នៅថ្ងៃទី២៩ ខែកក្កដា ឆ្នាំ២០២១ម្សិលមិញនេះ នៅសាលប្រជុំសាលាខេត្ត លោក ង៉ាន់ ភិរុណ អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម ទៀ សីហា អភិបាល នៃគណៈអភិបាលខេត្តសៀមរាប បានដឹកនាំកិច្ចប្រជុំពិភាក្សាមួយ ស្ដីពីការគ្រប់គ្រងសំរាម សំណល់រឹង សំណល់ផ្ទះបាយ និងសំណល់វេជ្ជសាស្ដ្រតាមមណ្ឌលចត្តាឡីស័ក និងមណ្ឌលព្យាបាលកូវីដ-១៩ កម្រិតស្រាល ក្នុងក្រុងសៀមរាប ដោយមានការចូលរួមពីតំណាងភាគីពាក់ព័ន្ធរួមមាន ទីចាត់ការអន្តរវិស័យ ទីចាត់ការហិរញ្ញវត្ថុ មន្ទីរបរិស្ថាន មន្ទីរសុខាភិបាលខេត្ត មន្ទីរសេដ្ឋកិច្ច និងហិរញ្ញវត្ថុខេត្ត មន្ទីរពេទ្យបង្អែកខេត្ត រដ្ឋបាលក្រុងសៀមរាប រដ្ឋបាលស្រុកបន្ទាយស្រីក្រុមហ៊ុនGAEA.Plc ក្រុមហ៊ុនCINTRI និងក្រុមហ៊ុនACTIVE GREEN.,Ltd ក្នុងគោលបំណងបង្កើនប្រសិទ្ធភាពការគ្រប់គ្រង និងលើកកម្ពស់ការទុកដាក់ចុងក្រោយនូវសំរាម សំណល់រឹង សំណល់ផ្ទះបាយ និងសំណល់វេជ្ជសាស្ដ្រតាមមណ្ឌលចត្តាឡីស័ក និងមណ្ឌលព្យាបាលកូវីដ-១៩កម្រិតស្រាល ស្របតាមបទដ្ឋានបច្ចេកទេស ធានាបាននូវផាសុខភាព និងសុវត្ថិភាពបរិស្ថាន។
សូមបញ្ជាក់ថា បន្ទាប់ពីមានការចូលរួមផ្ដល់ជាមតិ និង យោបល់រួចមក អង្គប្រជុំសម្រេចទទួលបានលទ្ធផលដូចជា ៖
១- ត្រូវដាក់ធុងកុងតឺន័រសម្រាប់ដាក់សំរាមគ្រប់ទីតាំងមណ្ឌលចត្តាឡីស័ក និងមណ្ឌលព្យាបាលជំងឺកូវីដ-១៩។
២- ត្រូវគ្រប់គ្រងប្រមូលសំរាម និងយកសំរាមចេញឲ្យអស់រៀងរាល់ថ្ងៃទាំងសំណល់រឹង សំណល់ផ្ទះបាយ និងសំណល់វេជ្ជសាស្ដ្រនៅតាមមណ្ឌលចត្តាឡីស័ក និងមណ្ឌលព្យាបាល កូវីដ-១៩ កម្រិតស្រាល។
៣- ត្រូវដុតកម្ទេចចោលឲ្យអស់ជារៀងរាល់ថ្ងៃ ក្រោយពីបានប្រមូលពីតាមទីតាំងមណ្ឌលចត្តាឡីស័ក និងមណ្ឌលព្យាបាលកូវីដ-១៩កម្រិតស្រាលនីមួយៗ ដោយត្រូវមានមធ្យោបាយដឹកជញ្ជូនត្រឹមត្រូវ និងមានឡដុតតាមលក្ខណៈបច្ចេកទេសនៅទីតាំងឡដុតសំណល់ទាំងសំណល់រឹង សំណល់ផ្ទះបាយ និងសំណល់វេជ្ជសាស្ត្រ។
៤- ត្រូវណែនាំឲ្យពួកគាត់ចូលរួមក្នុងការទុកដាក់សំរាមក្នុងធុងឲ្យបានគ្រប់គ្នាទាំងសំណល់រឹង សំណល់ផ្ទះបាយ និងសំណល់វេជ្ជសាស្ដ្រ តាមមណ្ឌលចត្តាឡីស័ក និងមណ្ឌលព្យាបាលកូវីដ-១៩កម្រិតស្រាលទាំងអស់ បន្ទាប់មកក្រុមហ៊ុនប្រមូលសំរាម (CINTRI និងក្រុមហ៊ុនGAEA.Plc ) ដឹកជញ្ជូនយកទៅដាក់ទីលានទុកដាក់សំរាម និងដុតកម្ទេចចោលក្នុងឡដុតសំរាមទាំងសំណល់រឹង សំណល់ផ្ទះបាយ និងសំណល់វេជ្ជសាស្ដ្រ៕
ប្រភព ៖ រដ្ឋបាលខេត្តសៀមរាប
