នៅព្រឹកថ្ងៃទី២៧ ខែកក្កដា ឆ្នាំ២០២១នេះ លោក សឹង្ហ សំរិទ្ធិ អនុប្រធានសមាគមចលនាយុវជនកម្ពុជាក្រុម១៥៧ និងជាតំណាងឯកឧត្តម ហ៊ុន ប៉ូគា ប្រធានសមាគមចលនាយុវជនកម្ពុជាក្រុម១៥៧ សាខាខេត្តសៀមរាបបានដឹកនាំសមាជិក សមាជិកា នៃសមាគមនេះ បាននាំយកអំណោយជាសម្ភារ:ប្រើប្រាស់មួយចំនួនដែលឧបត្ថម្ភពីប៊ូទិក សម្បត្តិពន្លឺជ័យ ប្រគល់ជូនសាលាសង្កាត់ជ្រាវ ក្រុងសៀមរាប ខេត្តសៀមរាប ដើម្បីប្រើប្រាស់ក្នុងយុទ្ធនាការប្រយុទ្ធប្រឆាំងជំងឺកូវីដ-១៩ អំណោយមាន៖ ទឹកសុទ្ធ ចំនួន២០០យួរ ,ម៉ាស់ ចំនួន៧៥០ម៉ាស់ ,អាល់កុលលាងដៃ ចំណុះ ១០០មីលីលីត្រ ចំនួន២០០ដបផងដែរ។
មានប្រសាសន៏ក្នុងឱកាសនោះ លោក គង់ ប៊ឺប ជំទប់ទី១ សង្កាត់ជ្រាវ បានបង្ហាញនូវក្តីសោមនស្សរីករាយ ចំពោះទឹកចិត្តដ៏ឧត្តុង្គឧត្តម របស់សមាគមចលនាយុវជនកម្ពុជាក្រុម១៥៧ សាខាខេត្តសៀមរាប ដែលបាននាំយកអំណោយមកប្រគល់ជូននាពេលនេះ ក្នុងពេលដែលពលរដ្ឋក្នុងតំបន់នេះកំពុងប្រឈមជាមួយការលំបាកដោយសារវិបត្តិជំងឺកូវីដ-១៩ ហើយនេះក៏ជាការចូលរួមចំណែកជាមួយរាជរដ្ឋាភិបាល ក៏ដូចជារដ្ឋបាលក្រុង រដ្ឋបាលខេត្តសៀមរាប ក៏ដូចជាអាជ្ញាធរមូលដ្ឋានផងដែរ។
លោកចៅសង្កាត់រងទី១ នៃសង្កាត់ជ្រាវ ក៏បានផ្តាំផ្ញើដល់បងប្អូនប្រជាពលរដ្ឋឲ្យថែរក្សាសុខភាព និងសូមមេត្តាចូលរួមអនុវត្តតាមប្រសាសន៍ណែនាំរបស់សម្តេចតេជោ ហ៊ុន សែន នូវវិធានការ ៣កុំ និង៣ការពារឲ្យបានខ្ជាប់ខ្ជួន ដើម្បីចៀសឲ្យផុតពីជំងឺដ៏កាចសាហាវនេះ។ ជាមួយគ្នានោះក្រោមការខិតខំប្រឹងប្រែងរបស់អាជ្ញាធរខេត្ត/ក្រុង ស្ថាប័នជំនាញពាក់ព័ន្ធ រួមទាំងការចូលរួមសហការពីបងប្អូនប្រជាពលរដ្ឋ ក្នុងការទប់ស្កាត់នៅជំងឺកូវីដ-១៩ សំដៅកាត់ផ្តាច់ខ្សែចម្លងជំងឺកូវីដ-១៩នេះឲ្យបាន ជាពិសេសព្រឹត្តិការណ៍សហគមន៍ ២០ កុម្ភ: ២០២១ គឺឆ្ពោះទៅរកការងើបឈរឡើងវិញ នៃកំណើនសេដ្ឋកិច្ចកម្ពុជា ក្រោមការត្រៀមទុកដោយយន្តការ នៃយុទ្ធសាស្រ្ត កែប្រែវិបត្តិកូវីដ ឲ្យក្លាយជាឱកាស នៃការអភិវឌ្ឍន៍ក្នុងសង្គមជាតិ។
បើតាមលោក សឹង្ហ សំរិទ្ធិ អនុប្រធាសមាគមនចលនាយុវជនកម្ពុជាក្រុម ១៥៧ សាខាខេត្តសៀមរាប បានមានប្រសាសន៍ថា នៅក្នុងបរិបទជំងឺកូវីដ-១៩ នេះ សូមឲ្យបងប្អូនប្រជាពលរដ្ឋទាំងអស់ មេត្តាយកចិត្តទុកដាក់ឲ្យបានខ្ពស់បន្ថែមទៀត ក្នុងការធ្វើអនាម័យជាប្រចាំ ដើម្បីការពារខ្លួនយើង ក្រុមគ្រួសារយើង ក៏ដូចជាសង្គមជាតិទាំងមូលផងដែរ។ ចំពោះអំណោយដែលបានប្រគល់ជូនសម្រាប់ពេលនេះ គឺបានមកពីការឧបត្ថម្ភពី ប៊ូទិក សម្បត្តិពន្លឺជ័យ ដែលបានឧបត្ថម្ភដល់សមាគមទុកសម្រាប់ចែកជូនដល់បងប្អូនពលរដ្ឋខ្វះខាតក្នុងជីវភាពរស់នៅប្រចាំថ្ងៃ និងដើម្បីចូលរួមចំណែកជាមួយរាជរដ្ឋាភិបាល អាជ្ញាធរខេត្ត ក៏ដូចជាអាជ្ញាធរមូលដ្ឋានទាំអស់នៅក្នុងខេត្តសៀមរាបផងដែរ។
សូមជម្រាបជូនថា សមាគមនចលនាយុវជនកម្ពុជាក្រុម ១៥៧ សាខាខេត្តសៀមរាប បានធ្វើសកម្មភាពយ៉ាងច្រើន ក្នុងការផ្ដល់អំណោយជូនដល់អាជ្ញាធរខេត្ត, អាជ្ញាធរក្រុង ស្រុក និងឃុំសង្កាត់ នៅក្នុងវិបត្តិជំងឺកូវីដ-១៩នេះ ៕
អត្ថបទ និងរូបភាព: លោកអ៊ុន ណារាជ្យ កែសម្រួលដោយ លីវ សុខុន!!!
