នៅព្រឹកថ្ងៃទី៣០ ខែកក្ដដា ឆ្នាំ២០២១ លោក ផយ ម៉ក់ ប្រធានសមាគមចលនាយុវជនកម្ពុជា ក្រុម១៥៧ ស្រុកវ៉ារិន តំណាងឲ្យលោក ហ៊ុន ប៉ូគា ប្រធានសមាគមចលនាយុវជនកម្ពុជា ក្រុម១៥៧ សាខាខេត្តសៀមរាប បានដឹកនាំសមាជិកសមាជិកា នាំយកនូវទានព្រះវស្សា និងទេយ្យទានមួយចំនួន យកទៅប្រគេនដល់ព្រះសង្ឃ ដែលគង់ចាំព្រះវស្សា នៅក្នុងវត្តចំនួនពីរ ក្នុងស្រុកវ៉ារិន មាន៖ វត្តសុវណ្ណសុគន្ធារីរតនារ៉ាម ស្ថិតក្នុងភូមិអូររំចេក ឃុំស្រែណូយ និងវត្តព្រៃសហគមន៍ភ្នំទឹកធ្លាក់ចង្ក្រានរយ ស្ថិតក្នុងភូមិបាយដុត២ ឃុំស្វាយស ស្រុកវ៉ារិន ខេត្តសៀមរាប។ សម្រាបទេយ្យវត្ថុ និងបច្ច័យប្រគេនដល់ព្រះសង្ឃគង់ចាំព្រះវស្សាសម្រាបវត្តទាំងពីរ ក្នុង១វត្តទទួលបាន៖ ទៀនព្រះវស្សា ចំនួន២ដើម ,អង្ករ១ការ៉ុងស្មើ៥០ គីឡូក្រាម ,ស្លាដក់១គូ ,មី ៣កេស ,ទឹកបរិសុទ្ធ ៥កេស និង ៣០យួរ ,ទឹកផ្លែឈើ ២កេស ,ម៉ាស់ ៥០០ម៉ាស់ ,ទឹកត្រី ៣យួរ ,ទឹកស៊ីអ៊ីវ ២យួរ និងបច្ច័យ ៣០ ម៉ឺនរៀលផងដែរ ។
លោក ផយ ម៉ក់ ប្រធានសមាគមចលនាយុវជនកម្ពុជា ក្រុម១៥៧ ស្រុកវ៉ារិន មានប្រសាសន៍ថា សម្ភារៈ និងទេយ្យវត្ថុទាំងនេះ គឺបានមកពីការចូលរួមរបស់សមាជិកសមាជិកាសមាគមចលនាយុវជនកម្ពុជា ក្រុម១៥៧ ដែលបានបរិច្ចាគធនធានថវិកាផ្ទាល់ខ្លួន សម្រាប់ចំណាយទិញ និងប្រគេនដល់ព្រះសង្ឃនៅក្នុងវត្ត នៅរដូវកាលដែលព្រះសង្ឃ ត្រូវធ្វើវដ្តប្រតិបត្តិ ចូលព្រះវស្សាអស់កាលត្រីមាស សម្រាប់ជាចតុប្បច្ច័យភិក្ខុសង្ឃប្រើប្រាស់ ក៏ដូចជាតបទៅនឹងតម្រូវការចាំបាច់នៃដំណាក់កាលជួបការលំបាកដោយវិបត្តិជំងឺកូវីដ-១៩ ដែលកំពុងរាតត្បាតឆ្លងចូលសហគមន៍ជាបន្តបន្ទាប់។
លោកមានប្រសាសន៍ទៀតថា នៅក្នុងបរិបទជំងឺកូវីដ-១៩ នេះ សូមឲ្យបងប្អូនប្រជាពលរដ្ឋទាំងអស់ មេត្តាយកចិត្តទុកដាក់ឲ្យបានខ្ពស់បន្ថែមទៀត ក្នុងការធ្វើអនាម័យជាប្រចាំ ដើម្បីការពារខ្លួនយើង ក្រុមគ្រួសារយើង ក៏ដូចជាសង្គមជាតិទាំងមូលផងដែរ។ ជាពិសេសវិធានការរបស់រាជរដ្ឋាភិបាល គឺ៣កុំ និង ៣ការពារ ដើម្បីរួមគ្នាការពារទប់ស្កាត់កុំឱ្យមេរោគដ៍សាហាវនេះរីករាលដាលបន្តឆ្លងចូលសហគមន៍ ក្នុងនោះត្រូវការពារដោយការពាក់ម៉ាស់ , ការលាងសំអាតដៃឱ្យបានញឹកញាប់ , ការរក្សាគម្លាតសុវត្ថិភាពសង្គមបុគ្គលពីម្នាក់ទៅម្នាក់ឱ្យបានយ៉ាងតិចមួយម៉ែត្រកន្លះ និង កុំចូលទៅទីកន្លែងបិទជិតខ្វះខ្យល់ចេញចូលនិងប្រើម៉ាស៊ីនត្រជាក់ច្រើន , កុំទៅទីដែលមានមនុស្សច្រើនកុះករ , កុំប៉ះពាល់គ្នា និង កុំជួបជុំគ្នាច្រើនជាដើម ៕
អត្ថបទ និង រូបភាព៖ លោក ខេង ឧត្តម
កែសម្រួល៖ លោក អ៊ុន ណារាជ្យ
