អាជ្ញាធរខេត្តសៀមរាបនឹងសាកល្បងបើកផ្សារលើធំថ្មី ក្នុងក្រុងសៀមរាបឡើងវិញ ដោយការបើកឱ្យលក់ដូរនោះ គឺត្រូវប្ដូរវេនគ្នារយៈពេល៧ថ្ងៃម្ដង សម្រាប់អាជីវករនៅចំហៀងផ្សារ។ នេះបើតាមការបញ្ជាក់របស់ឯកឧត្តម ទៀ សីហា អភិបាលខេត្តសៀមរាប ក្នុងឱកាសឯកឧត្តមដឹកនាំមន្រ្តីជំនាញ និងអ្នកពាក់ព័ន្ធចុះពិនិត្យមើលទីតាំងផ្សារលើធំថ្មី ក្រុងសៀមរាប នៅព្រឹកថ្ងៃទី០៩ ខែសីហា ឆ្នាំ២០២១នេះ។
ឯកឧត្តម ទៀ សីហា បានបញ្ជាក់បន្ថែមថា អាជ្ញាធរខេត្តសៀមរាប នឹងសាកល្បងបើកផ្សារលើឡើងវិញក្នុងរយៈដ៏ខ្លីខាងមុខនេះ ប៉ុន្តែការលក់ដូរនេះ គឺអាជីវករត្រូវប្ដូរវេនគ្នា ដោយក្នុងនោះអ្នកលក់នៅចំហៀងផ្សារអាចលក់បានមួយសប្ដាហ៍ ហើយប្ដូរទៅអោយអាជីវករម្ខាងផ្សារវិញទៀត។ ដោយឡែកចំពោះអាជីវករដែលលក់នៅខាងក្នុងផ្សារលើ គឺអាចលក់បានរហូត ប៉ុន្តែត្រូវរក្សាគម្លាត និងចងខ្សែព័ន្ធជុំវិញ ឲ្យមានត្រូវរៀបចំសណ្តាប់ធ្នាប់ល្អ និងវិធានការមួយចំនួនទៀតតាមការណែនាំរបស់អាជ្ញាធរ ដើម្បីបង្ការឆ្លងមេរោគកូវីដ-១៩ ជាពិសេសការរីករាលដាលនៃជំងឺកូវីដ-១៩ បំប្លែងថ្មី ប្រភេទ ឌែលតា។ ជាមួយនោះសម្រាប់អាជីវករមិនទាន់ដល់វេន គឺអាចទៅលក់នៅផ្សារបណ្ដោះអាសន្ន នៅផ្លូវ៦០ម៉ែត្រជិតផ្សារកុងទីន័រសិន។
ឯកឧត្តមបានបញ្ជាក់ទៀតថា ការបើកផ្សារឡើងវិញវាមិនពិបាកទេ ប៉ុន្តែអ្វីដែលអាជ្ញាធរចង់បាននោះ គឺចង់ឱ្យអ្នកលក់ និងអ្នកទិញមានសុវត្ថិភាព ខណៈដែលអ្នកលក់ជុំវិញផ្សារលើដែលមានប្រមាណជាង៨០០នាក់ បើសិនជាការបើកសាកល្បងនេះ អាជីវករមិនស្តាប់តាមការណែនាំរបស់អាជ្ញាធរ ធ្វើឱ្យផ្សារនេះមានភាពស្មុកស្មាញ និងប្រឈមការឆ្លងកូវិដច្រើនអាជ្ញាធរ និងបិទផ្សារនេះបន្តទៀត។
គួរឲ្យដឹងថា កាលពីថ្ងៃទី២៤ ខែមិថុនា ឆ្នាំ២០២១កន្លងទៅនេះ រដ្ឋបាលខេត្ដសៀមរាប បានប្រកាសបិទការលក់ដូរនៅផ្សារលើធំថ្មី ជាបណ្ដោះអាសន្ន ដើម្បីទប់ស្កាត់ការឆ្លងជំងឺកូវីដ-១៩ ខណៈដែលខេត្ដនេះ បាននឹងកំពុងរីករាលជំងឺកូវីដ-១៩ កើនឡើងគួរអោយព្រួយបារម្ភ។ ក្នុងនោះចាប់ពីថ្ងៃទី២៤ ខែមិថុនា ឆ្នាំ២០២១នេះ ផ្សារលើធំថ្មីត្រូវបានរដ្ឋបាលខេត្ដសៀមរាប បានប្រកាសបិទការលក់ដូរ ចំនួន៣លើកមកហើយ ដោយមួយលើកចំនួន២អាទិត្យ បន្ទាប់ពីរកឃើញអ្នកមានវិជ្ជមានកូវីដ-១៩ ជាច្រើននាក់នៅក្នុងផ្សារនោះ៕
អត្ថបទ និង រូបភាព៖ លោក ឈិត សាវី
កែសម្រួល៖ លោក អ៊ុន ណារាជ្យ
,
