អាជ្ញាធរជាតិអប្សរា និងគ្រឹះស្ថានអង្គរ នៅព្រឹកថ្ងៃទី២៩ ខែកក្កដា ឆ្នាំ២០២១នេះ បានសម្រេចបិទការចូលទស្សនាប្រាសាទនានា និងផ្អាកការលក់សំបុត្រការចូលទស្សនា ក្នុងរមណីយដ្ឋានអង្គរបណ្ដោះអាសន្នរយៈពេល១៤ គិតចាប់ពីថ្ងៃទី៣០ ខែកក្កដា ឆ្នាំ២០២១ ដល់ថ្ងៃទី១២ ខែសីហា ឆ្នាំ២០២១ ដើម្បីចូលរួមទប់ស្ដាត់ការឆ្លងរីករាលដាលក្នុងសហគមន៍នៃវីរុសកូវីដ-១៩ ប្រភេទ ដែលតា (Delta) ដែលកំពុងមានការឆ្លងរាលដាលនៅក្នុងប្រទេសកម្ពុជា ក៏ដូចជាខេត្តសៀមរាប។
ក្នុងសេចក្ដីជូនដំណឹងខាងលើនេះដែរ បានបញ្ជាក់ថា ការសម្រេចបិទមិនឲ្យភ្ញៀវទេសចរចូលទស្សនាប្រាសាទនានានៅក្នុងតំបន់អង្គរនេះ
ធ្វើឡើងបន្ទាប់ពីរាជរដ្ឋាភិបាលកម្ពុជា កាលពីថ្ងៃទី២៨ ខែកក្កដា ឆ្នាំ២០២១ បានចេញសេចក្ដីសម្រេចស្ដីពី៖ ការបិទខ្ទប់ភូមិសាស្រ្តខេត្តកោះកុង ខេត្តពោធិ៍សាត់ ខេត្តបាត់ដំបង ខេត្តប៉ៃលិន ខេត្តបន្ទាយមានជ័យ ខេត្តឧត្តរមានជ័យ ខេត្តព្រះវិហារ និងខេត្តសៀមរាប ដើម្បីទប់ស្ដាត់ការឆ្លងរីករាលដាលក្នុងសហគមន៍នៃវីរុសបំប្លែងថ្មី ប្រភេទដែលតា (Delta) ខណៈបណ្ដាខេត្តទាំងនេះ កំពុងមានការឆ្លងរាលដាលនៃមេរោគកូវីដ-១៩ ប្រភេទដែលតា នៅក្នុងសហគមន៍និងនាំចូលពីក្រៅប្រទេសផងដែរ។
គួរឲ្យដឹងដែរថា គិតចាប់ពីថ្ងៃទី៣១ ខែមីនា ឆ្នាំ២០២១ ដល់ថ្ងៃទី២៥ ខែកក្កដា ឆ្នាំ២០២១ កម្ពុជាបានរកឃើញអ្នកមានវិជ្ជមានវីរុសកូវីដ១៩ ប្រភេទ ដែលតា ( Delta ) សរុបទាំងអស់ចំនួន ១១៤នាក់ ក្នុងនោះស្ត្រី ៥៩នាក់ ហើយក៏មានករណីឆ្លងក្នុងសហគមន៍ផងដែរ ដែរជាហេតុបង្កឱ្យមានការព្រួយបារម្ភ ដោយសារតែវីរុសដែលតានេះ គឺមានល្បឿននៃការឆ្លងលឿន។ ជាមួយគ្នានោះដែរ ក្រសួងសុខាភិបាលតែងតែបានព្រមានជាច្រើនលើក ច្រើនសារ អំពីវីរុសបំប្លែងថ្មី ដែលតា ដែលត្រូវបានរកឃើញជាបន្តបន្ទាប់ ហើយដែលអាចនឹងនាំឱ្យកម្ពុជាឈានហួសបន្ទាត់ក្រហម បើសិនជាវីរុសនេះឆ្លងចូលក្នុងសហគមន៍នោះ៕
