បុរសវ័យ ៣០ឆ្នាំម្នាក់ ត្រូវបានសមត្ថកិច្ចបញ្ជាក់ថា បានបាត់ម៉ូតូមួយគ្រឿង ខណៈគាត់ស្រវឹងបើកបរម៉ូតូទៅមុខពុំរួចក៏ឈប់ម៉ូតូដេក ចំណុចភូមិរលួសខាងលិច ឃុំរលួស ស្រុកប្រាសាទបាគង តាមបណ្ដោយផ្លូវជាតិលេខ៦ ឆ្ពោះមកក្រុងសៀមរាប។
តាមរបាយការណ៍ សមត្ថកិច្ចនគរបាលស្រុកប្រាសាទបាគងបានបង្ហាញថា ជនរងគ្រោះមាន ឈ្មោះ ជាក់ ចិន ភេទប្រុស អាយុ៣០ឆ្នាំ រស់នៅភូមិសាលាកន្សែង សង្កាត់ស្វាយដង្គុំ ក្រុងសៀមរាប បានជិះម៉ូតូម៉ាកហ្សូមមឺ(Zoomer)សេរីឆ្នាំ២០០៦ ពណ៌ស ពាក់ស្លាកលេខ សៀមរាប 1Y-3981។ នៅថ្ងៃទី១០ ខែកុម្ភះ ឆ្នាំ២០១៩ ជនរងគ្រោះ បានមកហូបការ នៅភូមិរការកំបុត ឃុំត្រពាំងធំ ស្រុកប្រាសាទបាគង រហូតដល់ម៉ោងប្រហែល៤រសៀល ពេលជិះម៉ូតូត្រឡប់ទៅក្រុងសៀមរាបវិញម្នាក់ឯង តាមផ្លូវជាតិលេខ៦ ដល់ចំណុចភូមិរលួសខាងលិច ឃុំរលួស ស្រុកប្រាសាទបាគង ខេត្តសៀមរាប ជនរងគ្រោះស្រវឹងទៅមុខពុំរួច ក៏ឈប់ម៉ូតូដេក នៅចំរាក់ផ្លូវតែម្ដង។
សមត្ថកិច្ចបានឲ្យដឹងទៀតថា នៅម៉ោងប្រមាណ៧ល្ងាច ជនរងគ្រោះបានឃើញជនសង្ស័យ ធ្វើសកម្មភាពយកម៉ូតូរបស់គាត់ជិះមកទិសខាងលិច ពេលនោះគាត់ និងប្រជាពលបានឃើញ និងបានរាយការណ៍ឲ្យសមត្ថកិច្ចស្រុកភ្លាមៗ និងបានជិះដេញតាម បានចម្ងាយប្រហែល៤០០ម៉ែត្រ ជនសង្ស័យក៏ក្រឡាច់ដួលខ្លួនឯង បណ្តាលអោយរងរបួសហើយកម្លាំងនគរបាលបានបញ្ជូនទៅមន្ទីរពេទ្យមេគង្គក្នុងក្រុងសៀមរាប ។
បច្ចុប្បន្ន សមត្ថកិច្ចពុំទាន់បានសួរនាំជនសង្ស័យនៅឡើយទេ ដោយជនសង្ស័យកំពុងព្យាបាលមិនទាន់ដឹងខ្លួន ហើយសមត្ថកិច្ច បានដាក់កម្លាំងយាមជនសង្ស័យនៅទីនោះផងដែរ។ ចំពោះវត្ថុតាងម៉ូតូម៉ាកហ្សូមមឺ១គ្រឿង ដែលសមត្ថកិច្ចដកហូតបាន សមត្ថកិច្ចបានប្រគល់ជូនម្ចាស់ដើមវិញរួចរាល់ហើយ។
អត្ថបទ និង រូបថត : លោក ថាច់ ពិសុទ្ធ
កែសម្រួលអត្ថបទ : លោក សេង ផល្លី
