ក្រសួងអប់រំ អប់រំយុវជន និងកីឡា នឹងជ្រើសរើសសិស្សឆ្នើមពីររូប ពីអនុវិទ្យាល័យ ហ៊ុន សែន រលួស ស្ថិតនៅស្រុកប្រាសាទបាគង ខេត្តសៀមរាប ដើម្បីទៅចូលរួមកម្មវិធីប្រកួតប្រជែងកម្រិតពិភពលោក ដែលនឹងប្រព្រឹត្តិឡើងនៅខែកក្កដាឆ្នាំ២០១៩នាទីក្រុងសៀងហៃ ប្រទេសចិន។
ថ្លែងក្នុងកម្មវិធី “ដំណើរសប្បុសរួមមិត្តលើកទី៥” ដែលរៀបចំធ្វើឡើងនៅក្នុងអនុវិទ្យាល័យ ហ៊ុន សែន រលួស ឯកឧត្តម ម៉ក់ ងយ អគ្គនាយកនៃអគ្គនាយកដ្ឋានឧត្តមសិក្សា នៃក្រសួងអប់រំ អប់រំយុវជន និងកីឡា មានប្រសាសន៍ថា៖ កម្មវិធីប្រកួតប្រជែងកម្រិតពិភពលោក ឈ្មោះថា ទិវាប្រវត្តិសាស្ត្រធម្មជាតិ និងកោះ ត្រូវបានប្រទេសចិនប្រារព្ធឡើងជារៀងរាល់ឆ្នាំ សម្រាប់ផ្ដល់ឲ្យឱកាសទៅដល់សិស្សានុសិស្សបង្ហាញពីសមត្ថភាព និងចំណេះដឹងរបស់ខ្លួន។ តួយ៉ាង នៅឆ្នាំ២០១៩នេះ ក្រសួងនឹងជ្រើសរើសសិស្សចំនួន ពីររូប ដែលកំពុងសិក្សានៅកម្រិតថ្នាក់ទី៧ ទី៨ និងទី៩ នៃអនុវិទ្យល័យ ហ៊ុន សែន រលួសនេះ ដើម្បីទៅចូលរួមព្រឹត្តិការណ៍ពិភពលោកនេះ។ ហេតុនេះ ដើម្បីបានជាប់ជាបេក្ខភាពទៅចូលរួមប្រកួត គឺទាមទារឲ្យសិស្សានុសិស្សទាំងអស់ ខិតខំសិក្សារៀនសូត្រឲ្យបានខ្លាំងក្លាថែមទៀត។
ឆ្លៀតក្នុងឱកាសនោះ ឯកឧត្តម ម៉ក់ ងយ មានប្រសាសន៍លើកទឹកចិត្តទៅដល់ក្មួយៗ ជាទំពាំងស្នងឬស្សីថា សម័យនេះខុសគ្នាឆ្ងាយទៅនឹងរៀមច្បងយើងសម័យមុនៗ ព្រោះប្អូនៗ ក្មួយៗនាពេលនេះរស់នៅក្នុងយុគសម័យប្រទេសមានសន្តិភាព ក្រោមការដឹកនាំរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី និងនៅក្រោមគោលនយោបាយឈ្នះ ឈ្នះ របស់សម្តេច បាននាំមកនូវសន្តិភាពពេញលេញ និងការរីកចម្រើនលើគ្រប់វិស័យ សម្រាប់កម្ពុជា។
ប៉ុន្តែអ្វីដែលប្អូនៗកំពុងទទួលបាននាពេលនេះ សុទ្ឋតែបានមកពីការខិតខំពុះពារការលំបាក់សព្វបែបយ៉ាងរបស់រៀមច្បងយើងជំនាន់មុនៗ បានបន្សល់ទុកមក។ ជាឧទាហរណ៍មួយជាក់ស្ដែង កម្មវិធី”ដំណើរសប្បុរសរួមមិត្ត” នេះធ្វើឡើងដើម្បីកៀងគរថវិកាពីសប្បុរសជនរួមគ្នា ដើម្បីជួយដល់ប្អូនៗ ក្មួយៗជាសិស្សានុសិស្ស ដែលកំពុងសិក្សាជួបការខ្វះខាតនូវសម្ភារៈសិក្សាផ្សេងៗ ធ្វើយ៉ាងណាឱ្យប្អូនៗដែលជួបការលំបាកនោះ មានឱកាសបានបន្តការសិក្សា យ៉ាងហោចណាស់ឱ្យចប់ថ្នាក់ទី១២ដែរ។ ជំនាញអ្វីក៍ដោយសុទ្ឋតែសំខាន់ និងមានប្រយោជន៍ ពិសេសបំផុតគឺការខិតខំរៀនសូត្ររបស់ក្មួយៗខ្លួនឯង។
ចូលរួមក្នុងឱកាសនេះដែរ លោក សៀន សុវណ្ណា សាកលវិទ្យាធិការ នៃសាកលវិទ្យាល័យសៅស៏អ៊ីស្ត អេយសៀ បានថ្លែងអំណរគុណ ដល់ថ្នាក់ដឹកនាំ និងសប្បុរសជន នៃកម្មវិធីដំណើរសប្បុរសរួមមិត្តលើកទី៥ បានអញ្ជើញមកកាន់ខេត្តសៀមរាបនាពេលនេះ ដែលឆ្លើយតបតាមសំណូមពររបស់លោក ដើម្បីបង្វែរមូលនិធិនេះ មកជួយដល់កុមារនៅស្រុកប្រាសាទបាគងនាពេលនេះ។
អត្ថបទ និង រូបថត : លោក យូ វង្ស
កែសម្រួលអត្ថបទ : លោក សេង ផល្លី
