឥឡូវការដ្ឋានត្រូវបានចាប់ផ្តើមដំណើរការឡើងវិញហើយ តាមរយៈកិច្ចសហប្រតិបត្តិការរវាងស្ថានទូតបារាំង និងអាជ្ញាធរជាតិអប្សរា។
ឯកឧត្តម ហង់ ពៅ អគ្គនាយកស្ដីទីនៃអាជ្ញាធរជាតិអប្សរាបានមានប្រសាស៍បន្តថា ក្នុងដំណើរទស្សនកិច្ចនៅក្នុងការដ្ឋានជួសជុលប្រាសាទមេបុណ្យខាងលិច គណៈប្រតិភូនៃស្ថានទូតបារាំង ដឹកនាំដោយលោកគីយូមណាកហ្សឺឡេ(Guillaume NARJOLLET)ដែលជាសហប្រធានក្នុងគម្រោងជួសជុលប្រាសាទមេបុណ្យខាងលិច ក៏បានប្រគល់នូវរថយន្តចំនួន២គ្រឿងដល់អាជ្ញាធរជាតិអប្សរា ដើម្បីយកមកប្រើប្រាស់សម្រាប់ការដ្ឋាននេះផងដែរ។
សូមបញ្ជាក់ដែរថា ប្រាសាទមេបុណ្យដែលស្ថិតនៅចំកណ្ដាលបារាយណ៍ទឹកថ្លា បានចាប់ផ្តើមជួសជុលឡើងវិញចាប់តាំងពីឆ្នាំ ២០១២មកម្លេះ ដោយមានកិច្ចសហប្រតិបត្តិការរវាងប្រទេសបារាំង និងកម្ពុជា។ ការដ្ឋាននេះមានភាពស្មុគស្មាញ ដោយសារវាស្ថិតនៅចំកណ្ដាលបារាយណ៍ទឹកថ្លា ឬបារាយណ៍ខាងលិច ដែលត្រូវបានលិចទឹកព័ទ្ធជុំវិញស្ទើរតែពេញមួយឆ្នាំ បង្កឱ្យមានការលំបាកក្នុងការដឹកជញ្ជូនសម្ភារ ក៏ដូចជាតំឡើងឧបករណ៍ប្រើប្រាស់ផ្សេងៗទៀត។ បញ្ហានេះអាជ្ញាធរជាតិអប្សរា បានជួយជាបច្ចេកទេស ក្នុងការបញ្ចៀសទឹកនៅក្នុងបរិវេណការដ្ឋានជួសជុល ដើម្បីអនុញ្ញាតឱ្យដំណើរការ១២ខែក្នុងមួយឆ្នាំ។
អត្ថបទ និង រូបថត ៖ លោក ម៉ាត់ អារីហ្វីន
