ក្នុងឱកាសដឹកនាំមន្រ្តីជំនាញ និងអ្នកពាក់ព័ន្ធចុះពិនិត្យ និងសិក្សានៅផ្សារលើធំថ្មី ក្នុងក្រុងសៀមរាប នាព្រឹកថ្ងៃទី០៩ ខែសីហា ឆ្នាំ២០២១ម្សិលមិញនេះ ឯកឧត្តម ទៀ សីហា អភិបាលខេត្តសៀមរាប បានមានប្រសាសន៍ថា អាជ្ញាធរខេត្ត នឹងធ្វើការរផាកពិន័យធ្ងន់ធ្ងរជាងមុនទៅលើអាជីវករណាដែលមិនពាក់ម៉ាស់ និង ពាក់ម៉ាស់មិនត្រឹមត្រូវ ព្រមទាំងប្រជាពលរដ្ឋណាដែលធ្វើការជួបជុំគ្នាច្រើន ខុសពីការណែនាំរបស់រាជរដ្ឋាភិបាល ក៏ដូចក្រសួងសុខាភិបាល ក្នុងការចូលរួមទប់ស្កាត់ការរីករាលដាលជំងឺកូវីដ១៩ ហើយការរផាកពិន័យនេះ គឺធ្ងន់ធ្ងរជាងលើកមុន ព្រោះក្នុងគោលបំណងមិនឲ្យមេរោគកូវីដ-១៩ ឆ្លងរាលដាលទាំងអ្នកលក់និង ទាំងអ្នកទិញ។
ឯកឧត្ដមអភិបាលខេត្តសៀមរាប បានមានប្រសាសន៍ទៀតថា ការផាកពិន័យលើអាជីវករផ្សារលើថំថ្មី កាលពីពេលកន្លងមកនេះ នៅមិនទាន់ពិន័យជាប្រាក់មានចំនួនច្រើននោះទេ ដោយសារយើងមានការយោគយល់ដល់ប្រជាពលរដ្ឋ តែឥឡូវនេះជំងឺកូវីដ-១៩ បំប្លែងថ្មី ប្រភេទដែលតា បានកំពុងរាលដាលខ្លាំងក្នុងសហគមន៍ខេត្ដសៀមរាបហើយ ដូច្នេះ អាជ្ញាធរខេត្ត នឹងអនុវត្តច្បាប់ផាកពិន័យតែម្ដង ទៅលើអ្នកមិនពាក់ម៉ាស់ និងការជុំគ្នាច្រើននៅកន្លែងសាធារណៈ ពិសេស ក្នុងពេលបើកផ្សារលើធំថ្មីឡើងវិញ អាជីវករត្រូវអនុវត្ដកាតព្វកិច្ចពាក់ម៉ាស់ និងត្រូវអនុវត្ដវិធានការរបស់រាជរដ្ឋាភិបាលឲ្យបានត្រឹមត្រូវ គឺ៣កុំ និង៣ការពារ ប៉ុន្តែបើសិនបើកផ្សារឡើងវិញហើយ តែនៅមានការឆ្លងម្ដងទៀត អាជ្ញាធរនឹងបិទផ្សារនោះឡើងវិញ ។
គួររំលឹកថា កាលពីថ្ងៃទី០៩ ខែមិថុនា ឆ្នាំ២០២១ កន្លងទៅនេះ លោក ពិន ប្រាកដ អភិបាលរងខេត្ដសៀមរាប បានដឹកនាំក្រុមការងារ ចុះធ្វើការផាកពិន័យចំពោះអ្នកដែលមិនបានអនុវត្តនៃការពាក់ម៉ាសនៅផ្សារលើធំថ្មីម្ដងរួចមកហើយ ហើយក៏ជាលើកទី១ផងដែរសម្រាប់ខេត្តសៀមរាប ដែលនៅពេលនោះ មានអាជីវករផ្សារលើធំថ្មី ចំនួនជាង៣០នាក់ ត្រូវទទួលការផាកពិន័យ ដែលក្នុងមួយនាក់ ចំនួន២សែនរៀល ប៉ុន្តែអ្នកដែលមានថវិកាត្រូវបង់នៅកន្លែងផ្ទាល់ រីឯអ្នកមិនទាន់មានថវិកា ត្រូវយកទៅបង់នៅមន្ទីរសុខាភិបាល នៃរដ្ឋបាលខេត្តសៀមរាប ។ ក្នុងឱកាសនោះលោក ពិន ប្រាកដ មានប្រសាសន៍ថា មុននឹងចុះធ្វើការផាកពិន័យនេះ អាជ្ញាធរបានចុះណែនាំជាច្រើនដងមកហើយ ប៉ុន្ដែអាជីវករមួយចំនួនតូចមិនអនុវត្ដតាម ទើបអាជ្ញាធរ អនុវត្ដទៅតាមផ្លូវច្បាប់ ខណៈដែលការមិនពាក់ម៉ាស់នេះ រសង្កេតឃើញថា មានអាជីវករប្រមាណ៥ភាគរយប៉ុណ្ណោះ ដែលពួកគាត់មិនអនុត្ដតាមច្បាប់៕
ព័ត៌មានជាតិ ថ្មីៗ
អត្ថបទ និង រូបភាព៖ លោក ឈិត សាវី
កែសម្រួល៖ លោក លីវ សាន្ត
