ដោយមើលឃើញពីតម្រូវការចាំបាច់ក្នុងការដឹកសម្ភារៈផ្សេងៗ នៅក្នុងបរិវេណមណ្ឌលចត្តាឡីស័ក និងកន្លែងព្យាបាលអ្នកជំងឺកូវីដ-១៩ នៅព្រឹកថ្ងៃទី០២ ខែសីហា ឆ្នាំ២០២១នេះ ឯកឧត្តមអ្នកឧកញ៉ា សៀង ណាំ អ្នកតំណាងរាស្រ្តខេត្តសៀមរាប បានផ្តល់រ៉ឺម៉កម៉ូតូប្រើអាគុយចំនួន៥គ្រឿង ដែលបានមកពីសប្បុរសជនមួយចំនួន ជូនដល់មន្ទីរសុខាភិបាលខេត្តសៀមរាប សម្រាប់ប្រើប្រាស់ក្នុងការដឹកសម្ភារៈ និងដឹកអ្នកជំងឺកូវីដ-១៩ ចល័តពីអគារមួយទៅអគារមួយ និងសម្រាប់ការងារផ្សេងៗទៀត ដែលខាងមន្ទីរពេទ្យចាំបាច់ត្រូវប្រើ។ ហើយចំពោះរ៉ឺម៉កម៉ូតូទាំង៥គ្រឿងនេះដែរ គឺបានមកពីសាលវិទ្យាល័យអង្គរចំនួន២គ្រឿង ,អង្គរ អ៊ីកូ រ៉េស៊ីដេន គម្រោងអចលនទ្រព្យ ចំនួន២គ្រឿង និងយានដ្ឋានម៉េងឌីនិងក្រុមហ៊ុនម៉េងឌីវែលឡុបមែន ចំនួន១គ្រឿង។
តំណាងឲ្យឯកឧត្តមអ្នកឧកញ៉ា សៀង ណាំ លោក សុខ តុញ បានមានប្រសាសន៍ថា កន្លងមកនេះ ឯកឧត្តមអ្នកឧកញ៉ា សៀង ណាំ ក៏ដូចជារូបលោកផ្ទាល់បានផ្តល់សម្ភាៈរ និងស្បៀងអាហារទៅដល់អាជ្ញាធរ ក្រុង/ស្រុក និងខេត្តសៀមរាប ដើម្បីជាការចូលរួមជាមួយអាជ្ញាធរក្នុងប្រយុទ្ធប្រឆាំងជំងឺកូវីដ-១៩ ។ ចំពោះការផ្តល់ជូននូវ រ៉ឺម៉កម៉ូតូប្រើអាគុយនៅពេលនេះ គឺដោយសារតែឃើញថា នៅក្នុងមណ្ឌលចត្តាឡីស័ក និងកន្លែងព្យាបាលអ្នកជំងឺកូវីដ-១៩ មានជួបការលំបាកក្នុងការដឹកសម្ភារៈសម្រាប់ផ្គត់ផ្គង់នៅបរិវេណមន្ទីរពេទ្យ ជាពិសេស គឺការចល័តអ្នកជំងឺពីអគារមួយទៅអគារមួយទៀតនៅពេលមានភ្លៀងម្តងៗ។ លោកជឿជាក់ថា រ៉ឺម៉កម៉ូតូប្រើអាគុយចំនួន៥គ្រឿងនេះ និងចូលរួមចំណែកជួយដល់ខាងមន្ទីរពេទ្យឱ្យមានភាពងាយស្រួលជាងមុនសម្រាប់បម្រើការងាដឹកជញ្ជូនផ្សេងៗ នៅក្នុងបរិវេណមន្ទីរពេទ្យ។
មានប្រសាសន៍ក្នុងឱកាសនោះដែរ ឯកឧត្តមវេជ្ជបណ្ឌិត ក្រុស សារ៉ាត់ ទីប្រឹក្សា និងជាប្រធានមន្ទីរសុខាភិបាលខេត្តសៀមរាប បានថ្លែងអំណរគុណដល់ ឯកឧត្តមអ្នកឧកញ៉ា សៀង ណាំ និងសប្បុរសជននានា ដែលបានផ្តល់សម្ភារៈ និងរ៉ឺម៉កម៉ូតូប្រើអាគុយនេះ ខណៈបច្ចុប្បន្នមន្ទីរពេទ្យខេត្ត និងមណ្ឌលចត្តាឡីស័ក និងព្យាបាលជំងឺកូវីដ-១៩ កំពុងមានការមមាញឹកណាស់ ដោយសារតែមានអ្នកជំងឺកូវីដ-១៩ មានការកើនឡើងច្រើន ហើយការងារដឹកជញ្ជូនក៏ច្រើន។ ដូចនេះ ពេលទទួលបានរ៉ឺម៉កម៉ូតូប្រើអាគុយនេះ វានឹងជួយសម្រួលបានមួយចំណែកដែរ ព្រោះរ៉ឺម៉កម៉ូតូប្រើអាគុយនេះ ស្រួលបទបែននៅតាមកន្លែងតូចចង្អៀត ជាពិសេពេលដឹកអ្នកជំងឺពីអគារមួយទៅអគារមួយទៀតមានភាពងាយស្រួលអាចការពារកំដៅ និងទឹកភ្លៀងផងដែរ៕
អត្ថបទ និង រូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
