ថ្លែងក្នុងឱកាសពិធីធ្វើជំរឿនសមាជិក គណៈឱសថការីកម្ពុជាប្រចាំខេត្តសៀមរាប នៅថ្ងៃទី១២ខែកុម្ភៈឆ្នាំ២០១៩លោក ឱសថការី បាន បុត្តា ប្រធានក្រុមប្រឹក្សាគណៈឱសថការីជាតិនៃគណៈឱសថការីកម្ពុជា បានអំពាវនាវដល់ឱសថការីទាំងឡាយណា ដែលមិនទាន់ចូលជាសមាជិកគណៈឱសថការីកម្ពុជា សូមរួសរាន់ចុះឈ្មោះចូលជាសមាជិកនៃឱសថការីកម្ពុជានៅតាមបណ្តារាជធានីខេត្ត។
លោក បានសំណូមពរដល់សមាជិក សមាជិកានៃគណៈឱសថការីកម្ពុជាទាំងអស់ សូមពិនិត្យឡើងវិញនូវចំណុចខ្វះខាតរបស់ខ្លួនក្នុងការប្រកបវិជ្ជាជីវៈ ត្រូវពង្រឹងនូវសាមគ្គីផ្ទៃក្នុង ចេះយោគយល់និងអធ្យាស្រ័យឱ្យគ្នាទៅវិញទៅមក និងត្រូវគោរពឱ្យបានខ្ជាប់ខ្ជួននូវ ច្បាប់និងលិខិតបទដ្ឋាន ឯកសារគតិយុត្តិ របស់ក្រសួងសុខាភិបាល ដែលពាក់ព័ន្ឋទៅនឹងវិជ្ជាជីវៈរបស់ខ្លួន ពិសេស ក្រមសិលធម៌វិជ្ជាជីវៈដើម្បីវឌ្ឍនភាពនៃវិជ្ជាជីវៈរបស់ទាំងអស់គ្នា។
លោក បន្តថា៖ គណៈឱសថការីកម្ពុជាបានបង្កើតឡើងនៅឆ្នាំ២០១១ ដោយព្រះរាជក្រិត្យ បច្ចុប្បន្ននេះមានសមាជិ សមាជិកា ជាង៣០០០នាក់ ក្នុងនោះខេត្តសៀមរាប មាន២៨៤នាក់។ថ្មីៗកន្លមកនេះ គណៈឱសថការីកម្ពុជា បានធ្វើជំរឿន ជាបន្តបន្ទាប់នៅតាមបណ្តារាជធានីខេត្តជាច្រើនហើយ ក្រោយពីខេត្តសៀមរាបនេះទៅនឹងបន្តជំរឿននៅរាជធានីភ្នំពេញចុងក្រោយគេ។
លោក បាន បុត្តា បញ្ជាក់ថា៖ការធ្វើជំរឿននេះ ផ្តល់ឱកាសដល់សមាជិកសមាជិកាទទួលបាននូវបច្ចុប្បន្នភាពច្បាស់លាស់នៃឯកសារផ្ទាល់ខ្លួន ដើម្បីទទួលបានវិញ្ញាបនបត្រ និងជួបជុំគ្នាដើម្បីប្រាស្រ័យទាក់ទងបង្កើនភាពស្និទ្ឋស្នាល និង ចែករំលែកបទពិសោធពីគ្នាទៅវិញទៅមកផងដែរ។
សូមបញ្ជាក់ថា៖នៅថ្ងៃទី១២ខែកុម្ភៈឆ្នាំ២០១៩ គណៈឱសថការីកម្ពុជា បានរៀបចំធ្វើការជំរឿនដល់សមាជិក សមាជិកា គណៈឱសថការីកម្ពុជាប្រចាំខេត្តសៀមរាប នៅសណ្ឋាគារអប្សរាអង្គរខេត្តសៀមរាប។ការជំរឿននេះធ្វើឡើងក្នុងគោលបំណង ពិនិត្យបច្ចុប្បន្នភាព រកឲ្យឃើញនូវចំនួនពិតប្រាកដជាក់លាក់ នៃឱសថការីតាមបណ្តារាជធានីខេត្តនិងដើម្បីរៀបចំលិខិតបទដ្ឋានថ្មី សម្រាប់ផ្តល់វិញ្ញាបនបត្របញ្ជាក់ថាជាសមាជិកនៃគណៈឱសថការីកម្ពុជា ដើម្បីបានប្រើប្រាស់ផ្ទាល់ខ្លួន រួមជាមួយអាជ្ញាប័ណ្ណប្រកបវិជ្ជាជីវៈ ជាដើម។
អត្ថបទ និង រូបថត : លោក យូ វង្ស
