នៅព្រឹកថ្ងៃទី០១ ខែសីហា ឆ្នាំ២០២១នេះ ការចាក់វ៉ាក់សាំងការពារជំងឺកូវីដ-១៩ ដូសទី២ ជូនដល់ប្រជាពលរដ្ឋរស់នៅក្នុងសង្កាត់សំបួរ ក្រុងសៀមរាប បានចាប់ផ្ដើមដំណើរការហើយ តាមកម្មវិធីដែលបានគ្រោងទុកដែលមានទីតាំងចាក់វ៉ាក់សាំងនៅក្នុងសាលាបឋមសិក្សាសំបួរ ។
លោក វរៈសេនីយ៍ឯក ឌិន សុភិន នាយរងសេនាធិការភូមិភាគ៤ និងជាប្រធានក្រុមទី៤ការចាក់វ៉ាក់សាំង នៅសង្កាត់សំបួរ បានមានប្រសាសន៍ថាការចាក់វ៉ាក់សាំងដូសទី២ជូនប្រជាពលរដ្ឋនាថ្ងៃទី០១ខែសីហានេះគឺត្រូវចាក់ជូនប្រជាពលរដ្ឋដែលបានចាក់វ៉ាក់សាំងដូសទី១កាលពីថ្ងៃទី១០ ទី១១ខែកក្កដា ក្នុងពេលតែមួយគឺដោយសារផែនការចាក់វ៉ាក់សាំងដុសទី២ត្រូវចាប់ផ្តើមនៅថ្ងៃទី៣១ខែកក្កដា ត្រូវបានលើកមកថ្ងៃទី០១ខែសីហាវិញគឺសម្រាប់ទីតាំងចាក់វ៉ាក់សាំងក្នុងសង្កាត់សំបួរ ។ លោក វរៈសេនីយ៍ឯក ឌិន សុភិន បានបន្តទៀតថាតាមផែនការគឺធ្វើការចាក់ជូនដល់ប្រជាពលរដ្ឋក្នុងថ្ងៃនេះប្រមាណជា១.៤០០នាក់គឺទៅតាមចំនួនប្រជាពលរដ្ឋដែលបានចាក់វ៉ាក់សាំងដូសទី១កាលពីថ្ងៃទី១០ទី១១ខែកក្កដាកន្លងមក ។
នៅក្នុងឱកាសអញ្ជើញចុះពិនិត្យ និងលើកទឹកចិត្តដល់សកម្មភាពការចាក់វ៉ាក់សាំងបង្ការជំងឺកូវីដ-១៩ ជូនប្រជាពលរដ្ឋក្នុងសង្កាត់សំបួរ និងសាកសួរសុខទុក្ខបងប្អូនប្រជាពលរដ្ឋ និងក្រុមគ្រូពេទ្យនាពេលនោះផងដែរ។
លោក ច័ន្ទ សុខុមចិត្តា ប្រធានមន្ទីរការងារនិងបណ្តុះបណ្តាលវិជ្ជាជីវៈខេត្ត និងជាប្រធានក្រុមការងារខេត្ត ចុះជួយមូលដ្ឋាន សង្កាត់សំបួរ ក្រុងសៀមរាប បានមានប្រសាសន៍លើកឡើងថា «សម្ដេចតេជោ ហ៊ុន សែន មិនត្រឹមតែស្វែងរកសុខសន្តិភាពជូនជាតិមាតុភូមិប៉ុណ្ណោះទេ ថែមទាំងជួយសង្រ្គោះអាយុជីវិតប្រជាពលរដ្ឋកម្ពុជា ឲ្យរួចផុតជំងឺកូវីដ១៩ទៀតផង តាមរយៈការស្វែងរកវ៉ាក់សាំងមកចាក់ជូនប្រជាពលរដ្ឋបានជាបន្តបន្ទាប់» ហើយចំពោះ វ៉ាក់សាំងដែលត្រូវចាក់នាពេលនេះ គឺជាប្រភេទវ៉ាក់សាំង Sinopharm ដែលជាអំណោយដ៏ថ្លៃថ្លារបស់រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ជាប្រមុខដឹកនាំ នឹងចាក់ជូនបងប្អូនប្រជាពលរដ្ឋគ្រប់ៗគ្នា ដោយឥតគិតថ្លៃ។លោកបានបន្តទៀតថា សម្តេចតេជោ នាយករដ្ឋមន្ត្រី តែងតែយកចិត្តទុកដាក់ខ្ពស់ចំពោះសុខមាលភាពរបស់បងប្អូនប្រជាពលរដ្ឋកម្ពុជា ជាពិសេសការទប់ស្កាត់ការរីករាលដាលជំងឺឆ្លងកូវីដ-១៩ និងខិតខំប្រឹងប្រែងស្វែងរកវ៉ាក់សាំង បង្ការចាក់ជូនប្រជាពលរដ្ឋឲ្យបានគ្រប់ៗគ្នា និងដោយឥតគិតថ្លៃ ។ ក្នុងនោះដែរលោក ច័ន្ទ សុខុមចិត្តា និងក្រុមការងារក៍បានធ្វើការនែនាំដល់បងប្អូនប្រជាពលរដ្ឋទាំងអស់ដែលបានមកធ្វើការចាក់វ៉ាក់សាំងសូមចូលរួមអនុវត្តរក្សាគម្លាត សណ្តាប់ធ្នាប់ សូមកុំប្រជៀត និង ដណ្តើមគ្នា គឺត្រូវតែបន្តបង្កើនការប្រុងប្រយ័ត្នខ្ពស់ នឹងយកចិត្តទុកដាក់បន្ថែមទៀត ដោយចូលរួមអនុវត្តតាមវិធានការណែនាំរបស់ប្រមុខរាជរដ្ឋាភិបាល ៣កុំ ៣ការពារ និងសេចក្តីណែនាំរបស់ក្រសួងសុខាភិបាលឲ្យបានគ្រប់ៗគ្នា យើងទាំងអស់គ្នាត្រូវចូលរួមទប់ស្កាត់ និងការពារជម្ងឺកូវីដ-១៩ ពីព្រោះថា កូវីដ-១៩ មិនរើសអើងអ្នកណាម្នាក់ឡើយ ៕
អត្ថបទ និងរូបភាព ទ្រា ពន្លឺ
